VOV4.Sêdang - Bu ối pá to lâi hâi ‘nôi, kô ai lối 69 rơtuh ngế kuăn pơlê tung lâp tơnêi têa pêi pro dêi hnoăng cheăng kal kí tơná, cho tơdroăng cheăng ki krih tơviah khât dêi kuăn pơlê: lăm tâ phĭu rah pôk mơngế ki tơxâng vâ pro kăn teăng mâ Kuô̆k hô̆i ƀă Hô̆i đong hnê ngăn kuăn pơlê rêm râ. Xua ai tơdjâk dêi pơreăng COVID-19 tâ tú, mê troh nôkố, mâu kong pơlê, pơlê kong kân pơrá hiăng ai pơkâ troăng hơlâ ki vâ tâ phĭu tung tơdroăng ki hbrâ tơplâ mơdât pơreăng. Ki xiâm dêi tơdroăng kố, tâi tâng mâu kuăn pơlê pơrá athế veăng troh pêi dêi hnoăng cheăng tơná tung hâi “Leh kân tơnêi têa”.

89 tíu tâ phĭu a pơlê krâm Cầu Giấy, Pơlê kong kân Hà Nội troh nôkố pơrá châ hbrâ rơnáu nhên, rak tơniăn hbrâ mơdât pơreăng. A mâu tíu tâ phĭu pơrá châ pro troăng prôk, hang lơng bâ phuâng ƀă ai ngế ki mơhno ăm kuăn pơlê veăng tâ phĭu, rak tơniăn klâ kơtăn drêng tâ phĭu, chêh phĭu ƀă tâ phĭu; truâ kên pâng môh rơkong, xếo kŏng, kơdê pơreăng hdrối ƀă klêi kơ’nâi tâ phĭu ƀă hên ki ê.

Jâ Trần Thị Phương Hoa, kăn pơkuâ ngăn Đảng pơlê krâm, kăn pơkuâ Khu hnê mơhno cheăng tâ phĭu pơlê krâm Cầu Giấy ăm ‘nâi: pakĭng rak tơniăn mâu pơkâ tơniăn hbrâ mơdât pơreăng COVID-19 tung pơla tâ phĭu, pơlê krâm xuân pêi pro nhên ƀă rêm tơdroăng tâng lơ ai pơreăng:

“Hlá mơ-éa vâ hbrâ mơdât pơreăng tung rôh tâ phĭu xuân hiăng châ mơdêk tơ’nôm môi hvêa chêng nếo. Nôkố mâu kơpong tâ phĭu ai kơbong klâ krê. Tôh tâ phĭu châ hnê hriâm, pakĭng hnê hriâm hnoăng cheăng mê tơdroăng khăm pơlât pơlê krâm ai hnoăng cheăng hnê hriâm ăm mâu ngế cheăng tung tôh tâ phĭu ai tơ’nôm tơdroăng ki rơkê plĕng tung hnoăng cheăng hbrâ mơdât pơreăng vâ hnê mơhno kuăn pơlê drêng troh tâ phĭu rak tơniăn hbrâ mơdât pơreăng”.
A tâi tâng mâu pơlê krâm dêi pơlê kong kân Hà Nội pơrá hiăng pơkâ mâu troăng hơlâ hbrâ mơdât pơreăng a tíu tâ phĭu ƀă ai túa pơkâ krê ƀă mâu tíu ki klâ krê, mơdât. Vi ƀan tâ phĭu Pơlê kong kân Hà Nội hiăng pâ thế Hô̆i đong tâ phĭu tơnêi têa ‘na mâu túa pơkâ ki xiâm tơkŭm po tâ phĭu a mâu tíu ki klâ krê ‘na khăm pơlât.

Ƀă a Pơlê kong kân Hồ Chí Minh, Vi ƀan tâ phĭu Pơlê kong kân pơkâ thế xing xoăng tíu ‘nân rak tơniăn tơdroăng ki pơkâ thế klâ ối hngế, kơdroh ối tơkŭm hên ngế; xing xoăng mâu ngế ki lăm tâ phĭu pôi tá luâ tơdế ivá ối dêi tíu hôp tơkŭm po. Ki rơhêng vâ tối, a Bắc Giang, tíu pơreăng COVID-19 dế xông tâ tú ó má môi tung lâp tơnêi têa nôkố tiô tối hdrối kô ôh tơkŭm pơxiâm po hên kơdrâm ngế tung hâi tâ phĭu; xoăng i iâ kuăn pơlê chiâng hên rôh vâ tâ phĭu tiô chôu, ví tơdroăng ki tơkŭm hên ngế ƀă hên ki ê.

Pôa Ngô Sách Thực, kăn phŏ hnê ngăn Vi ƀan Tíu xiâm Măt trâ̆n Tơnêi têa Việt Nam tối tiah kố: tung pơla kố mâu pơlê krâm tơkŭm po tâ phĭu tung tơdroăng ki pơreăng COVID-19 xông tâ tú, mê tơdroăng ki mơnhên hiâm mơno, chêh, pơkâ inâi kuăn pơlê a mâu kơpong klâ krê pơlê pơla, kơpong pơlât pơreăng tơkŭm ƀă hên ki ê kal rak tơniăn tơdroăng kuăn pơlê a mâu kơpong kố pêi pro hnoăng tâ phĭu dêi tơná:

“Ngin hlo drêng ai pơreăng lơ drêng ai tơdroăng ki kơdrâ kal athế ai tơdroăng pêi pro nhên, vâ mâu kơpong ki klâ krê mê athế tơkŭm kơthung phĭu ki chiâng djâ ukố umê. Xuân môi tiah môi tôh tâ phĭu, môi kơpong tâ phĭu la chêh inâi kuăn pơlê mâu kong pơlê mê tơdroăng ki xo kơthung phĭu ki lăm tâ ukố umê tiah lâi ăm rak tơniăn rế hbrâ mơdât pơreăng ƀă pêi pro hnoăng kuăn pơlê dêi mâu kơpong klâ krê”.

A Tây Nguyên tơdroăng ki hâi tâ phĭu hiăng hơniâp ro. H’Sinh Ƀkrông, sinh viên hơnăm má 2, Đăi hok Tây Nguyên, kong pơlê Dak Lak, ăm ‘nâi, kố cho rôh apoăng veăng hâi mơdĭng tâ phĭu mê H’Sinh rơhêng vâ khât, tơkôm hâi châ râng kơtâ phĭu a kŏng, pêi pro dêi hnoăng cheăng dêi tơná. H’Sinh tối:

“Kố cho rôh apoăng á hbrâ lăm tâ phĭu, mê á hơniâp ro khât pêi pro hnoăng dêi kuăn pơlê dêi tơná. Hiăng vâ troh tâ phĭu á kô rah xo ngế ki rơkê, veăng kum mơdêk cheăng kâ rêh ối pơlê pơla a kong pơlê”.

Khu pơkuâ ngăn Đoân droh rơtăm kong pơlê Dak Lak hiăng tơkŭm po hên tơdroăng koh tơdah a mâu tơring, pơlê krâm, pơlê kong kơdrâm ƀă tơdroăng ki veăng dêi lối rơpâu ngế đoân viên, droh rơtăm tung kong pơlê. Tiah mê, tơkŭm po tơdroăng ki tŏng kum hnoăng a mâu tíu tâ phĭu, môi tiah: kum rak tơniăn gak kring, rak tơniăn tíu po tâ phĭu, hnoăng cheăng hbrâ mơdât pơreăng COVID-19; tơkŭm po Hâi mơdĭng kuăn pơlê hơnăm ối nếo; Hneăng hôp “kuăn pơlê hơnăm ối nếo ƀă rôh tâ phĭu pôk kăn Kuô̆k hô̆i hneăng má 15 ƀă kăn Hô̆i đong hnê ngăn kuăn pơlê rêm râ hơnăm 2021 – 2026”.

Vâ rak tơniăn ăm kuăn pơlê veăng “Hâi mơdĭng dêi tơnêi têa”, Vi ƀan Tâ phĭu Tơnêi têa hiăng pơkâ mâu tơdroăng ki hnê mơhno ‘na tâ phĭu. Nếo achê kố, Hô̆i đong tâ phĭu Tơnêi têa pơtối pơchân tung pơla tơkŭm po tâ phĭu athế séa ngăn tung túa pơkâ, kơxô̆ ngế kuăn pơlê a rêm kơpong tâ phĭu ƀă pơkâ thế hbrâ mơdât pơreăng COVID-19 a kong pơlê.

Ƀă kuăn pơlê cho ngế ki tâ pơreăng COVID-19, pôa Hoàng Thanh Tùng, kăn pơkuâ Vi ƀan Luât dêi Kuô̆k hô̆i ăm ‘nâi:

“Luât pơkâ rêm ngế kuăn pơlê ai hnoăng tâ phĭu athế châ chêh inâi kuăn pơlê vâ pêi pro hnoăng tâ phĭu. Mê kuăn pơlê cho ngế ki châ ‘nâi dương tĭnh klâ ối krê a hngêi lơ tơkŭm mê tơnêi têa xuân athế rak tơniăn ngế ki mê châ chêh inâi kuăn pơlê. Kố cho hnoăng cheăng dêi Vi ƀan hnê ngăn râ cheăm tíu ki ngế ki mê rêh ối lơ tíu klâ krê rak tơniăn mâu troăng hơlâ châ pêi pro hnoăng tâ phĭu”.

Nôkố mâu tíu cheăng, kong pơlê tung lâp tơnêi têa dế pơtối hbrâ mâu túa pơkâ, hnê tối troh rêm rơpŏng, rêm ngế kuăn pơlê ‘na rak tơniăn tơdroăng ki pơkâ thế hbrâ mơdât pơreăng drêng veăng lăm tâ phĭu ƀă túa ki pôk tung tơdroăng ki ai pơreăng. Ki kal má môi cho pêi tâi tâng mâu kuăn pơlê maluâ dế ối a kơpong klâ krê, pơlât COVID-19, ƀok thái pơkeăng, mâu khu ki dế pêi cheăng ƀă hên ki ê pơrá châ pêi pro hnoăng tâ phĭu.

Tâi tâng mâu tơdroăng athế tơkŭm po tro luât, rak tơniăn tung mâu tơdroăng ki ôh tá tơniăn dêi pơreăng COVID-19.

Katarina Nga tơplôu ƀă tơbleăng