VOV4.Sêdang - Kơxo lơ 27/4, a Hngêi hôp Kuô̆k hô̆i, pơxiâm po Rôh hôp má 55 dêi Vi ƀan pơkuâ Kuô̆k hô̆i. Po tung 1 hâi, rôh hôp kố Vi ƀan pơkuâ Kuô̆k hô̆i ăm rơkong veăng tơpui tối ki apoăng ‘na tơdroăng ki hbrâ ăm rôh hôp má môi, Kuô̆k hô̆i hneăng má 15. Vi ƀan pơkuâ Kuô̆k hô̆i séa ngăn, pơkâ ‘na túa ki xúa kơdĭng tung hrê kơxô̆ liăn ki u ối dêi hngêi rak liăn tơnêi têa hơnăm 2020.

Mơnhên tối klêi kơ’nâi rôh hôp má 11, Kuô̆k hô̆i hneăng má 15. Séa ngăn, pơkâ tơdroăng ki pơtối xúa kơxô̆ liăn ki u ối dêi Tơdroăng pơkâ kơxô̆ 324 dêi Vi ƀan pơkuâ Kuô̆k hô̆i hneăng má 14 vâ ‘no mơjiâng pro mâu tơdroăng tơkêa Kơ koan teăng mâ Việt Nam a kong têa ê tung hơnăm 2021 – 2025. Séa ngăn, pơkâ tơdroăng ki ‘mot tơ’nôm kơxô̆ liăn roê tơ’nôm vaccine, trếo pơkeăng kơdê pơreăng ƀă hdrê loăng pêt tơnêi têa.

Xuân a rôh hôp kố, Vi ƀan pơkuâ Kuô̆k hô̆i séa ngăn, pơkâ tơdroăng ki mơjiâng, ‘mâi rơnêu tơnêi tơníu a mâu tíu pêi cheăng chêh pro hlá mơ-éa a 5 to kong pơlê, pơlê kong kân cho Hà Nội, Thừa Thiên Huế, Thanh Hóa, Đồng Nai, Tuyên Quang.

Katarina Nga tơplôu ƀă tơbleăng