VOV4.Sêdang - Tơdroăng ‘na hdroâng kuăn ngo ƀă tơdroăng cheăng ‘na kuăn ngo đi đo ai tíu ki kal tung tơdroăng cheăng mơjiâng ƀă kring vế tơnêi Têa. Mâu hơnăm hdrối nah, kơnôm liăn ngân dêi Tơnêi têa, mâu khu mơdró, khu tơrŭm cheăng, mâu ngế, ngiâ méa thôn pơlê, malối cho kơpong hdroâng kuăn ngo hiăng pơ’lêh tơ ê. Mâu troăng  prôk hiăng pro kêi, veăng kum tơdjêp troăng prôk pơla mâu pơlê tơ’lêi hlâu tâ, tê mơdró mơnhông tơ-brê tâ. Laga, tâng vâ pơchông ngăn ƀă mâu kơpong ki ê, kơpong hdroâng kuăn ngo xuân ai troăng prôk ki ôh tá lĕm, tơdrêng ƀă tơdroăng pá ‘na troăng prôk mê chiâng pá vâ mơnhông mơdêk rĕng, krá tơniăn. Tơdroăng ‘na pro troăng prôk a tơring hngế hngo Mù Cang Chải (kong pơlê Yên Bái) kô mơhno nhên ‘na tơdroăng mê.

Tối ‘na troăng klông dêi cheăm tơná, pôa Sồng A Trống, Kăn hnê ngăn Vi ƀan cheăm Chế Tạo, tơring Mù Cang Chải, kong pơlê Yên Bái tối:

‘’Cheăm Chế Tạo cho cheăm ki pá puât má môi ‘na troăng prôk lăm. Xua tơnêi tơníu dêi cheăm rơnâk ó ƀă tơdroăng mơ’no liăn dêi tơnêi têa iâ. Mơhé cheăm xuân châ mơ’no liăn hên laga xuân tá hâi châ tơƀrê hên. Troăng ô tô mê nếo troh tíu xiâm cheăm tê. Ki ê tâi tâng mâu pơlê mê troăng ô tô tá hâi troh. Troăng ing kố troh tơdế kơpong 2 ai 17 km, nôkố rơnó khăng khoăng prôk dâng 1 chôu ƀă tâng kong mêi prôk dâng môi chôu 30 phut. Ƀă hdrối nah tá hâi rơnêu mê ai 17 km laga thế prôk 2 chôu nếo troh’’.

Ƀă kuăn pơlê a hên kơpong kong ngo, kơpong hdroâng kuăn ngo, ai troăng ƀê tông troh a pơlê cho tơdroăng ki rơhêng pói vâ păng ‘nâng. Plĕng nhên tơdroăng pói vâ dêi vâi krâ, drêng Khu râ kăn pơkuâ hnê ngăn cheăng Đảng tơring Mù Cang Chải mơhnhôk tơdroăng '’hâi mơ’nui măng tĭng rơtế ƀă kuăn pơlê’’, rơpâu roh kăn ƀô̆, mô đô̆i pêi cheăng a tơring hiăng pleăng hnoăng cheăng lăm troh a mâu pơlê kong ngo vâ kum kuăn pơlê vêh mơdâng hngêi trăng, pôe, đôu, lâk xo tơmeăm ƀă ki rơhêng vâ tối cho pro troăng klông. Pôa Nông Việt Yên, Kăn pơkuâ hnê ngăn cheăng Đảng tơring Mù Cang Chải tối ăm ‘nâi:

‘’Ki kố mê hiăng tŏng xơmong hên păng ‘nâng. Vâi krâ nhŏng o veăng tơlo liăn nếo. Tơring mơhnhôk ăm xơmong kố. Kơ’nâi mê vâi krâ veăng tơlo ƀrik, prêi, hâi pêi cheăng. Tơring tŏng kum xi mong ƀă kih thuât. Pơla kố nah kong pơlê pơ’lêh troăng hơlâ vâ tŏng kum troăng klông ki phá tơ-ê mê. Laga ai hno têa há, ôh tá pro môi tiah vâi krâ pro to lâi roh kong mêi mê mơhiu tâi. Á pơkâ rêm khế, rêm ngế kăn ƀô̆ đảng viên thế mơdoh ki vâ iâ má môi cho 2 hâi a hâi tơdrốu lơ hâi tĭng vêh a pơlê ƀă vâi krâ. Ing tơdroăng mơjiâng pro troăng kân, rơnêu troăng kân, mơjiâng pro nếo, ok ƀê tông a mâu troăng kân’’.

Tiô Tiê̆n sih Hà Việt Quân, Tôh mơjiâng tơdroăng tơkêa bro tŭm têk ƀă tơdroăng pơkâ xiâm tơnêi têa mơnhông mơdêk cheăng kâ – rêh ối pơlê pơla kơpong hdroâng kuăn ngo ƀă kong ngo hneăng hơnăm 2021 – 2030, mơhé hiăng châ tơƀrê kal tung 35 hơnăm pơ’lêh nếo laga kơpong vâi krâ hdroâng kuăn ngo ƀă kong ngo xuân cho kơpong pá puât má môi tung lâp tơnêi têa, ki rơhêng vâ tối cho tơdroăng hngêi trăng, troăng klông:

‘’Hngêi trăng, troăng klông mê tâi tâng tơdroăng cheăng kâ – rêh ối pơlê pơla mê cho môi tơdroăng ki kal má môi hlối ƀă nhên khât môi tiah êh nếo tối mê xuân ai mâu cheăm xuân hiăng xúa kơxô̆ liăn mơ’no cheăng vâ tơkŭm tâi tâng ivá mơjiâng pro troăng klông laga gá xuân tá hâi ai mâu tơdroăng ki tơdjâk troh tơdroăng rêh ối tơmeăm khoăng ƀă hiâm mơno hdroâng kuăn ngo ƀă kong ngo, xua hên tơdroăng ai tá tơdjâk pa kong ƀă ing pin laga xiâm kối ki hên má môi tơ’lêi trâm má môi cho mâu pơlê kơpong hdroâng kuăn ngo vâi trâm hên pá puât ‘na kơxô̆ liăn mơ’no liăn cheăng, păng ‘nâng cho kơpong hdroâng kuăn ngo trâm hên pơloăng mơnúa tơdjâk troh tơdroăng mơhnhôk veăng tơlo liăn ƀă xúa kơxô̆ liăn, rơtế amê tơdroăng kal vâ ‘na mơnhông mơdêk cheăng kâ – rêh ối pơlê pơla mê pơkâ thế ai kơxô̆ liăn hên’’.

Môi tung mâu tơdroăng xiâm ki kal tung Tơdroăng pơkâ xiâm tơnêi têa mơnhông cheăng kâ – rêh ối pơlê pơla kơpong vâi krâ hdroâng kuăn ngo ƀă kong ngo hneăng hơnăm 2021 – 2030 cho mơjiâng pro troăng a kơpong hdroâng kuăn ngo. Xua mê, tung hneăng nếo troăng pêi ton xŏn mơ’no liăn ăm mơnhông cheăng kâ – rêh ối pơlê pơla dêi vâi krâ hdroâng kuăn ngo ƀă kong ngo kô kal tơdroăng ki pơ’lêh môi tiah lâi? Tơpui tơno ‘na tơdroăng kố, tiê̆n sih Hà Việt Quân tối:

‘’Troăng pêi hôm châ tơƀrê tiô á thế tơkŭm a troăng pơkâ pêi. Tung mê tâng ai troăng pơkâ pêi kô chiâng tơkŭm a péa kơvâ ki xiâm, má môi cho troăng pơkâ pêi ‘na pơkuâ ƀă troăng pơkâ pêi tơkŭm po pêi pro troăng pơkâ pêi pơkuâ mê ngin xuân hlê plĕng kal ai mâu troăng pơkâ pêi mơhnhôk mơ’no liăn cheăng vâ mơhnhôk mâu khu râ. Ôh tá xê to kơnôm kơxô̆ liăn dêi Tơnêi têa mê thế kơnôm a kơxô̆ liăn dêi mâu khu tê mơdró ƀă thăm nếo kơnôm kơxô̆ liăn dêi kuăn pơlê. Ƀă troăng pơkâ pêi tơkŭm po pêi pro mê ngin xuân dế tơkŭm ti tăng mâu troăng pêi ki tơdjâk troh tơdroăng tơleăng mâu tơdroăng ki tơdjâk troh ki tơdrăng tung pơkuâ ƀă xúa kơxô̆ liăn. Mâu troăng pơkâ pêi xing xoăng kơxô̆ liăn i nhên, tơniăn vâ mâu ngế ki pá puât má môi châ kơjo mơ’no liăn hên tâ ƀă mâu troăng hơlâ ki tơdjâk troh séa ngăn, pơkuâ ngăn ƀă mơhnhôk tơdroăng ki veăng dêi kuăn pơlê tung tơdroăng séa ngăn, pơkuâ ngăn’’.

Tiah mê, vâ mơhnhôk, xúa châ tơƀrê mâu kơxô̆ liăn vâ mơjiâng troăng klông, tơxâng tiô pơkâ pêi mơnhông cheăng kâ – rêh ối pơlê pơla kơpong vâi krâ hdroâng kuăn ngo ƀă kong ngo hneăng hơnăm 2021 – 2030 pơkâ thế ai mâu troăng hơlâ tŭm têk ton xŏn, krá tơniăn, tah lôi mâu tơdroăng ki tá hâi châ tơƀrê dêi hneăng pơla kố nah. Kal ai troăng tơmiât pêi nếo tung mơjiâng ƀă pêi pro troăng hơlâ hdroâng mơngế, tung mê hiâm mơno pôu râng hnoăng cheăng, tơdroăng ki mơ-eăm khŏm pêi ing mơngế mơjiâng ƀă pêi pro troăng hơlâ xuân cho xiâm kối vâ pơkâ pêi.

Hoàng Thái – VOV4

A Sa Ly tơplôu ƀă tơbleăng