VOV4.Xơ Đăng - Kơxo lơ 20/12, Vi ƀan Măt trâ̆n Tơnêi têa Việt Nam Pơlê kong kân Hồ Chí Minh tơkŭm po leh tơdah kơxô̆ liăn veăng tơlo Liăn “Kum mơngế kơtiê” ing mâu khu pú hên, khu tê mơdró, ngế krê vâ rak ngăn Têt Lo hơnăm nếo Nhâm Dần 2022 ăm kuăn pơlê ai tơdroăng rêh ối pá puât. Môi tuăn kơbông krếo dêi Vi ƀan Măt trâ̆n Tơnêi têa Việt Nam pơlê kong kân Hồ Chí Minh, hên khu tê mơdró mơhé nếo lôu péa, vêh pêt mơjiâng tơmeăm klêi kơ’nâi pơreăng kân laga hiăng kơhnâ veăng tơlo Liăn ‘’Kum mơngế kơtiê’’.

Pơlê kong kân Hồ Chí Minh tơdah vâ chê 56 rơtal liăn kum tơmeăm Têt ăm mơngế kơtiê

A roh leh, Vi ƀan Măt trâ̆n Tơnêi têa Việt nam pơlê kong kân hiăng tơdah tâi tâng kơxô̆ liăn tŏng kum lối vâ chê 56 rơtal liăn ing 2 ngế krê ƀă 20 khu cheăng, khu tê mơdró. Ing kơxô̆ liăn kố, Vi ƀan Măt trâ̆n Tơnêi têa Việt Nam pơlê kong kân kô pêi pro rak ngăn Têt Lo hơnăm nếo Nhâm Dần ăm kuăn pơlê mâu hdroâng kuăn ngo ai tơdroăng rêh ối pá puât; rơpŏng vâ chê kơtiê; mơngế krâ ôh tá ai kuăn ‘nĕng păn roăng; vâi hdrêng kuăn tê xua COVID-19, ƀă hía hé, rêm kơxuô tơmeăm kơnâ 1 rơtuh liăn.

A Sa Ly tơplôu ƀă tơbleăng