VOV4.Xơ Đăng - Măng tĭng hdrối, hiăng po Hneăng hôp ôh tá tiah hmâ dêi Kuô̆k hô̆i hneăng má 15 tiô tơdroăng ki ‘no tơdrêng ing troăng hyôh Internet troh a 62 to tíu tơdjêp a mâu kong pơlê, pơlê kân. Hneăng hôp kố cho vâ rĕng séa ngăn, tơleăng mâu tơdroăng tŏng kum tơdrêng ăm Tơdroăng ki hbrâ mơdât pơreăng COVID-19 ƀă Tơdroăng ‘mâi mơnhông ƀă mơdêk cheăng kâ rêh ối pơlê pơla.

 Tơdroăng ki kal apoăng châ mâu kăn Kuô̆k hô̆i tơkŭm tơpui tơno a hneăng hôp oh tá hmâ dêi Kuô̆k hô̆i (hneăng 15) mê cho: séa ngăn tơbleăng pơkâ ‘na troăng ‘na luât pơkâ tŏng kum tài khóa, liăn ngân vâ kum tơbleăng Tơdroăng ‘mâi mơnhông ƀă mơdêk cheăng kâ, rêh ối. Pơkâ mê ai pơxúa khât vâ hbrâ ví ƀă pơreăng COVID-19, tơkâ luâ xơpá ki tro lŭp, ‘mâi mơnhông ƀă mơdêk cheăng kâ rêh ối, ‘mâi mơnhông tơdroăng tăng mơngế pêi cheăng, kum ‘na tơdroăng rêh ối, pro pơxúa ăm pơlê pơla. Kố xuân cho tơdroăng châ kuăn pơlê tung lâp tơnêi têa tơmâng. Nguyễn Văn Huy, kuăn pơlê ki ối a pơlê kong kơdrâm Yên Bái, kong pơlê Yên Bái tối:

‘’A phiu ro châ ‘nâi hneăng hôp rôh kố dêi Kuô̆k hô̆i tơbleăng hên tơdroăng ki kal, malối mâu tơdroăng ki tơdjâk troh pơreăng COVID-19. Cho môi ngế kuăn ngo,  a hlo hnê mơhno tro ‘nâng, teăm tơdrêng dêi Kuô̆k hô̆i, Chin phuh tung tơdroăng hbrâ mơdât pơreăng, malối cho tơdroăng pơ’lêh troăng rơhâ hbrâ mơdât pơreăng chiâng tơdroăng ki hmâ tơniăn, rơkê ƀeăn, hlối séa ngăn châ tơ-ƀrê COVID-19.

Á xuân púi vâ  tung la ngiâ Kuô̆k hô̆i, Chin phuh ai pơkâ luât séa ngăn, tí tăng ngăn nhên khât tâ nếo vâ tơbleăng mâu Pơkâ, Tơdroăng tơkâ luâ ki tro lŭp, ‘mâi mơnhông cheăng kâ-rêh ối, tơleăng mơnhên mâu tơdroăng ‘na tơniăn rêh ối, pơlê pơla’’.

Hôp tơpui tơno a Hngêi pêi cheăng Kuô̆k hô̆i

‘Na ki pêi pro tơdrêng dêi hneăng hôp ôh tá hmâ kố, pôa Bùi Văn Cường, Ngế chêh tôm xo rơkong, Ngế pơkuâ ƀơrô Kuô̆k hô̆i  ăm ‘nâi: Vâ veăng ‘mâi mơnhông, mơdêk cheăng kâ rêh ối - pơlê pơla, hneăng hôp ôh tá hmâ  po vâ ai mâu pơkâ teăm tơdrêng ‘na tài khoă, liăn ngân vâ kum tơbleăng ‘mâi mơnhông ƀă mơnhông cheăng kâ rêh ối, tơleăng mơnhên mâu tơdroăng pá tơvâ tơvân tung ‘no liăn mơjiâng tơmeăm khoăng:

’’Hneăng ki kố cho pêi tơdrêng xua pin dế kal thế ai môi pơkâ ki tơdjâk troh ‘mâi mơnhông ƀă mơdêk cheăng kâ. Xua mê liăn ngân cho kal khât vâ ’mâi mơnhông cheăng kâ. Tâng châ tơbleăng vâ môi tuăn a mâu hâi apoăng hơnăm 2022 mê kô mơdêk ki tâk hơnăm 2022-2023 ƀă mâu tơdroăng tung hơnăm ton ta troh tâi hneăng. Mê cho mâu tơdroăng ki kal, pêi tơdrêng. Tâng vâ troh rôh hôp má 5 mê kô hrá 5 khế nếo chiâng pơkâ’’.

Rôh hôp drêng kố, Kuô̆k hô̆i xuân séa ngăn, tơbleăng 8 tơdroăng tơkêa luât mê cho: Luât ‘mâi hơ’lêh, tơ’nôm mâu tơdroăng luât ‘no liăn pêi cheăng mơjiâng tơmeăm khoăng tơnêi têa, Luât ‘no liăn mơjiâng tơmeăm khoăng tiô troăng rơhlâ tơrŭm pơla tơnêi têa ƀă khu mơdró kuăn pơlê, Luât ‘no liăn cheăng, Luât pơkâ yă mơjiâng tơmeăm khoăng, Luât on tơhrik, Luât Khu mơdró, Luât pro hnoăng mơhá tê rôe tơmeăm ki tơviah ki phá xêh ƀă Luât tơleăng mơnhên tơbriât tơmeăm khoăng.

Veăng tơpui tơno mơ’no tiô troăng hyôh Internet a rôh hôp, khu kăn Kuô̆k hô̆i  kong pơlê Dak Lak môi tuăn vâ ‘mâi rơnêu tơ’nôm mâu tơdroăng dêi 8 luât kô pơ’lêh tŭm tâi tâng mâu troăng rơhlâ pơkâ dêi Đảng ƀă teăm tơkâ luâ mâu tơdroăng pá, tơvâ tơvân ki nếo ai tung rêh ối. Veăng hnê tối ‘na Luât ‘no liăn cheăng mơjiâng tơmeăm khoăng tơnêi têa, pôa Y Vinh Tơr, Ngế pơkuâ khu kăn Kuô̆k hô̆i  kong pơlê Dak Lak môi tuăn ƀă 3 tơdroăng pơkâ thế ‘mâi hơ’lêh, la pôa thế tơmâng khât tâ nếo troh tơdroăng xoăng khu râ, xoăng hnoăng cheăng pơkuâ ƀă hnoăng cheăng pêi pôu râng ƀă mâu tơdroăng tơkêa ai xúa liăn ODA.

’’ Tơdroăng tơdjâk troh tơdroăng púi vâ dêi tơnêi têa pơla mâu tơnêi têa ƀă mâu Chin phuh Việt Nam ƀă peăng kĭ tơhrâ dêi mâu kong têa ê, mâu tơdroăng chêh tơdjâk troh pêi pro mâu tơdroăng pơkâ mê. Tâng ôh tá tối nhên mâu hnoăng pêi pro dêi Khu xiâm, kơvâ cheăng, kong pơlê mê tung pơla pêi pro ai mâu tơdroăng xôi, malối xôi tơdjâk troh mơjiâng pro ki tơ-brê kô tơdjâk kân troh ki loi nhoăm dêi Việt Nam tung tơdroăng tơrŭm cheăng’’. 

Tơmâng khât troh Luât tơleăng mơnhên tơbriât tơmeăm khoăng, nâ Nguyễn Thị Thu Nguyệt tối tiah kố, luât kal mơnhên tâ ‘na mâu luât pơkâ ki pơcháu ăm:

’’A troăng 55 mê tơdroăng pơkâ ‘mâi pơ’lêh nếo inâi tơdroăng luât ƀă ‘’ ngế ki pin pơcháu ăm thế tơleăng mơnhên ƀă pơcháu ăm gá ‘na tơleăng mơnhên tơbriât tơmeăm khoăng’’, tung mê hâi chêh nhên luât pơkâ ‘na tơleăng mơnhên ăm ngế ki pin pơcháu kơ gá tơleăng mơnhên tơdroăng tơbriât tơmeăm khoăng ƀă luât pơkâ ‘na pơcháu ăm gá tơleăng mơnhên tơmeăm khoăng ki tơbriât pơrá phá ‘na tíu ki lâi? Tiah mê pâ thế Chin phuh kal ai pơkâ nhên tâ luât pơkâ pơcháu ăm tơleăng mơnhên tơmeăm khoăng ki tơbriât mê môi tiah lâi ăm inhên, tơdah hleăng lĕm’’.

Mâu kăn Kuô̆k hô̆i kong pơlê Dak Lak hnê tối mâu tơdroăng ki ‘mâi rơnêu, tơ’nôm 8 Luât

Môi tơdroăng kal ki ê châ Kuô̆k hô̆i  séa ngăn, tơbleăng rôh kố cho Pơkâ ‘na Tơdroăng ‘no liăn mơjiâng tơmeăm khoăng Tơkêa pro mơjiâng troăng kân tơdrăng lĕm ing peăng Kơnhŏng - peăng Hdroh peăng mâ hâi Lo pơla hơnăm 2021-2025. Pôa Vương Đình Huệ, Kăn xiâm hnê ngăn Kuô̆k hô̆i tối nhên, troăng prôk cho xiâm dêi tơdroăng cheăng kâ, veăng po troăng tăng xiâm, mơnhông mơdêk cheăng kâ - rêh ối, kring tơniăn ‘na cheăng lêng- kring tơniăn tơnêi têa; mơnhông tơrŭm mơjiâng troăng prôk cho tơdroăng cheăng pêi ki kal.

Tung pơla nôkố, tơdroăng rĕng tơbleăng pêi tơdroăng tơkêa bro rế ai pơxúa khât, mơdêk châ xo liăn vâ mơjiâng pro tơmeăm khoăng tơnêi têa, veăng ‘mâi mơnhông ƀă mơdêk cheăng kâ.

Quốc Học rah chêh

Gương tơplôu ƀă tơbleăng