VOV4.Sêdang - Rơtế ƀă lâp tơnêi têa, mê hâi hnah lơ 23/5, kuăn pơlê a mâu kong pơlê tung kơpong Tây Nguyên hiăng po rôh tâ phĭu pôk kăn Kuô̆k hô̆i hneăng má 15 ƀă kăn Hô̆i đong hnê ngăn kuăn pơlê rêm râ hneăng hơnăm 2021-2026. Kố cho hâi mơdĭng dêi tâi tâng kuăn pơlê, mơhno tối hnoăng cheăng dêi rêm ngế kuăn pơlê tung tơdroăng ki rah xo mâu kăn ki ai tŭm tuăn ngoâ rơkê, tơxâng vâ teăng mâ ăm hiâm mơno, tơdroăng loi tơngah ƀă hnoăng pơkuâ dêi kuăn pơlê.

A Gia Lai, sap kơxo má hâi lơ 23/4, klêi leh pơxiâm po kân krip, iâ mơngế tơkŭm tê, kuăn pơlê a 1 rơpâu 347 tíu tâ phĭu hiăng hlo ai kơdrâm mơngế lăm tâ phĭu. Klêi pêi pro hnoăng dêi mơngế lăm tâ phĭu nâ Kay, ối a cheăm Đăk Ta Ley, tơring ‘Mang Yang, kong pơlê Gia Lai, tối:

“Hâi tâ phĭu rah xo kăn Kuô̆k hô̆i ƀă Hô̆i đong hnê ngăn rêm râ, á tâ phiu ro xua hiăng vâ châ râng hlá phĭu lăm tâ. A tơngah tiah kố kô rah xo mâu ngế ki ai tuăn ngôa rơkê, ai hiâm mơno lĕm tơdrăng, hâk vâ ‘na tơdroăng mơnhông cheăng kâ ăm kuăn pơlê malối tơmâng troh tơdroăng rêh ối dêi mâu rơxông nếo, hnê hriâm, hnê cheăng pêi, mơhno tăng cheăng pêi ƀă kơjo kum mâu hơnăm ối nếo pơxiâm pêi cheăng”.

Mâu lêng gak tơkăng kong Dak Lak hiăng klêi lăm tâ phĭu

Cho cheăm ki  ai 78% kuăn pơlê cho hdroâng kuăn ngo K’ho, tơdroăng hâi tâ phĭu a tơring Lạc Dương, kong pơlê Lâm Đồng po tung pơla pro krip, mơhno ki môi tuăn dêi rơpó. Pôa Cil Yũ Ha Giang, 63 hơnăm, ối a ƀuôn Liêng Bông, cheăm Dà Nhim tối tiah kố, hneăng tâ phĭu rôh kố ai pơxúa ƀă pơlê, pôa loi khât tiah kố mâu ngế ki châ rah xo pro kăn Kuô̆k hô̆i ƀă Hô̆i đong hnê ngăn rêm râ kô teăng mâ ăm tơdroăng púi vâ dêi kuăn pơlê. Vâi kô veăng mơjiâng mâu luât pơkâ ki tơtro ƀă, tung mê ai pro tơniăn ‘na rêh ối, xut tah kơklêa xăm kơtiê ƀă tăng tơdroăng cheăng pêi vâ tơdroăng rêh ối kuăn pơlê kô tơniăn.

“Kuăn pơlê phiu ro ƀă tâ hơniâp ro kơ tuăn vâ lăm tâ phĭu rah xo kăn Kuô̆k hô̆i ƀă Hô̆i đong hnê ngăn kuăn pơlê rêm râ. Ƀă kuăn pơlê ngin, rah xo mâu ngế ki rơkê khât, ai tuăn mơno lĕm, loi ngah khât hneăng tâ phĭu drêng kố kô ăm hlo tơ-ƀrê”.

Kuăn pơlê Kon Hra Chôt, bêng Thống Nhất, pơlê kong kơdrâm Kon Tum lăm tâ phĭu

Kơxo lơ 23/5, hâi tâ phĭu rah xo kăn tâi tâng kuăn pơlê ai 660 kơpong tâ phĭu tung kong pơlê xuân po tung pơla tơdroăng xah hêi ro pá kâi tối. Klêi teăng mâ ăm lối 1 rơpâu 100 ngế kuăn pơlê Kon Hra Chôt, kơpong tâ phĭu kơxô̆ 6, bêng Thống Nhất, pơlê kong kơdrâm Kon Tum tâ phĭu lăm tâ phĭu apoăng, A Huy kuăn pơlê phiu ro ăm ‘nâi:

 “Á cho krâ pơlê a thôn Kon Hra Chôt. Pơlê a phiu ro châ rah xo mâu ngế kăn Kuô̆k hô̆i, Hô̆i đong ki ai tŭm ivá tuăn ngôa rơkê, hiâm mơno lĕm. Tâng ngế ki lâi châ rah xo pêi cheăng tung Hô̆i đong, Kuô̆k hô̆i xuân púi vâ pro ti lâi vâ vâi veăng kum kuăn pơlê’’.

Hdrối mê, tung péa hâi lơ 22/5, châ vâ môi tuăn dêi Vi ƀan Tâ phĭu tơnêi têa, vâ chê 12 rơpâu ngế kuăn pơlê a Tây Nguyên hiăng lăm tâ phĭu hdrối tâ a 63 tôh tâ phĭu, tung mê ai mâu kăn ƀô̆, mâu lêng dêi mâu đông, kuăn pơlê a 6 to cheăm kơpong tơkăng kong ƀă kơpong hngế hngo kơtiê xơpá.

Châ hbrâ nhên ƀă tơkŭm pêi krâu khât, tâ phĭu hdrối tâ a Tây Nguyên hiăng klêi tơniăn ƀă ai vâ chê 100 ngế kuăn pơlê rôh apoăng lăm tâ phĭu.  Cao Trung Hiếu, ngế cheăng a đông mố đô̆i gak tơkăng kong Dak Ruê, mô đô̆i tơkăng kong dêi kong pơlê Dak Lak ăm ‘nâi tuăn hiâm mơno tâ phiu ro rôh apoăng châ pêi pro hnoăng tơná lăm tâ phĭu.

“Á tâ hơniâp ro hlối hâk tơngăm xua kố cho rôh apoăng á lăm tâ phĭu rah xo Kăn kuô̆k hô̆i ƀă Hô̆i đong rêm râ. Hdrối vâ tâ phĭu a hiăng pơchuât ngăn hlá mơ-éa chêh mâu tơdroăng rêh ối cheăng kâ, hiâm mơno dêi mâu ngế ki lo tơbriât vâ pro kăn. Á tơmiât a hiăng rah tro ngế ki rơkê hôm tơxâng vâ teăng mâ ăm kuăn pơlê ngin.

Á tơngah mâu ngế ki lo tơbriât pro kăn mê drêng hiăng châ rah xo mê ah thế veăng ‘no hnê hnoăng tuăn ngôa ki rơkê vâ mơjiâng kơpong tơkăng kong Dak Lak tối krê ƀă tơnêi têa tối tơchoâm rế ton rế xông rơdêi kro mơdró”.

To a kong pơlê Kon Tum,  tơdrêng ƀă tơdroăng pêi pro hnoăng dêi kuăn pơlê tơná, mâu mố đô̆i gak tơkăng kong ối pêi hnoăng cheăng kring vế gak tơniăn, rơtế ƀă 3 to cheăm tơkăng kong cho Đăk Blô, Đăk Nhoong ƀă Đăk Long tơkŭm po hneăng tâ phĭu rĕng a cheăm tơkăng kong. Bú tung kơxo hâi lơ 22/5, lối 10 rơpâu ngế kuăn pơlê a 6 to cheăm kơtiê xơpá ƀă 6 to đông tơkăng kong péa tơring Đăk Glei, Ngọc Hồi, Kong pơlê Kon Tum hiăng pê klêi tơdroăng tâ phĭu rĕng tâ, ƀă vâ chê 12 rơpâu ngế kuăn pơlê lăm tâ phĭu, châ vâ chê 100%.

A No, kuăn pơlê ki lăm tâ phĭu a tíu tâ phĭu kơxô̆ 2, cheăm Đăk Long, tơring Đăk Glei, kong pơlê Kon Tum, ăm ‘nâi:

“Kuăn pơlê lăm tâ phĭu hâk phiu ro. Rêm ngế xuân lăm tŭm. Xua mê, cho hnoăng cheăng pêi dêi rêm ngế kuăn pơlê, rah xo mâu ngế ki tơxâng vâ pro kăn teăng mâ, tối mâu tơdroăng púi vâ dêi kuăn pơlê”.

Tâ phĭu rah xo kăn Kuô̆k hô̆i hneăng 15 ƀă Hô̆i đong kuăn pơlê rêm râ hneăng hơnăm 2021-2026 po tung pơla dế tâ tú pơreăng COVID-19 rơ-iô, kô tơ’lêi pro tâ tú ing pá kong pá tá tíu tơkăng kong, mê hnoăng cheăng pêi dêi mâu kăn ƀô̆ mâu mố đô̆i gak tơkăng kong cho tơdroăng cheăng pêi tơpéa tơdroăng, hlối tơkŭm tâ phĭu tro tiô luât, hlối kring gak pro tơniăn a tíu tơkăng kong ƀă hbrâ mơdât pơreăng, vâ hâi tâ phĭu cho hâi leh kân dêi tơnêi têa.

Tung hâi leh kân dêi tơnêi têa, lâp kơpong Tây Nguyên ai lối 4 rơtuh 55 rơpâu ngế kuăn pơlê, vâ chê tŭm 54 khu hdroâng mâu kuăn ngo tung tơnêi têa, lăm tâ phĭu a 5 rơpâu  725 tíu tâ phĭu.

Quốc Học  - VOV Tây Nguyên

Gương tơplôu ƀă tơbleăng