VOV4.Sêdang - A roh tơpui phôn nếo achê kố pơla pôa Nguyễn Hồng Diên, Ngế xiâm pơkuâ Kơmăi kơmok – tê mơdró hiăng pơkâ thế kong têa Sinuâ pro tơ’lêi hlâu châ tê mâu tơmeăm pêi chiâk deăng, ká xi xŏng dêi Việt Nam ngi kong têa Sinuâ ing troăng tê mơdró ngi kong têa ê tíu tơkăng kong Việt Nam – Sinuâ, ki má lối cho mâu tơmeăm hbrâ hiăng vâ troh rơnó krí xo môi tiah plâi treăng ngốu, plâi treăng kêt dro, plâi nong ƀă hía hé.

Pôa Vương Văn Đào, Ngế xiâm pơkuâ tê mơdró kong têa Sinuâ tối ăm ‘nâi, peăng kong têa Sinuâ mơhnhôk ‘nâng ƀă hbrâ thăm rôe mâu tơmeăm khoăng pêi lo ing chiâk deăng, ká xi xŏng ki dâi lĕm dêi Việt Nam. Peăng kong têa Sinuâ xuân hiăng mơjiâng 10 kơpong tơkŭm ‘măn plâi kâ, 4 kơpong ‘măn kế kâ a mâu tíu tê mơdró ngi kong têa ê tíu tơkăng kong peăng kong têa Sinuâ vâ tŏng kum tơkŭm ‘măn mâu tơmeăm pêi lo ing chiâk deăng dế rơnó krí xo plâi dêi Việt Nam.

A Sa Ly tơplôu ƀă tơbleăng