VOV4.Sêdang - Kơxo lơ 28/4, a Hà Nội, Khu pơkuâ tơdroăng kal Tơnêi têa tơkŭm po Hneăng hôp lâp tơnêi têa séa ngăn kơtăng Hneăng hôp 13 dêi Đảng ‘na hnoăng cheăng ki xiâm, hbrâ mơdât kâ kơluâ ƀă tơdroăng ki hơ’leh chêh pro hlá mơéa luât ƀă tơbleăng tơ’noăng ‘na kơvâ cheăng xiâm Đảng hơnăm 2021 – 2025. Tung tơdroăng ki kal dêi Hlá mơ-éa, Hneăng hôp hiăng pêi pro nhên troăng hơlâ ki kal dêi hnoăng cheăng xiâm, hbrâ mơdât kâ kơluâ, hơ’leh chêh pro hlá mơ-éa luât châ tối tung hlá mơ-éa Hneăng hôp 13 dêi Đảng.

Tơpui a rôh po hneăng hôp, pôa Phan Đình Trác, ngế pơkuâ tơdroăng xiâm Tơnêi têa tối nhên: ƀă 7 khu hnoăng cheăng, troăng hơlâ, tơdroăng pêi pro dêi kơvâ cheăng xiâm Đảng pêi pro pơkâ hneăng hôp 13 dêi Đảng séa ngăn kơtăng, nhên mâu tơdroăng tơmiât, pơkâ, túa cheăng, hnoăng cheăng dêi tơdroăng pơkâ hneăng hôp 13 ‘na hnoăng cheăng xiâm, hbrâ mơdât kâ kơluâ ƀă tơdroăng ki hơ’leh luât.

A rôh hôp, Khu pơkuâ tơdroăng kal xiâm Tơnêi têa tơbleăng tơ’noăng ‘na: “Châ hlo ƀă tí tăng ‘nâi plĕng ăm khu râ Đảng pơkâ tơleăng mâu rôh ki pro xôi, tơdroăng ki kâ kơluâ; pơkuâ tí tăng ‘nâi plĕng, pơkâ tơleăng mâu tơdroăng ki ôh tá tơniăn, ‘na kring vế, gak ngăn tơniăn tung pơlê pơla.

Katarina Nga tơplôu ƀă tơbleăng