VOV4.Sêdang - Môi tung mâu troăng hbrâ mơdât pơreăng COVID 19 châ tơƀrê châ mâu kơ koan cheăng pơchân tối cho 5thế ai tơ’nôm vaccine. Pơla kố nah, Ngế pro xiâm hnê ngăn Chin phuh hiăng pơkâ thế rĕng pêi pro tơdroăng pâk vaccine hbrâ mơdât pơreăng COVID 19. Tung măng tĭng hiăng hluâ, Vi ƀan pơkuâ Kuô̆k hô̆i pơkâ xúa 12.100 rơtal liăn kơxô̆ liăn kơdĭng mơ’no hơnăm 2020 vâ rôe vaccine hbrâ pơreăng COVID 19. A Tây Nguyên, troh nôkố, mâu kong pơlê hiăng pêi kêi đeăng tơdroăng pâk vaccine COVID 19 roh má 1, krê kong pơlê Gia Lai hiăng pêi kêi đeăng roh má 2.

Tiô tối tơbleăng dêi Khu xiâm ngăn pơkeăng kong pơlê Kon Tum, troh nôkố kong pơlê hiăng pê klêi tơdroăng pâk pơkeăng vaccine rôh má môi 1 hbrâ mơdât COVID-19, pakĭng mê, pơtối tơbleăng, pêi tơdrêng mâu tơdroăng hbrâ mơdât pơreăng. Tâi tâng kong pơlê Kon Tum ai vâ chê 11 rơpâu ngế hiăng pâk vaccine trum má 1 hbrâ mơdât pơreăng COVID-19, châ lối 83%  kơxô̆ mơngế ki châ pâk pơkeăng hbrâ mơdât pơreăng rôh má 1.

Kố cho mâu ngế ki pêi cheăng tung mâu tíu khăm pơlât  ƀă mâu ngê veăng pêi  tơdroăng cheăng hbrâ mơdât COVID-19. Tung pơla veăng pâk, kơvâ ngăn pơkeăng kong pơlê Kon Tum tối ai 2 ngế ki tâ châi ó klêi pâk pơkeăng a hngêi pơkeăng kân kong pơlê  ƀă hngêi pơkeăng kân kơpong tơring Ngọc Hồi. nôkố, ivá dêi 2 ngế mê hiăng tơniăn lĕm.

Mâu kong pơlê kơpong Tây Nguyên  hiăng pê klêi pơkâ pâk vaccine hbrâ mơdât COVID-19

Xuân tung rôh má 1 kố nah, kong pơlê Dak Nông châ Khu xiâm ngăn pơkeăng xĭng xoăng lối 9 rơpâu klŏng vaccine COVID-19. Klêi châ tơdah pâk vaccine, kơvâ ngăn pơkeăng kong pơlê hiăng hnê mơhno ăm mâu tíu pêi cheăng chêh inâi mâu ngế ki ăm pâk ahdrối, tơkŭm hnê hriâm, hnê tơdah xúa, rak ngăn ƀă tơbleăng pâk.

Vâ tơdroăng pâk vaccine châ tơ-brê, kơvâ ngăn pơkeăng kong pơlê Dak Nông tơkŭm pâk a 8 tíu, mê cho: Hngêi pơkeăng kân kong pơlê ƀă 7 to hngêi pơkeăng dêi mâu tơring ki u ối. Mâu ngế ki châ pâk hdrối rôh kố mê cho: kăn ƀô̆, mâu ngế cheăng ngăn pơkeăng, mâu ngế tung khu cheăng hnê mơhno, mâu ngế ki cheăng plâ mơdât pơreăng… tiô Pơkâ 21 dêi Chin phuh.

Pôa Hà Văn Hùng, Kăn phŏ pơkuâ Khu xiâm ngăn pơleăng pơlât kong pơlê Dak Nông ăm ‘nâi, lâp tung kong pơlê hiăng ai lối 10 rơpâu 200 ngế pâk trum má 1 vaccine hbrâ mơdât pơreăng COVID-19. Klêi pâk ai lối 1 rơpâu 700 ngế tâ tung châ tơngê iâ, thĕn, châi a tíu pâk, lo hêa ƀă ôh tá ai ngế ki lâi kơdrâ kơ pơkeăng. Nôkố ivá dêi mâu ngế ki châ pâk mê xuân hiăng tơniăn.

“Kơvâ ngăn pơkeăng hiăng tơrŭm ƀă mâu khu râ pơkuâ cheăng, kơvâ cheăng tơbleăng pêi kơtăng. Ngin hbrâ tŭm mâu tíu pơlât, tơmeăm pơlât, tơmeăm pơkeăng xúa tung khăm pơlât, mâu ngế pêi cheăng a tíu pâk xo mơheăm pêi cheăng tro tiô pơkâ. Tung pâk po rơdâ đi đo ngin hmâ tơkŭm pâk a mâu hngêi pơkeăng cheăm, ‘na rôh pâk vaccine COVID-19 ngin tơkŭm pâ a mâu hngêi pơkeăng kân kong pơlê ƀă a hngêi pơkeăng tơring.

Xua vaccine COVID-19 ki nếo ƀă ngin thế pơkâ pêi tro ăm tơniăn mê ki ahdrối, mê drêng pâk a hngêi pơkeăng tâng lơ ai tơdroăng xía vâ ‘lo ing pơkeăng pro mê kơvâ ngăn pơkeăng a hngêi pơkeăng ai tŭm tơmeăm pơkeăng vâ teăm pơlât tơdrâng ăm tơniăn kơ ngế ki pâk’’.

Pâk pơkeăng vaccine hbrâ mơdât COVID-19 rôh kố, kong pơlê Dak Lak châ ăm 17 rơpâu 50 klŏng pơkeăng vâ pâk ăm 3 khu ngế mê cho mâu ngế pêi cheăng a mâu hngêi pơkeăng, mâu ngế veăng pêi tơdroăng cheăng hbrâ mơdât pơreăng ƀă mâu lêng mố đô̆i. Hâi pơkâ pâk sap lơ 24/4 troh lơ 5/5/2021.

Vâ pêi tro tiô pơkâ lối 90% ƀă mơngế ai tiô pơkâ châ pâk lối 95% ƀă mâu ngế ki ăm pâk hdrối, Dak Lak xúa tơdroăng pâk po rơdâ ki hiăng ai hlâu a kong pơlê ƀă tơ’nôm péa túa pâk tơniăn a hngêi pơkeăng kân kơpong Tây Nguyên ƀă Hngêi pơkeăng kân pơlê kong kơdrâm Ƀuôn Ma Thuột. Tâng kal, Khu ngăn pơkeăng kô mơhnhôk mâu thế mâu tíu ki pâk nâp liăn ƀă mâu tíu pâk ki ê vâ ai tŭm tơmeăm xúa drêng veăng pâk.

Vâ tơniăn, tơ-ƀrê tung tơdroăng pâk pơkeăng vaccine hbrâ mơdât pơreăng COVID-19, Khu ngăn pơkeăng Dak Lak hiăng tơkŭm hnê hriâm nhên ăm mâu kăn, kăn ƀô̆, mâu ngế pêi tơdroăng cheăng pâk pơkeăng po rơdâ, ‘nâi tơdroăng ‘na vaccine COVID-19; hnê mơhno xúa; rah ngăn hdrối vâ pâk; hnê tơdroăng pơlât tơdrêng tâng tro kơdrâ kơ pơkeăng, tơniăn pâk…

Tơdroăng ‘na séa ngăn ƀă pêi pro tâng lơ ai tơdroăng xía vâ  klêi pâk vaccine  COVID-19. Ƀok thái pơkeăng chuyên khoa 2 Trịnh Hồng Nhựt, Ngế pơkuâ Khoa hồi sức tích cực ƀă Mơdât hơ-ôu dêi Hngêi pơkeăng kân kơpong Tây Nguyên thế tơtrŏng:

“Drêng pâk pơkeăng vaccine mê kal thế tơ-trŏng mâu tơdroăng: Ƀă kuăn pơlê thế  châ ‘nâi xiâm ki pro châi ki tơ-ê gá kô tro la lâi ôh tá ‘nâi. Mê cho klêi kơ’nâi pâk vaccine kô pro ăm hlo châi klêa lo hêa, ‘nâ hía kô pro pá kâi hiâm pro ăm tâ tơviah tung châ mê thế rĕng lăm troh a hngêi pơkeăng  tơdrêng hlối. Ƀă mâu ngế cheăng ngăn pơkeăng drêng pâk pơkeăng vaccine thế tơtrŏng hbrâ tŭm tơmeăm rơxế xuân môi tiah pơkeăng vâ hbrâ pơlât tơdrêng tâng lơ hlo ai tơdroăng ki tơviah tơ ê, vâ rĕng châ ‘nâi ƀă teăm pơlât tơdrêng tơ-ƀrê rôh pâk po rơdâ drêng kố‘’.

Krê kong pơlê Gia Lai, kong pơlê ki ai tíu tâ pơreăng COVID-19 apoăng a Tây Nguyên, mê hiăng pâk klêi vaccine roh má 2 tung tơdế apoăng khế 5. Rôh kố, kong pơlê Gia Lai châ ăm 16 rơpâu 650 klŏng pơkeăng vaccine. Mâu ngế châ pâk rôh kố cho mâu ki pêi hnoăng cheăng hbrâ mơdât pơreăng tá mâu ngế pêi cheăn khăm pơlât; mâu ngế tung Khu hnê mơhno hbrâ mơdât pơreăng râ tơring, cheăm; mâu ngế pêi cheăng a mâu kơpong klâ krê,  pêi tơdroăng cheăng lăm tăng mâu ki achê mâu ngế tâ tú, séa ngăn ‘na pơreăng, tôh tơplâ COVID tung kuăn pơlê, mâu Mố đô̆i gak tơkăng kong, Kŏng an, mâu ngế vê tơ-ƀai, mâu ngế chêh hlá tơbeăng. Pakĭng mê, 1 rơpâu 883 ngế hiăng pâk roh má 1 xuân châ pơtối pâk roh má 2 drêng hiăng tŭm 4 măng tĭng tơngi klêng.

Pêi pro tiô rơkong krếo thế dêi Ngế pro xiâm hnê ngăn Chinp phuh ‘na tơdroăng rĕng pâk vaccine hbrâ mơdât COVID-19 troh rêm ngế kuăn pơlê xuân môi tiah  tơdroăng púi vâ châ rơtế ƀă rêm ngế, kơvâ a Hngêi rak liăn hiăng veăng tơlo kơxô̆ liăn châ hrĭng rơtal liăn. 4 toăng hngêi rak liăn mê cho Vietcombank, Vietinbank, BIDV ƀă Agribank rêm to hngêi rak liăn veăng tơlo 25 rơtal liăn vâ rôe vaccine. Malối, nếo achê kố, pôa Vương Đình Huệ, Kăn xiâm hnê ngăn Kuô̆k hô̆i hiăng kĭ pơkâ dêi Vi ƀan Pơkuâ cheăng Kuô̆k hô̆i ‘na tơdroăng xúa kơxô̆ liăn ‘măn kơdĭng vâ hrê ƀă kơxô̆ liăn ki u-ối dêi hngêi rak liăn xiâm Tơnêi têa hơnăm 2020.

Ing mê, Vi ƀan pơkuâ cheăng Kuô̆k hô̆i pơkâ xúa 12 rơpâu 100 rơtal liăn ki ‘măn kơdĭng hrê hơnăm 2020 vâ rôe vaccine hbrâ mơdât pơreăng COVID-19. Vi ƀan pơkuâ cheăng Kuô̆k hô̆i pơcháu ăm Chin phuh pơkuâ hnê mơhno mâu Khu xiâm, kơ koan xiâm tơnêi têa ƀă kong pơlê tơbleăng pêi rĕng, teăm rôe vaccine xin hbrâ, mơdât pơreăng COVID-19, tơniăn tơ-ƀrê, tơniăn drêng pâk ăm kuăn pơlê ƀă pơlê pơla.

Quốc Học rah chêh

Gương tơplôu ƀă tơbleăng