VOV4.Sêdang - Ƀơrô Kuô̆k hô̆i tơbleăng tối ăm ‘nâi, hâi lơ 15/3/2021, Roh hôp má 54 dêi Vi ƀan pơkuâ Kuô̆k hô̆i kô tơkŭm po a Ƀơrô hôp Tân Trào, Hngêi Kuô̆k hô̆i, pơlê kong xiâm Hà Nội. Jâ Nguyễn Thị Kim Ngân, Kăn xiâm hnê ngăn Kuô̆k hô̆i xông tơpui pơxiâm po hneăng hôp ƀă rơtế mâu Kăn xiâm phŏ hnê ngăn Kuô̆k hô̆i teăng dêi pó pơkuâ tơdroăng xiâm roh hôp.

Tiô tơdroăng tối hdrối, Vi ƀan pơkuâ Kuô̆k hô̆i kô hôp vâ séa ngăn, tơpui ‘na tơbleăng mơgêi tơdroăng pêi cheăng hneăng má XIV dêi Kuô̆k hô̆i, Vi ƀan pơkuâ Kuô̆k hô̆i; tơbleăng tơdroăng châ tơƀrê séa ngăn tơdroăng tơleăng pâ thế dêi kuăn pơlê pơtroh hneăng hôp má 10, Kuô̆k hô̆i hneăng má XIV; tơbleăng tơmâng xo rơkong tơpui, pâ thế dêi kuăn pơlê ƀă kuăn pơlê pơtroh Hneăng hôp má 11, Kuô̆k hô̆i hneăng má XIV; tơpui chêh tung mơ-éa ƀă mâu tơbleăng mơnhên tơ’nôm tơdroăng châ tơƀrê pêi pro pơkâ mơnhông mơdêk cheăng kâ – rêh ối pơlê pơla ƀă liăn ngân tơnêi têa hơnăm 2020.

A roh hôp, Vi ƀan pơkuâ Kuô̆k hô̆i tơpui ‘na tơdroăng rah xo mâu kăn pêi cheăng vâ tơbleăng Kuô̆k hô̆i.

A Sa Ly tơplôu ƀă tơbleăng