VOV4.Sêdang - Kơxê lơ 27/4, tung tơdroăng Khu tơrŭm tê mơdró lâp plâi tơnêi (WTO), roh séa ngăn troăng hơlâ tê mơdró roh má 2 dêi Việt Nam châ Khu xiâm pơkuâ kơmăi kơmok tê mơdró tơkŭm po mơ’no tơdrêng tung um tơvi. Teăng mâ Khu pêi cheăng Việt Nam, pôa Trần Quốc Khánh – Ngế xiâm phŏ pơkuâ kơmăi kơmok – tê mơdró hiăng tối mâu tơdroăng châ tơƀrê ƀă ki má môi dêi Việt Nam sap ing roh séa ngăn troăng hơlâ tê mơdró roh apoăng a hơnăm 2013, tơdrêng amê tối nhên, tơdroăng mơ-eăm pơtối mot tơrŭm tŭm têk, trâu hơngế, hơ’leh cheăng kâ xuân môi tiah pêi kơtăng mâu tơdroăng tơkêa lâp plâi tơnêi.

A roh hôp, mâu kăn teăng mâ dêi Khu xiâm ngăn ‘na tê mơdró lâp plâi tơnêi - WTO xuân hiăng mơnhên tơdroăng mơnhông dêi  tơdroăng cheăng kâ Việt Nam, tơdrêng amê ai mơ’no mâu tơdroăng kơ-êng vâ kăn teăng mâ peăng Việt Nam tiâ, môi tiah: ‘na tíu cheăng kâ Việt Nam, luât tê mơdró ƀă mơ’no liăn cheăng, mâu troăng hơlâ tê mơdró ‘na pơkâ xo hnoăng mơhá kơjo, hbrâ kring vế tê mơdró, pơkuâ tuăn ngôa rơkê, rôe tơmeăm Chin phuh, troăng hơlâ mơnhông mâu kơvâ ki xiâm môi tiah pêi chiâk deăng, ká xi xŏng, on tơhrik, kơmăi kơmok, troăng klông, troăng hyôh phôn ƀă internet ƀă hía hé.

A Sa Ly tơplôu ƀă tơbleăng