VOV4.Sêdang - 3 khế apoăng hơnăm 2021, kơxô̆ kế tơmeăm mơ’no tê ngi kong têa ê dêi kong pơlê Dak Lak châ 95 rơtuh USD, châ 14,6% tâng vâ pơchông ngăn ƀă tơdroăng pơcháu tung hơnăm ƀă kơdroh lối  20% tâng vâ pơchông ngăn rơnó kố hơnăm nah. Môi tung mâu tơdroăng ki xiâm pro kế tơmeăm mơ’no tê ngi kong têa ê dêi Dak Lak chu kơdroh xua ing pơreăng COVID-19 tâ tú tung lâp plâi tơnêi, mâu tuk ki pơto container ôh tá ai kế ki lâi vâ pơtroh tâ kế tơmeăm.

Cho môi tung mâu khu tê mơdró dế trâm pá puât xua ôh tá chiâng vâ tê tơmeăm khoăng ngi kong têa ê, pôa Nguyễn Xuan Lợi, Kăn pơkuâ Kŏng ti tơlo liăn cheăng ƀă mơnhông mơdêk An Thái tối ăm ‘nâi: Nôkố, hên tơmeăm troh hneăng thế pơcháu ăm khu ki rôe laga thế tơkôm troh roh vâ châ tuk pơto chơ. Ôh tá tŭm Container xuân mơdêk yă pơto tơmeăm tâk hên. Ki nhên: yă mâu roh pơto tơmeăm prôk ngi kong têa Mih, lăm châu Âu xuân tâk châ 3 xôh tâng pơchông ƀă hdrối, kơxô̆ liăn pơto lăm mâu kong têa ối tung kơpong peăng mâ hâi lo pá hdroh châu Á xuân tâk 25 – 40%.

“Drêng ôh tá tŭm mơngế pêi cheăng mê tơdroăng pơto thăm trâm pá puât kô chiâng ai hên  tơdroăng pro pá ki ê. Má môi cho hâi khế ‘măn tung hnôu kơxô̆ liăn kô tâk, má péa nếo cho hâi khế ‘măn tung hnôu tuk ton tâ, hâi khế mung mơngế pêi cheăng ton tâ, chiâng pro kơxô̆ liăn pơto xuân tâk. Xua mê, hơnăm kố Khu tê mơdró châ liăn rơkâ kô kơdroh hên ƀă kô thế tăng liăn ki ê vâ tơ’nôm a tíu ki tro lŭp mê’’.

Xuân trâm  tơdroăng tiah mê, pôa Lê Đức Huy, Kăn Phŏ pơkuâ Kŏng ti pêi cheăng tiô  rơnó môi khu tê rôe tơmeăm ngi kong têa ê lơ 2/9 Dak Lak tối ăm ‘nâi, pái khế apoăng hơnăm kố, 2 tơmeăm tê ngi kong têa ê dêi Kŏng ti cho tiu ƀă kơphế pơrá kơdroh, kơdroh troh 60% tâng pơchông ƀă hơnăm nah. Khu tê mơdró thế pơtê lôi hên tơmeăm troh ing khu tơrŭm tê mơdró châu Âu xua ôh tá tăng châ tuk vâ pơto. 

Kŏng nhân Kŏng ti pêi cheăng tiô rơnó tê rôe tơmeăm khoăng ngi kong têa ê lơ 2/9 Dak Lak tâ tơmeăm tung hnôu hngíu hdrối vâ tê ngi kong têa ê

Thăm nếo mâu tơdroăng tơkêa hiăng kĭ sap ing ton nah mê nôkố xuân tung  tơdroăng tơmeăm ối pakong kơno tuk tơkôm troh roh vâ pơto tung tuk.

“Sap a mơ’nui hơnăm 2020 apoăng hơnăm 2021 ƀă troh nôkố hnôu ki chôu ‘măn tơmeăm ôh tá ai a mâu kong têa Châu Á xua mê chiâng pro kơxô̆ liăn tuk pơto lăm mâu kong têa châu Á lăm troh a kong têa Mih ƀă châu Âu tâk iâ cho 4 xôh, hên cho 6 xôh. Tơmeăm ki ai hlâu, mơngế ki rôe xuân kal tơmeăm, mê drêng séa ngăn kơxô̆ liăn pơto dêi tuk mê péa pâ pơrá ôh tá môi tuăn, chiâng lăm tê vêh chôa ‘lâng, tâng ôh kô tro lŭp hên, ôh tá tăng liăn vâ tơ’nôm amê, ai mâu tơmeăm vâ hrá sap ing pái khế apoăng hơnăm troh pái khế pơtối nếo’’.

Pôa Huỳnh Ngọc Dương, Kăn Phŏ pơkuâ Khu pơkuâ kơmăi kơmok – tê mơdró kong pơlê Dak Lak tối ăm ‘nâi, kong pơlê nôkố ai 21 khu tê mơdró tê tơmeăm khoăng ngi kong têa ê. Tung pái khế apoăng hơnăm, pêi lo liăn tê tơmeăm khoăng ngi kong têa ê dêi kong pơlê bu pêi pro 95 rơtuh dollars, châ 14,6% pơkâ hơnăm ƀă kơdroh lối 20% tâng pơchông ƀă roh kố hơnăm 2020.

Xua tê tơmeăm khoăng ngi kong têa ê troăng têa kơxĭ trâm pá, vâ tŏng kum khu tê mơdró, Khu pơkuâ kơmăi kơmok – tê mơdró kong pơlê Dak Lak dế thăm pêi pro mâu tơdroăng tơdjêp, po rơdâ kong têa ki rôe, tơkŭm xúa kŏng ngê̆ thong tin tê mơdró điê̆n tưh ăm khu tê mơdró. Tơdrêng amê, pêi cheăng ƀă Kơ koan xiâm tê rôe tơmeăm khoăng ngi kong têa ê (ối tung Khu xiâm pơkuâ kơmăi kơmok – tê mơdró) tơkŭm po tơdroăng mơhnhôk tê mơdró vâ mâu khu tê mơdró tê tơmeăm ngi kong têa ê dêi kong pơlê châ achê ƀă mâu ngế tơpui kâ tê mơdró kong têa ê xuân môi tiah mâu tíu xiâm tơkŭm po cheăng kâ roê tơmeăm ngi kong têa ê vâ rơtế dêi pó ti tăng troăng prôk tơtro:

“Ngin xuân hiăng pêi cheăng ƀă tâi tâng mâu Khu pơkuâ tê mơdró – tê mơdró drô tíu tơkăng kong peăng Kơnhŏng tơnêi têa ing mê vâi kô tơbleăng tơdroăng, mâu tơdroăng teăm tơdrêng vâ hbrâ tơmeăm khoăng tung kố. Ki ê nếo nôkố ngin xuân hiăng tơpui ƀă mâu khu tê mơdró a mâu tíu tê mơdró ngi kong têa ê vâ vâi hbrâ tŏng kum ăm khu tê mơdró kong pơlê Dak Lak mung hnôu, tŏng kum xoi tơmeăm tâng lơ tơdroăng ki chôm tung tơdroăng pơcháu tơmeăm khoăng a tíu tê mơdró ngi kong têa ê’’ .

Nam Trang chêh

A Sa Ly tơplôu ƀă tơbleăng