VOV4.Sedang - Pôa Bùi Văn Cường, Ngế xiâm chêh tôm xo rơkong Kuô̆k hô̆i, Kăn cheăng tung ƀơrô Hô̆i đong tâ phĭu Tơnêi têa tối hneăng tâ phĭu rah xo khu kăn Kuô̆k hô̆i drêng kố hneăng 15 ƀă kăn hnê ngăn Hô̆i đong hneăng 2021-2026 hiăng klêi tơniăn. Kơxô̆ kuăn pơlê lăm tâ phĭu tung lâp tơnêi têa 95, 65%, kong pơlê ki tâ phĭu hên châ 99,92%, kong pơlê ki iâ tâ 84%.

Tơdroăng kố châ mơhno a kơxô̆ kuăn pơlê lăm tâ phĭu tung lâp tơnêi  têa, ing kơpong tơbăng troh kong ngo, ing kơphô̆ troh tung thôn pơlê, lăm tâ phĭu pêi pro hnoăng cheăng tơná. Tơdroăng loi nhoăm a Đảng, Tơnêi têa xuân môi tiah kuăn pơlê rah xo mâu ngế ki tơná hlo loi nhoăm kơ mâu kơ koan xiâm dêi tơnêi têa, kơ koăn xiâm dêi Kuô̆k hô̆i xuân môi tiah Hô̆i đong rêm râ. Môi tơdroăng phiu ro, tơrŭm môi tuăn, rơtế ƀă dêi rơpó ƀă môi tơdroăng loi a ngế pơkeăng hnê mơhno dêi Đảng, Tơnêi têa.

Rơtế ƀă lâp tơnêi têa, lối 4 rơtuh ngế kuăn pơlê tâ phĭu a mâu kong pơlê Tây Nguyên hiăng lăm tâ phĭu rah xo kăn teăng mâ Kuô̆k hô̆i hneăng má XV, Hô̆i đong kuăn pơlê mâu râ hneăng hơnăm 2021 – 2026. Roh tâ phĭu hiăng tơkŭm po phiu ro. Hên kơpong tâ phĭu hiăng rĕng châ 100% kuăn pơlê tâ phĭu lăm tâ. Ƀă tơdroăng hbrâ rơnáu nhên, xua mê, mơhé hên pơlê ối a kơpong hơngế hơngo, troăng prôk ‘mêi ‘mâk, laga tơdroăng tâ phĭu a mâu kong pơlê kơpong Tây Nguyên xuân tơkŭm po phiu ro a hâi leh kân.

Kuăn pơlê Tây Nguyên ƀă hâi lăm tâ phĭu

Tá a kơpong klâ kơtăn COVID 19, tíu mơdât ôh tá ăm mot xua ai pơreăng, mê kuăn pơlê xuân phiu ro pêi pro hnoăng cheăng dêi kuăn pơlê tơná. Tâ phĭu a Tây Nguyên tơkŭm po rak tơniăn tơ’lêi hlâu. Hên mâu kong pơlê a Tây Nguyên hiăng mơnhên kuăn pơlê lăm tâ hên, môi tiah a Lâm Đồng, ai 5/12 tơring, pơlê kong kơdrâm châ lối 80% kuăn pơlê lăm tâ phĭu. Cát Tiên, tơring hơngế hơngo má môi châ lối 90%. A Dak Lak, tơring Čư Kuin, ai 100% kuăn pơlê lăm tâ phĭu.

Gương tơplôu ƀă tơbleăng