VOV4.Sêdang - Tối tơbleăng ăm pôa Trương Hòa Bình, Ngế pro xiâm phŏ hnê ngăn tơnêi têa a rôh hôp kơxo lơ 1/6, pôa Nguyễn Thành Phong, kăn hnê ngăn Vi ƀan pơlê kong kân Hồ Chí Minh ăm ‘nâi, hlo tơdroăng ki pơreăng tâ tú a mâu kơpong pêi cheăng ƀă kơmăi kơmok, kơpong uâ pơliê pro kế tơmeăm, la ngiâ ah Pơlê kong kân kô tơbleăng a mâu khu mơdró kâ rế pêi pro vê hdró kơpong klâ krê rế mơjiâng pro kế tơmeăm vâ kơdroh iâ ki tâ tú dêi pơreăng dế ai nôkố.

Pơlê kong kân xuân pơxiâm tơbleăng kơxô̆ liăn tŏng kum má 2 ăm mâu khu mơdró kâ tro tơdjâk xua pơreăng COVID-19. Nôkố, Pơlê kong kân Hồ Chí Minh hiăng ai 3 ngế tâ pơreăng pêi cheăng tung 3 kơpong cheăng ƀă kơmăi kơmok, mê cho: Kơpong pêi cheăng ƀă kơmăi kơmok Tân Bình, Kơpong tíu pêi cheăng ƀă kơmăi kơmok Tây Bắc Củ Chi, Kơpong pêi cheăng ƀă kơmăi kơmok Vĩnh Lộc – Hóc Môn.

Tiô pôa Nguyễn Thành Phong, kăn hnê ngăn Vi ƀan pơlê kong kân Hồ Chí Minh, hlo tơdroăng ki tâ tú dêi pơreăng, môi tung mâu tơdroăng ki kal nôkố cho pâk xo mơheăm ƀă mâu kŏng nhân pêi cheăng tung kơpong tíu pêi cheăng, kơpong uâ pơliê pro kế tơmeăm, kơpong kơmăi kơmok chal nếo.

Nôkố pơlê kong kân ai 1.600 rơpâu ngế kŏng nhân. Krê kơpong cheăng ƀă kơmăi kơmok, kơpong uâ pơliê pro kế tơmeăm ai 280 rơpâu ngế kŏng nhân ƀă 3 rơpâu khu ki rơkê plĕng, kơpong cheăng ƀă kơmăi kơmok chal nếo ai 45 rơpâu ngế.

Katarina Nga tơplôu ƀă tơbleăng