VOV4.Sêdang - Sap ing hâi kố, hâi lơ 15/3 troh lơ 13/4 kô pơxiâm rôh séa ngăn hnoăng cheăng tâ phĭu pôk kăn Kuô̆k hô̆i hneăng má 15 ƀă Hô̆i đong hnê ngăn kuăn pơlê rêm râ hneăng hơnăm 2021 – 2026. Vi ƀan xiâm Măt trâ̆n Tơnêi têa Việt Nam kô tơkŭm po 5 khu ki lăm séa ngăn hnoăng cheăng tâ phĭu. Rêm khu séa ngăn a 3 tíu râ kong pơlê ƀă 1 kong pơlê râ tơring a rêm kong pơlê. Tơpui ƀă ngế chêh hlá tơbeăng Rơ’jiu Việt Nam pôa Ngô Sách Thực, kăn phŏ hnê ngăn Vi ƀan xiâm Măt trâ̆n Tơnêi têa Việt Nam ăm ‘nâi: Ai 8 tơdroăng ki kal tung séa ngăn ƀă hên tá ƀă troăng séa ngăn, veăng kum rah xo mâu kăn ki tơxâng khât mot cheăng tung Kuô̆k hô̆i ƀă Hô̆i đong hnê ngăn kong pơlê.

-Ô pôa Ngô Sách, pơkâ dêi tơdroăng tơkŭm mâu khu kăn lăm seá ngăn tí tăng ‘nâi tơdroăng tâ phĭu rah xo kăn Kuô̆k hô̆i ƀă mâu kăn Hô̆i đong kuăn pơlê cho ki klâi?

Pôa Ngô Sách Thực: Măt trâ̆n tơnêi têa Việt Nam ai hnoăng pêi mâu tơdroăng pá, tơvâ tơvân, tung pơla tơkŭm pêi pro vâ tơdroăng pơkâ pro ti lâi drêng tơkŭm po kô tro tiô pơkâ ƀă po klêi tơniăn. Xua mê, tung pơla hbrâ rơnáu tiô pơkâ dêi luât Tâ phĭu rah xo Kăn Kuô̆k hô̆i, Măt trâ̆n tơnêi têa Việt  Nam ai hnoăng cheăng mơhno mâu tơdroăng ki xahpá, tơvâ tơvân, tung pơla tơkŭm pêi pro vâ tơdroăng pơkâ mê pro ti lâi drêng tơkŭm po pêi pro kô tro tiô pơkâ ƀă po klêi tơniăn.

Xua ti mê, tung pơla hbrâ pêi pro tiô pơkâ dêi Luât Tâ phĭu rah xo Kăn Kuô̆k hô̆i xuân môi tiah Hô̆i đong kuăn pơlê mê mâu pơkâ ki ê tung pơla hbrâ cho tơdroăng ki ton vâ troh hâi lơ 23/5 cho hâi kuăn pơlê lăm tâ phĭu. Mâu tơdroăng ki mê chôa ‘lâng, choâ pêi pro tơrêm hơnăm ƀă 16 tơdroăng ki hdró xiâm cho veăng pêi dêi rêm ngế kuăn pơlê, mâu kơ koan mơhno pêi ăm tro khât.

Ki xiâm dêi tơdroăng seá ngăn veăng pro ăm tơdroăng cheăng hbrâ, tơdroăng tối tơbleăng thế tŭm troh kuăn pơlê, malối cho tơdroăng ki tơdjâk troh chêh inâi ngế lo tơbriât pro kăn vâ kuăn pơlê hlo ngế ki tơná tâ phĭu rah xo, ngế ki tơná tơngah pơcháu pơtroh.

- Tiah mê tơdroăng mơnhên ti lâi châ tơkŭm seá ngăn, ô pôa?

Pôa Ngô Sách Thực: Tiô pơkâ dêi luât, tung tơdroăng tơrŭm hiăng tối 8 tơdroăng, tung mê, tối hên cho a tơdroăng kal, mâu tơdroăng ki tơdjâk troh hnoăng cheăng Măt trâ̆n rêm râ ing tíu xiâm, kong pơlê veăng a mâu khu tơrŭm cheăng, pro ti lâi thế tro tiô tơdroăng ƀă thế ai rơkong tơpui tối. Tơdroăng xĭng xoăng mơngế cheăng, mâu ki tâ phĭu a râ xiâm tơnêi têa ai Hô̆i đong tâ phĭu Tơnêi têa, kong pơlê rêm râ mê ai Vi ƀan ngăn tâ phĭu rêm râ. Kơpong tâ phĭu ai khu ngăn, tôh tơkŭm ngăn ‘na tâ phĭu. Rêm khu tơkŭm ngăn tâ phĭu mê xuân ai veăng dêi Măt trâ̆n ƀă mâu khu grup.

Tơdroăng mê ai veăng ‘no hnoăng cheăng hbrâ vâ tâ phĭu, tơdroăng hnê tối trâu rơdâ troh kuăn pơlê. Mê cho tơdroăng ki kal ƀă mâu pơkâ hnoăng cheăng dêi mâu khu tơkŭm ngăn tâ phĭu rah xo kăn tro tiô pơkâ dêi Luât. Má peá, khu tơkŭm a mâu tơdroăng ki tơdjâk troh tơdroăng lo tơbriât pro kăn ƀă mâu tơdroăng po hôp tơpui tơno pro ti lâi vâ tơniăn tro tiô mâu pơkâ dêi luât. Tung tâi tâng tơdroăng pơkâ mê cho 3 tơdroăng pêi pro, má 1 môi tuăn ƀă tơdroăng tơhrâ ‘na xĭng xoăng mơngế pêi cheăng, xoăng nhên hnoăng cheăng tiô ngế, tiô khu, kơxô̆ mơngế; má 2 mâu ngế pêi cho inâi chêh ki hâi teăm tŭm ƀă má 3 cho chêh inâi mâu ngế ki ai tŭm  tơdroăng tiô pơkâ vâ tơbleăng.

Mâu tơdroăng mê mâu rôh pêi pro thế seá ngăn pêi nhên kơtăng vâ rah xo, rah hdrối mâu ngế ki ai tŭm tơdroăng tiô pơkâ vâ veăng lo tơbriât pro kăn Kuô̆k hô̆i ƀă Hô̆i đong rêm râ.

-Ô pôa, tiô troăng hơlâ xuân môi tiah tơdroăng seá ngăn ki tiah lâi vâ Măt trâ̆n tơnêi têa tơbleăng seá ngăn tơ-ƀrê má môi tiô pơkâ dêi Luât, ô pôa?

Pôa Ngô Sách Thực: hên troăng hơlâ, túa pêi pro thế hên tơdroăng. Má môi, ngin hlo rêm ngế dêi Măt trâ̆n xuân chiâng vâ veăng hnê tối mâu tơdroăng cheăng ki hbrâ. Má peá, klêi châ hlo dêi kuăn pơlê teăm tối ăm kơ koan ai hnoăng cheăng. A tối pơtih ing môi hneăng hôp tơpui roh má môi po tro tuăn kuăn pơlê, tơbleăng tơdrăng, la xuân ối ai tơdroăng ki oh tá tro tơvâ tơvân tung pêi pro, mâu ngế, mê pin tối ăm mâu Kăn dêi Hô̆i đong ngăn kuăn pơlê ƀă rêm râ ki ai hnoăng kân vâ ‘mâi hơ’leh teăm tơdrêng ăm tơtro, tơniăn pêi tro tiô pơkâ.

Hnoăng cheăng dêi tơrêm râ Măt trâ̆n kô thế tơkŭm séa ngăn vâ luâ mâu rôh séa ngăn ai veăng hnê tối, pâ thế tơdrêng. Xiâm dêi tơdroăng cho ôh tá chiâng lôi rôh kơ’nâi, mê thế tơrêm hơnăm, chôa pêi pro, mâu tơdroăng ki tơvâ tơvân, kal thế chôa pê klêi tơrêm rôh rêm hơnăm tung 16 tơdroăng pêi  pro vâ troh hâi tâ phĭu rah xo kăn lơ 23/5, mê thế pâ thế teăm tơdrêng hdrối mâu tơdroăng pêi pro mê cho vâ pê klêi hlối.

Ti mê, séa ngăn veăng ‘no hnoăng pêi a tơdroăng pơkâ, pin thế hbrâ tŭm, nhên ƀă tơdâng tơ’mô.

-Hôm mơnê kơ pôa!

Lại Hoa -  VOV1 chêh

Gương tơplôu ƀă tơbleăng