VOV4.Sêdang - Hâi tĭng măng tĭng ki kố ah, tơkéa vâ tối cho hâi lơ 23/5, kuăn pơlê tung lâp tơnêi têa kô lăm tâ phĭu pôk kăn Kuô̆k hô̆i hneăng má 15 ƀă kăn Hô̆i đong hnê ngăn rêm râ hơnăm 2021 – 2026. A kơpong Tây Nguyên, măng tĭng hdrối, mâu ngế ki tơbriât cheăng hiăng trâm mâ kuăn pơlê ƀă mơhnhôk tâ phĭu tro tiô pơkâ. Xuân tung măng tĭng hdrối, Khu kăn ki séa ngăn, hnoăng cheăng tâ phĭu dêi Vi ƀan pơkuâ Kuô̆k hô̆i, Hô̆i đong tâ phĭu tơnêi têa xua jâ Võ Thị Ánh Xuân, kăn xiâm phŏ hnê ngăn Kuô̆k hô̆i pro kăn pơkuâ khu kăn kố hiăng troh séa ngăn hnoăng cheăng hbrâ ăm rôh tâ phĭu tung kơpong.

Măng tĭng hdrối, mâu ngế vâ tơbriât pro kăn Kuô̆k hô̆i ƀă kăn hnê ngăn Hô̆i đong mâu kong pơlê tung kơpong Tây Nguyên hiăng pêi pro tơdroăng trâm mâ kuăn pơlê ƀă mơhnhôk kuăn pơlê tâ phĭu. Tơdroăng tơkŭm pêi pro vâ 10 ngế ki lo tơbriât pro kăn Kuô̆k hô̆i hneăng 15 ƀă 85 ngế ki lo tơbriât vâ pro kăn hnê ngăn Hô̆i đong kong pơlê, hneăng hơnăm 2021-2026 pêi pro tiô tơdroăng mơhnhôk tâ phĭu dêi tơná châ Vi ƀan Măt trâ̆n tơnêi têa Việt Nam kong pơlê Kon Tum hbrâ pêi nhên khât, tro tiô pơkâ.

Tâi tâng kuăn pơlê ki châ kơ-êng xuân tối tiah kố, mâu ki teăng mâ mâu ngế lo tơbriât pro kăn Kuô̆k hô̆i ƀă mâu ki tơbriât pro kăn hnê ngăn Hô̆i đong mâu kong pơlê xuân hlo vâi môi tiah hmâ; Tơdroăng pêi pro iâ tê, mơhno hnoăng cheăng dêi tơná drêng châ rah xo pro kăn hnê ngăn Kuô̆k hô̆i ƀă kăn hnê ngăn Hô̆i đong  kong pơlê.

Jâ Võ Thị Ánh Xuân, Kăn xiâm phŏ hnê ngăn tơnêi têa tơbleăng hnê mơhno

Kuăn pơlê xuân khĕn kơdeăn khât mâu ki ‘nâ ing hiâm tuăn vâ, tuăn ngôa rơkê, rơkê ‘na tơdroăng cheăng hiăng mơhno hnoăng cheăng pêi tơná hiăng pro ăm tơdroăng pêi pro mê achê khât, tro ƀă tơdroăng ki hlo ai khât ƀă mơni kô lĭng chiâng pêi. Klêi tơmâng 5 ngế ki tơbriât pro kăn Kuô̆k hô̆i hneăng 15 ƀă 7 ngế  ki lo tơbriât pro kăn hnê ngăn Hô̆i đong mâu kong pơlê tối tơbleăng tơdroăng pêi pro, Huỳnh Ngọc Phong, kuăn pơlê ki ai hngêi ối a thôn 1, cheăm Tân Lập, tơring Kon Rẫy tối:

“A phiu ro, tơngah khât a tơdroăng tuăn loi kơ mâu ngế ki lo tơbriât pro kăn drêng kô. Mâu ki mê hiăng tối mâu tơdroăng ki ối pá, tơvâ tơvân, ki xơpá dêi kong pơlê Kon Tum tối tơchoâm, tơring Kon Rẫy ngin tối krê. Pơtih môi tiah tơdroăng pôa Nguyễn Văn Hùng, Ngế xiâm ngăn ‘na mơhno túa lĕm tro hiăng lo ing hơngế troh akố vâ tăng ‘nâi plĕng ki xiâm ối xơpá, vâ ‘nâi ki tơ’lêi hlâu dêi kong pơlê Kon Tum tối tơchoâm ƀă tơring Kon Rẫy.

A hlo ti mê xuân cho tơdroăng ki tơmâng khât. La ngiâ kố ah lơ 23/5 kuăn pơlê ngin kô râng hlá phĭu lăm tâ, mâu ngế ki lâi châ rah xo mê thế pêi pro tro tiô tơdroăng ki tơná hiăng tơhrâ. Tơdroăng pêi pro ki mâu ngế vâ pro kăn mê hiăng tối”.

Hneăng hôp mâu hơnăm ối nếo ki troh hơnăm tâ phĭu ƀă tơdroăng rah xo kăn Kuô̆k hô̆i hneăng 15 ƀă kăn hnê ngăn Hô̆i đong rêm râ

A pơlê kong kơdrâm Ƀuôn Ma Thuột, kong pơlê Dak Lak, khu pơkuâ ngăn Đoân droh rơtăm Dak Lak tơkŭm po rôh trâm mâ mâu droh rơtăm ki tro hơnăm lăm tâ phĭu, tơpui ‘na tơdroăng vâ rah xo kăn Kuô̆k hô̆i hneăng 15 ƀă kăn hnê ngăn Hô̆i đong rêm râ hneăng hơnăm 2021-2026 ki ăm to mâu đoân viên, droh rơtăm ƀă sinh viên dêi mâu hngêi trung đăi hok, kao đăng.

A hneăng hôp, mâu droh rơtăm, mâu hơnăm ối nếo châ tí tăng hlê plĕng ‘na Luât tâ phĭu rah xo kăn Kuô̆k hô̆i ƀă kăn hnê ngăn Hô̆i đong, Luât pơkâ ƀă mâu tơdroăng chêh tung hlá mơ-eá rêm râ ‘na tơdroăng tâ phĭu; tơdroăng vâ ‘nâi, tơdroăng tơplâ ƀă mâu khu ‘mêi ki hriĕn vâ pro tơ’nhiê hâi tâ phĭu; drêng tâng tối ‘na tơdroăng tâ phĭu, tơdroăng teăng mâu ngế ki dế châi tamo a hâi tâ phĭu rah xo kăn.

Đoân viên Phan Văn Khải, ối a bêng Thành Công, pơlê kong kơdrâm Ƀuôn Ma Thuột tối”.

“Cho môi ngế kuăn pơlê nếo apoăng lăm tâ phĭu ing mâu tơdroăng mâu ngế ngế hơnăm ối nếo hiăng ‘nâi nhên hnoăng ki lăm tâ phĭu dêi tơná ƀă châ kơ êng, hmâng tiâ mơnhên tơdroăng ki tơná kơ-êng. Ing mê, a kô prôk lăm tâ tro hâi ki hiăng pơkâ tâ phĭu. A tơngah mâu kăn Kuô̆k hô̆i ƀă kăn Hô̆i đong kuăn pơlê hneăng la ngiâ kố pơtối rak vế ki rơkê ƀă ai tơdroăng pơkâ pêi tro ‘lo tâ vâ mơnhông cheăng kâ-rêh ối a kong pơlê”.

Bú ối pá 1 măng tĭng ah ‘nôi kô troh hâi tâ phĭu, măng tĭng hdrối, Khu lăm séa ngăn, tí tăng ngăn vâ ’nâi nhên tơdroăng tâ phĭu dêi Vi ƀan pơkuâ cheăng Kuô̆k hô̆i, Hô̆i đong tâ phĭu tơnêi têa xua jâ Võ Thị Ánh Xuân, Kăn xiâm phŏ hnê ngăn tơnêi têa pro xiam pơkuâ djâ khu kăn hiăng troh lăm séa ngăn mâu tơdroăng pêi hbrâ vâ tâ phĭu a mâu tíu tâ phĭu a pơlê kong kơdrâm Gia Nghiã, kong pơlê Dak Nông.

Tiô Vi ƀan ngăn ‘na tâ phĭu pơlê kong kơdrâm, a mâu rôh trâm mâ mơhnhôk tâ phĭu, hên kuăn pơlê tối mâu ki lo tơbriât pro kăn ai hiâm mơno lĕ, kơhnâ djâ troăng a hdrối, ‘nâi rak tro luât pơkâ, ai tŭm tiô pơkâ dêi ngế ki vâ lo tơbriât pro kăn Kuô̆k hô̆i ƀă kăn hnê ngăn Hô̆i đong rêm râ hneăng hơnăm 2021-2026.

Nôkố, pơlê kong kơdrâm Gia Nghiã hiăng mơjiâng 59 kơpong tâ phĭu, ai 8 rơpâu 560 ngế kô lăm tâ phĭu. A kong pơlê kố hiăng pơkâ nhên ‘na kring gak tơniăn pơlê pơla, hbrâ mơdât pơreăng hdrối tâ phĭu, tung pơla tâ phĭu ƀă klêi tâ phĭu.

Klêi séa ngăn, tí tăng ngăn, jâ Võ Thị Ánh Xuân, Kăn xiâm phŏ hnê ngăn Kuô̆k hô̆i khĕn kơdeăn khât mâu tơdroăng mơ-eăm dêi pơlê kong kơdrâm Gia Nghiã tung tơbleăng teăm tơdrêng, tro hâi pơkâ ƀă pơkâ mâu tơdroăng cheăng tung tơbleăng teăm tơdrêng, tro hâi khế pơkâ mâu tơdroăng cheăng hbrâ tâ phĭu. Pakĭng mê, púi vâ mâu tơring cheăm pêi pro tro mâu tơdroăng hbrâ mơdât pơreăng COVID-19 vâ rak tơniăn hâi tâ phĭu ƀă kuăn pơlê, vâ hâi tâ phĭu cho hâi leh kân khât dêi tâi tâng kuăn pơlê.

“Ai péa tơdroăng, má môi ngế ki tơbriât pro kăn thế châ hnê tối, mơhnhôk kuăn pơlê rak tơniăn ‘na hnoăng pêi pro tơná. Rôh kố pá iâ tâ cho po tung pơla dế ai pơreăng COVID-19 tâ tú, xua mê, pin thế mơ-eăm pêi pro hnoăng dêi mơngế ki tơbriât pro kăn thế châ tơniăn ƀă hên tơdroăng pêi pro, ôh tá pro tơdrêng amê thế pêi pro ing hơngế môi tiah tơbleăng tung hlá tơbeăng, rơ’jiu, um tơvi ...

Pro ti lâi vâ mâu ki lo tơbriât pro kăn thế pêi tro hnoăng ki tơná hnê mơhnhôk tâ phĭu. Má péa, kuăn pơlê ki tâ phĭu thế ‘nâi tŭm mâu tơdroăng ‘na ngế ki tơbriât pro kăn ƀă tơdroăng ‘na tâ phĭu drêng kố. Kuăn pơlê thế ‘nâi pêi pro tro hnoăng dêi kuăn pơlê, ing mê, kô ‘nâi prôk xêh vâ lăm tâ phĭu, rah xo tro mơngế ki rơkê ai tuăn mơno tơdrăng lĕm ƀă pêi pro tro tiô luât hiăng pơkâ.

VOV Tây Nguyên

Gương tơplôu ƀă tơbleăng