VOV4.Sedang - Vâ tŏng kum hok tro ƀă nôu pâ hok tro tung hneăng tơ’noăng mơgêi râ má pái hơnăm 2021, roh pêi pro tơdroăng kum rơnó tơ’noăng hơnăm kố kô tơkŭm po sap hâi lơ 6/7 troh 9/7. Kố cho tơdroăng a roh hôp khu chêh hlá tơbeăng xua Khu xiâm pơkuâ sinh viên Việt Nam, Khu xiâm pơkuâ hnê hriâm ƀă hnê mơjiâng tuăn ngôa rơkê, Grup pơkuâ Thiên Long tơkŭm po hâi lơ 27/5. Tơdroăng ‘’Kum rơnó tơ’noăng’’ châ tơkŭm po a tâi tâng tíu tơ’noăng dêi hneăng tơ’noăng mơgêi râ má pái phôh thong hơnăm 2021 pro a 63 kong pơlê, pơlê kong kơdrâm.

Pơtối mê, Khu tơkŭm po kô tơkŭm tung tơdroăng pơtâng tối, tơbleăng mâu troăng hriâm mơ’no tơdrêng tung um tơvi ki loi tơngah ƀă tơbleăng mâu video hriâm tâp, hriâm vâ tơ’noăng mơgêi râ má pái phôh thong tung mâu ƀâng um tơvi.

Pakĭng mê, pêi pro mâu troăng pleăng hnoăng cheăng mơ’no tơdrêng tung um tơvi ing kŏng thông tin mơ’no tơdrêng, tơrŭm pơla mâu ngế ki pleăng hnoăng cheăng ƀă mâu hok tro kal tŏng kum; mơjiâng troăng tŏng kum ƀă hok tro ai tơdroăng rêh ối pá puât a kơpong hơngế hơngo, tíu tơkăng kong, rơlố, kơpong ki pá puât.

A Sa Ly tơplôu ƀă tơbleăng