VOV4.Sêdang - Kơxo lơ 7/4, pôa Phạm Minh Chính, Ngế pro xiâm hnê ngăn tơnêi têa hiăng pơtroh ăm Kuô̆k hô̆i kĭ pơkâ tơdroăng ki ôh tá xo xếo ƀă môi Ngế pro xiâm hnê ngăn Chin phuh, ƀă mâu kăn xiâm pơkuâ ƀă mâu ngế cheăng ki ê dêi Chin phuh. Tiah mê, Kuô̆k hô̆i séa ngăn kĭ pơkâ tơdroăng ki thâ pơtê ƀă pôa Trịnh Đình Dũng, Ngế pro xiâm phŏ hnê ngăn tơnêi têa, mâu kăn xiâm pơkuâ ƀă kăn xiâm pơkuâ kơ koan tơnêi têa.

Pôa Trịnh Đình Dũng, Ngế pro xiâm phŏ hnê ngăn tơnêi têa

Pơkâ mâu ngế cheăng tung Chin phuh hneăng hơnăm Kuô̆k hô̆i hneăng má 14 ai 27 ngế, mê cho: Ngế pro xiâm hnê ngăn Chin phuh, 5 Ngế pro xiâm phŏ hnê ngăn Chin phuh ƀă 21 ngế kăn xiâm pơkuâ, kăn pơkuâ mau kơ koan Tơnêi têa. A rôh khu kăn lâp tơnêi têa rôh má 13 kố nah, ai 9 ngế cheăng tung Chin phuh ôh tá veăng tung Tíu xiâm tơnêi têa hneăng má 13, tung mê, ai 8 ngế ki vêh châ pôk xếo xua hiăng tâi hơnăm pêi cheăng.

Klêi kơ’nâi mâu kăn Kuô̆k hô̆i tơpui a Khu ‘na tơdroăng kố, Kuô̆k hô̆i pêi pro tơdroăng kĭ pơkâ tơdroăng ki thâ pơtê ƀă pôa Trịnh Đình Dũng, Ngế pro xiâm phŏ hnê ngăn Chin phuh ƀă mâu kăn pơkuâ ƀă mâu kăn cheăng ki ê tung Chin phuh tiô túa ki tâ phĭu pơkí.

Klêi mê, Ngế pro xiâm hnê ngăn Chin phuh pơtroh inâi vâ Kuô̆k hô̆i kĭ pơkâ tơdroăng ‘mot mâu ngế cheăng teăng ăm mâu tíu cheăng ki nếo tối a kơpêng.

Katarina Nga tơplôu ƀă tơbleăng