VOV4.Xơ Đăng - Khu xiâm ngăn hnê hriâm ƀă hnê mơjiâng tuăn ngôa rơkê pơkâ tơdroăng ki hnê mơhno tơdroăng ki hriâm tơdrêng ing troăng hyôh internet tung pơla ai pơreăng, tung mê a kơpong ki ai pơreăng a râ má 1, 2 (cho kơpong ngiât ƀă trĭng mê mơni kô tơkŭm hnê ƀă hriâm tơkŭm. Laga, hên rơkong tối tiah kố, vâ rak tơniăn ăm hok tro troh hngêi trung tug tơdroăng ki tơniăn, rơkê, kâi hbrâ mơdât tơƀrê pơreăng COVID-19 mê rơtế ƀă mâu troăng hơlâ môi tiah pâk vaccine, pêi pro tro tiô “5K”, tơkŭm klâ kơtăn hngế ƀă hên ki ê mê kal ‘mâi mơnhông khu ki séa ngăn khăm pơlât a hngêi trung hriâm vâ pro ai tơdroăng tơniăn ăm vâi hdrêng a hngêi trung hriâm.

Tiô mâu ngế rơkê, tung pơla ai pơreăng COVID-19  tâ tú rơ-iô, tơdroăng pro tơniăn ivá ăm mâu hok tro cho kal má môi. Tung pơla tơnêi têa pin pêi pro tơdroăng vâ hmâ tơniăn, ƀĕng ƀeăn rơkê, kâi mơdât COVID-19 tơ-ƀrê, châ  lăm hriâm a hngêi trung cho tơdroăng ki kal khât ƀă mâu hok tro mê kal thế rĕng pơkâ vâ mâu vâi o hok tro lăm hriâm. Tơdroăng hdró kơpong vâ pơkâ ai tơkŭm po hnê hriâm tơdrêng lơ hriâm tiô hyôh internet cho tơtro tung pơla kố.

Laga, tơdrêng ƀă troăng rơhlâ hdró kơpong mê ối kal hên troăng rơhlâ pêi tơdrêng ki ê vâ mâu hok tro lăm hriâm a hngêi trung môi tiah: pâk vaccine, tơkŭm po ăm hriâm ối kơtăn dêi rơpó pêi pro “ 5k”. Ing mê pôa Tạ Văn Hạ, Ngế xiâm phŏ pơkuâ Vi ƀan ngăn Mơhno mơjiâng túa lĕm tro - Hnê hriâm dêi Kuô̆k hô̆i tối, kal tơkŭm pêi pro tro tiô pơkâ tơ’lêi khăm ngăn séa ngăn  ƀă hok tro hriâm a hngêi trung séa ngăn krâu khât mâu vâi o drêng vêh hriâm a hngêi trung xua “kơpong ki ôh tá ai pơreăng” tung pơla dế hbrâ mơdât COVID-19 bú pro ăm tơ-brê tê:  

“Pơreăng ôh tá ai kơpong, pơreăng ôh tá ai tíu ối. Hâi kố ôh tá ai pơreăng la hâi ki ê ah kô chiâng tíu ki tâ tú pơreăng. Xua mê, la ngiâ pin thế pơkâ tơtro, môi tiah Nhuk môi tiah ai tơdroăng ki pơkâ hdró vâ troh rôh tơnêi tơhnâp, tâng tơnêi tơhnâp, mâu kuăn cháu châ hriâm kô ti lâi ƀă tơdroăng ki mê môi tiah lâi Ki ‘ló gá pin thế mơjiâng môi pơkâ ƀă tung hngêi trung, drêng châ ‘nâi ai F0  mê kô pơkâ pro ti lâi, ƀă mâu kuăn ‘nĕng  môi tiah lâi,  ƀă mâu thái cô môi tiah lâi?”.

Kăn Kuô̆k hô̆i cho pôa Nguyễn Anh Trí xuân tối tiah kố, tung pơla rêh ối tơchoâm, hmâ hlối tơniăn ƀă COVID-19 mê tơdroăng hriâm xuân thế tơmiât troh ki hơ’lêh. Hok tro ôh tá chiâng hriâm tiô troăng hyôh internet, hriâm ing um tơvi ta ah, xua hlối ôh tá tơniăn ki tơ-brê tung hnê ƀă hriâm ƀă tơmiât troh ki ton ta ah gá kô tơdjâk ‘mêi troh ivá vâi o. Xua mê, kal thế pro ăm ai tíu ki hriâm tơniăn vâ nôu pâ mâu hok tro hmiân tuăn ăm dêi kuăn lăm hriâm a hngêi trung:

“ Tơdroăng ki kal cho tơkŭm khu ngăn pơkeăng ối a mâu hngêi trung mê hlối. Kố cho khu ngăn pơkeăng a cheăm. Pakĭng mâu thái cô ki hnê, pakĭng mâu ngế cheăng pế hmê kơchâi mê ối ai khu ki kal cho kăn ƀô̆ ngăn pơkeăng. Rêm hâi khăm ngăn châ chăn vâi o, klêi mê hnê ăm mâu vâi o, vâi muăn ‘nâi mâu tơdroăng, klêi mê nếo tâng nhôm châ chăn vâi ôh tá tơniăn thế khăm ngăn ăm vâi’’.

A rôh hôp nếo achê kố pơla Chin phuh ƀă Khu xiâm ngăn hnê hriâm ƀă hnê mơjiâng tuăn ngôa rơkê ‘na pêi pro tiô pơkâ hơnăm hriâm 2021-2022 tung pơla dế ai pơreăng COVID-19 tâ tú, pôa Vũ Đức Đam, Ngế pro xiâm hnê ngăn Chin phuh hiăng pơkâ thế mâu kơvâ cheăng ngăn hnê hriâm ƀă hnê mơjiâng tuăn ngôa rơkê tơrŭm ƀă mâu tíu pêi cheăng khu râ pơkuâ cheăng tơbleăng mâu troăng rơhlâ tơniăn ăm tâi tâng drêng hok tro vêh hriâm a hngêi trung.

Ing mê, tơdrêng ƀă tơdroăng mơdêk ki tơ-brê pâk vaccine ăm vâi o hok tro ing 12 hơnăm troh 18 hơnăm mê kal thế séa ngăn, tăng mơjiâng nếo khu ngăn pơkeăng khăm pơlât a hngêi trung, vâ tơniăn ăm tơdroăng hriâm dêi vâi o hok tro tung pơla dế ai pơreăng tâ tú.

“Malối mâu vâi o hok tro ki hâi tro hơnăm pâk vaccine lăm hriâm, pin thế ai pơkâ tơdroăng kring vế. Pâ thế Khu xiâm ngăn pơkeăng pơlât ƀă Khu xiâm ngăn hnê hriâm ƀă hnê mơjiâng tuăn ngôa rơkê séa ngăn nếo, hbrâ tơdroăng cheăng séa ngăn ‘na khăm pơlât a hngêi trung, pro ti lâi  ăm tâi tâng mâu vâi o hok tro tung hngêi trung xuân ai tíu xiâm ki nhên vâ khăm ngăn ivá vâi o tung pơla dế ai pơreăng tâ tú, tơniăn tuăn tơmiât, pin lăm troh a hngêi trung mê thế tơniăn ƀă tung hngêi trung thế cho tíu ki tơniăn”.

Nôkố, ai 23 to kong pơlê, pơlê kong kân ăm hok to hriâm a hngêi trung, 15 to kong pơlê, pơlê kong kơdrâm ăm hok tro hriâm tiô troăng hyôh internet ing um tơvi. Hên kong pơlê dế vâ pơ’lêh ăm hok tro hriâm a hngêi trung drêng hiăng kâi mơdât pơreăng. Hên mâu ki rơkê tối, drêng tơkŭm po tơdroăng séa ngăn ‘na khăm pơlât a hngêi trung nhên tâ ah, tơdjêp ƀă tơdroăng chêh ‘mot mâu tơdroăng tung kơmăi chêh ‘na mâu vâi o hok tro rêm hngêi trung ƀă kơmăi chêh ‘măn mâu tơdroăng ‘na hbrâ mơdât pơreăng dêi cheăm, tơring, kong pơlê ƀă tơbleăng tơdrêng mâu troăng rơhlâ pêi pro ki ê mê kô châ ai tíu hriâm tơniăn ăm mâu hok tro hmiân tuăn lăm troh a hngêi trung.

Minh Hường-Ban Thời sự

Gương tơplôu ƀă tơbleăng