VOV4.Sêdang - Tíu on tơhrrik ki apoăng tâi tâng 28 to trăng a hngêi kơmăi on tơhrik kơtâu ƀă hyôh khía Dak N’Drung 1, ai ivá mơ’no 50MW, châ tơbleăng pro ƀê tông a kơmăng lơ 30/3. Kố cho 1 tung 6 tơdroăng tơkêa mơdêk bro on tơhrik kơtâu ƀă khía châ Vi ƀan kong pơlê Dak Nông kĭ hiăng châ mơjiâng pro.

Khế 10/2020, tơdrốu tơdroăng kơtêa bro on tơhrrik kơtâu ƀă khía hiăng châ Vi ƀan hnê ngăn kong pơlê Dak Nông vâ môi tuăn tiô troăng hơ’lâ ‘no liăn mơjiâng pro. 

Tâi tâng ivá dêi 6 tơdroăng tơkêa bro ai 430 MW, xuân châ pro a tơring Dak Song, tơring châ tối ai liăn mơjiâng pro vâ mơnhông tơ-ƀrê ‘na on tơhrrik mê.  Vâ mơnhông on tơhrrik ki kố, tâi tâng kơlo liăn ‘no mơjiâng pro 6 tơdroăng tơkêa nếo tối kơpêng mê vâ chê 15.000 rơtal liăn.

Tiô tối hdrối, troh mơ’nui hơnăm 2021, 6 tơdroăng tơkêa mê xuân châ xúa mơ’no, kô veăng mơ’no on tơhrrik ‘mot a troăng kơxái on tơhrik tơnêi têa, xuân môi tiah pro tâk ki tơniăn ăm troăng on tơhrrik kong pơlê Dak Nông.

Gương tơplôu ƀă tơbleăng