VOV4.Sêdang - Hlo ôh tá tơniăn dêi pơreăng COVID-19, vâ tối tơbleăng tro hnoăng cheăng rak ngăn ăm mâu ngế ki xơpá a pơlê kong kân, Vi ƀan hnê ngăn Pơlê kong kân Hồ Chí Minh pơkâ thế mâu tíu pêi cheăng tối tơbleăng túa pơkâ tŏng kum mâu kế tơmeăm. Tiah mê, pơkâ thế tíu xiâm tơdah xo ƀă tŏng kum kế tơmeăm ki kal dêi pơlê kong kân hbrâ rơnáu 1 rơtuh tơdroăng tŏng kum (tŏng kum kế tơmeăm ki kal).

Vi ƀan hnê ngăn mâu pơlê krâm, pơlê kong kơdrâm ƀă Pơlê kong kân Thủ Đức pêi pro, séa ngăn, rak ngăn ăm kŏng nhân, sinh viên, mâu ngế pêi cheăng dế rêh ối a mâu kơpong hngêi mung ối, kơpong tíu ăm mâu kŏng nhân ối, kơpong mâu ngế ki pêi cheăng kơtiê ối, pêi pro tŏng kum tơdroăng vâ kuăn pơlê a mâu kơpong kố hmiân tuăn ối tung pơla pơlê kong kân pêi pro klâ ối krê pơlê pơla.

Tung pơla pêi pro hnoăng cheăng kố cho tung khế 8 ƀă khế 9/2021. Pơlê kong kân xuân pơkâ thế mâu pơlê, krâ, tơring tơkŭm vâ mâu ngế ki châ tŏng kum rĕng châ pâk vaccine.

Katarina Nga tơplôu ƀă tơbleăng