VOV4.Sêdang - Kăn teăng mâ Việt Nam a Lếo nếo tơbleăng ‘na tơdroăng ki pơtê pơtân tơdroăng ki mot tung Việt Nam ƀă mâu ngế ki lăm sap ing Lếo, troh tâi hâi lơ 30/5/2021. Hdrối tơdroăng kố to lâi hâi, ai mâu kuăn pơlê pâ phêp mot sap ing Lếo vêh Việt Nam hiăng tro mâu bo cheăng Việt Nam mơdât, ôh tá ăm mot, kăn teăng mâ Việt Nam a Lếo ăm ‘nâi: tơdroăng kố cho pêi pro hnoăng cheăng sap ing Ƀơrô cheăng Chin phuh tơnêi têa Kŏng hòa xah hô̆i chuh ngiah Việt Nam ‘na tơdroăng “pơkâ thế pơtê pơtân tâi tâng mâu ngế ki pâ lăm sap ing mâu kong têa Ấn Độ, Siam, Kul, Lếo mot tung tơnêi têa pin sap nôkố troh tâi hâi lơ 30/5/2021.

Mâu ngế ki hiăng chêh inâi hdrối hâi lơ 28/4/2021 xuân ối chiâng phêp mot tiô pơkâ. Ƀă mâu ngế ki pâ mot a Việt Nam, athế ai tơdroăng ki môi tuăn ăm phêp dêi Khu xiâm tơpui kâ Việt Nam ƀă pêi pro tŭm troăng hơlâ hnê mơhno dêi Khu xiâm ngăn pơkeăng”. Kăn teăng mâ pơkâ thế kuăn pơlê Việt Nam dế rêh ối, pêi cheăng ƀă hriâm tâp a Lếo pêi pro kơtăng pơkâ dêi Lếo ƀă dêi Việt Nam ‘na hbrâ mơdât pơreăng COVID-19; pôi tá lo ing tíu ối drêng ôh tá ai tơdroăng kal pêi pro tơdrêng; pôi tá hmôu pơ troh xêh a bo cheăng drêng tá hâi châ ăm phêp vêh ngi tơnêi têa, ah kô pro tơpá ăm mâu khu ki ai tơdjâk troh pêi dêi hnoăng cheăng.

Katarina Nga tơplôu ƀă tơbleăng