VOV4.Sêdang - Kơxô̆ ăm riân ngăn dêi Tíu xiâm Hbrâ mơdât châi tamo kong pơlê Dak Lak ăm hlo, sap ing apoăng hơnăm troh nôkố, lâp kong pơlê ‘nâi ai 314 ngế tâ pơreăng thĕn kŏng chêng rơkong, tâk vâ chê 3,5 hdroh tâng vâ pơchông ƀă khế kố hơnăm 2020, tung mê ai môi ngế hlâ.

Kơxô̆ mơngế tâ tú a lâp lu a tâi tâng 15 tơring, pơlê kong krâm, pơlê kong kơdrâm ƀă tâk rĕng tung mâu măng tĭng achê kố rêm măng tĭng vâ chê 40 ngế tâ ki nếo.

Tíu xiâm hbrâ mơdât châi tamo kong pơlê ăm ‘nâi, vâ hbrâ rơnáu hbrâ mơât pơreăng thê̆n kŏng chêng rơkong, kuăn pơlê kal pêi pro tơdroăng a kơ’nâi kố: jíu kŏng đi đo, hên hdroh tung hâi ƀă kơƀŏng a klŏng têa ki lo. Malối cho drêng vâ pế pế pơchên kế kâ, hdrối vâ ăm vâi hdrêng kâ kế, hdrối băng vâi ‘nĕng pơyâng lơ truâ hmân ếo tah ăm kuăn ‘nĕng, mơgrúa ăm vâi hdrêng.

Tơdrêng amê hnối pêi pro tro tơdroăng ki xếo krúa mâu kế ki dâ kế kâ, kế ki xúa rêm hâi môi tiah tơmeăm xah hêi, kế tơmeăm hriâm tâp, kŏng kuâ a péa, kŏng kuâ a kông, trêi hngêi, kơ-ƀăng, tăng ƀă têa kơdê pơreăng.

Kat arina Nga t ơplôu ƀ ă t ơble ăng