VOV4.Sêdang - Klêi kơ’nâi 3 pơla măng tĭng pêi cheăng, xêo sap kơxê lơ 30/7, Hngêi pơkeăng pơtân kơxô̆ 3 Pơlê kong kân Hồ Chí Minh (kơpong vêh xĕn ối Bình Khánh ối tung bêng An Khánh, pơlê kong kơdrâm Thủ Đức) hiăng tơkŭm po ăm 1.800 ngế châ lo ing hngêi pơkeăng xua pơlât prêi COVOID 19. Ƀok thái pơkeăng chuyên khoa 2 Lý Quốc Công, Kăn pơkuâ Khoa Lâm Sàng, Hngêi pơkeăng pơtân kơxô̆ 3 tối ăm ‘nâi, nôkố hngêi pơkeăng ai 20 ngế tro tâ pơreăng ki râ, thế hiâm ƀă oxy. Mâu ƀok thái pơkeăng dế khăm pơlât ăm mâu ngế tro tâ pơreăng, tâng râ kô pơtroh pơlât a hngêi pơkeăng ki kân.

Tâi tâng mâu tơdroăng khăm pơlât pơrá tiô pơkâ dêi Khu xiâm ngăn pơkeăng ƀă khăm pơlât. A Pơlê kong kân Hồ Chí Minh, rêm hâi ai rơpâu ngế tro tâ pơreăng prêi lĕm lo hngêi pơkeăng. Tiô Tíu xiâm mơdât pơreăng pơlê kong kân Hồ Chí Minh, tung hâi lơ 29/7, ai tơ’nôm 3.131 ngế lo hngêi pơkeăng, mơdêk kơxô̆ ngế prêi lĕm xêo sap ing pơreăng pơxiâm tâ tú cho 28.320 ngế.

A Sa Ly tơplôu ƀă tơbleăng