VOV4.Sêdang - Kơxo lơ 14/4, a Hà Nội, Rôh po kơchơ tê mơdró kong têa ê Việt Nam rôh má 30 (VIETNAM EXPO 2021) hiăng châ tơkŭm po. Rôh po kơchơ kố tơ’mot 320 khu mơdró kâ tung tơnêi têa ƀă kong têa ê veăng tơbleăng tê kế tơmeăm ƀă tơdjêp tê mơdró.

Po tung pơla 4 hâi, sap ing nôkố troh lơ 17/4, Vietnam Expo cho rôh po kơchơ kong têa ê pơxiâm dêi hơnăm 2021, ai tơdroăng ki veăng tơbleăng mơđah hên kế tơmeăm dêi mâu khu mơdró kâ kong têa ê hŏng túa pơkâ kơbong mơđah sap ing hngế dêi mâu kong têa môi tiah: Mih, Nhuk, Alơmăng, Rusi, Sinuâ, Hàn Quốc ƀă hên kong têa ki ê.

Rôh po kơchơ Vietnam Expo rôh má 30 kố ai inâi “Vietnam Expo – Rơtế ƀă khu mơdró kâ tung chal nếo kơxô̆”. Ki rơhêng vâ tối dêi Rôh po kơchơ rôh kố cho xúa túa mơđah tơbleăng tơkŭm, tiô túa ki po mâu kơbong mơđah tơbleăng kế tơmeăm pơla mâu kế tơmeăm ki tơbleăng sap ing hngế, tơrŭm tê mơdró ‘no tơdrêng ing um tơvi.

Katarina Nga tơplôu ƀă tơbleăng