VOV4.Sêdang - Khu pơkuâ cheăng Đảng Pơlê kong kân Hồ Chí Minh nếo tơkŭm po hôp trâm mâ tơbâ 46 hơnăm Hâi tơleăng lĕm peăng Hdroh tơnêi têa, môi tuăn tơnêi têa (30/4/1975 – 30/4/2021). A roh hôp trâm mâ, khu râ kăn pơkuâ pơlê kong kân Hồ Chí Minh hiăng tơkŭm po leh diâp inâi tơnêi têa “Jâ nôu Việt Nam khên tơnôu” roh 41 ƀă 14 ngế nôu hiăng ai kơnốu, kuăn hlâ xua tơdroăng tơleăng lĕm hdroâng mơngế, mơjiâng ƀă rak kring Tơnêi têa. 

Pơlê kong kân Hồ Chí Minh trâm mâ tơbâ 46 hơnăm Hâi tơleăng lĕm peăng Hdroh tơnêi têa, môi tuăn tơnêi têa

Xông tơpui a roh leh, pôa Nguyễn Văn Nên, Kăn pơkuâ hnê ngăn cheăng Đảng Pơlê kong kân Hồ Chí Minh tối nhên, tung tơdroăng tơplâ xâ mơjiâng tơnêi têa ƀă rak tơnêi têa dêi hdroâng kuăn mơngế pin, tơdroăng ki kal 30/4/1975 cho môi tung mâu tơdroăng eăng bâ lĕm má môi, cho râ tơnêi têa ƀă lâp plâi tơnêi. Kăn pơkuâ hnê ngăn cheăng Đảng Pơlê kong kân Hồ Chí Minh mơhno tơdroăng ki pâ mơnê, pâ troh mâu ngế hiăng pleăng ivá, mơheăm chhá dêi tơná ăm tơdroăng tơplâ xâ vâ châ tơniăn lĕm  hdroâng mơngế, tơniăn krê ƀă môi tuăn Tơnêi têa, xua hơniâp lĕm dêi kuăn pơlê. 

Tơdroăng kố ôh tá xê ai pơxúa ăm mơnhông khôi túa lĕm vâi krâ nah, nhuô̆m mâu tơdroăng ki kơnâ mơnhông mơdêk mê ối cho roh vâ diâp ăm hiâm mơno pâ nhuô̆m tơnêi têa, tơdroăng rêh ối niân nok,  tơdroăng pói tơngah, tơdroăng mơ-eăm, hbrâ pleăng châ, mơheăm chhá tơná xua Tơnêi têa, xua kuăn pơlê.

Gương tơplôu ƀă tơbleăng