VOV4.Sêdang - Kơxo lơ 30/8, Grup pơkuâ Phương Trang pơtối tŏng kum ăm Pơlê kong kân Hồ Chí Minh lối 2 rơpâu to kế tơmeăm xúa tung khăm pơlât ki rơkê plĕng vâ hbrâ mơdât pơreăng COVID-19. Ki nhên gá, khu kế tơmeăm xúa tung khăm pơlât kố gá hên tung mê ai mâu kơmăi hiâm xâm lấn ki lĕm, 115 toăng kơmăi hiâm HFNC hơ’lâk Oxy hyôh nén điê̆n tưh ƀă tơ’nôm 2 rơpâu toăng kơmăi Oxy lưu lượng cao. Mâu kơmăi hiâm xâm lấn châ xoăng ăm Hngêi pơkeăng 30/4 – Khu xiâm ngăn Kŏng an (Kơpong pơlât ki hên râ COVID-19 Nhà Bè nếo mơjiâng).

Mâu kơmăi hiâm kô kum pơlât ăm mâu ngế ki tâ COVID-19

Mâu kơmăi hiâm, kơmăi pro oxy lưu lượng cao châ chiân troh a mâu tíu khăm pơlât, hngêi pơkeăng lêng ƀă hên tíu ki ê a Pơlê kong kân Hồ Chí Minh vâ kum ăm tơdroăng pơlât ăm mâu ngế ki ta pơreăng COVID-19. Hdrối mê, Grup Phương Trang hiăng roê ‘mot 99 toăng rơxế Toyota 16 to tăng ‘nân rơxông hơnăm 2021 nếo tâi tâng vâ pơ’lêh chiâng rơxế pơlât vâ rĕng tŏng kum pơlât mâu ngế ki tâ pơreăng COVID-19 a Pơlê kong kân Hồ Chí Minh ƀă mâu kong pơlê ki ai kơxô̆ ngế tâ pơreăng, mơdêk tâi tâng troh 325 toăng rơxế ki ai 16 to tăng ‘nân châ hơ’lêh chiâng rơxế pơlât. Sap ing tơdế khế 6/2021 troh nôkố ai lối 500 toăng rơxế dêi Grup kố châ pơtroh rơtế ƀă lối 1 rơpâu ngế ki vê veăng hbrâ mơdât pơreăng COVID-19.

Katarina Nga tơplôu ƀă tơbleăng