VOV4.Sêdang - Sap ing hâi lơ 1/7, Luât rêh ối hơnăm 2020 ai xêt khât, mơ-éa chêh pơ’leăng mâ mơngế, mơ-éa rêh ối pơtân xuân châ xúa troh tâi hâi lơ 31/12/2022. Khu xiâm pơkuâ Kŏng an pơ’lêh tơdroăng pơkuâ kuăn pơlê ing ƀă hlá mơ-éa mê nôkố pro ăm hlá mơ-éa chêh pơ’leăng mâ mơngế chiâng pơkuâ ƀă điê̆n tưh ƀă mah kơxô̆ khĕn inâi krê, drêng mê, rêm ngế kuăn pơlê kô tơniăn ai kơxô̆ khĕn inâi krê tung Kơmăi vi tĭnh Tơnêi têa ‘na kuăn pơlê rêh ối.

Pơtối mê, mah kơxô̆ khĕn inâi krê kô cho “ki po khuă” vâ kuăn pơlê pro hlá mơ-éa ƀă kơ koan tơnêi têa mê ôh tá kal mơhno mơ-éa chêh pơ’leăng mâ mơngế lơ mâu mơ-éa ki ê. Ƀă mơ-éa chêh pơ’leăng mâ mơngế, mơ-éa rêh ối pơtân châ pro ăm hdrối hâi lơ 1/7, mâu hlá mơ-éa ki kố xuân châ xúa ƀă kơnâ môi tiah mơ-éa mơnhên ‘na rêh ối troh tâi hâi lơ 31/12/2022.

Laga, drêng kuăn pơlê pro mâu mơ-éa kĭ vâ rêh ối, ‘mâi rơnêu tơdroăng tung kơmăi vi tĭnh ‘na tíu rêh ối, klâ lo ing rơpŏng, xut tah kĭ ối ton xŏn a môi tíu, kĭ rêh ối pơtân, pơkâ ối tơ’nôm, xut tah kĭ rêh ối pơtân chiâng pro pơ’lêh tơdroăng tung mơ-éa chêh pơ’leăng mâ mơngế, hlá mơ-éa rêh ối pơtân mê kơ koan kŏng an kô xo tơvêh kơxop hlá mơ-éa chêh pơ’leăng mâ mơngế, mơ-éa chêh rêh ối pơtân hiăng châ pro ăm, pêi pro ‘mâi rơnêu, chêh tơ’nôm tơdroăng tung kơmăi vi tĭnh ‘na tơdroăng tíu rêh ối.

A Sa Ly tơplôu ƀă tơbleăng