VOV4.Sêdang - Kŏng an kong pơlê Dak Lak nếo tơkŭm po tơdroăng trâm mâ tiô khôi hmâ Tơbâ 90 hơnăm Hâi mơjiâng Đoân Droh rơtăm Kŏng san Hồ Chí Minh (26/3/1931 – 26/3/2021). A rôh trâm mâ, mâu kăn hiăng hơ’muăn tối khôi túa ton nah 90 hơnăm mơjiâng Đoân droh rơtăm Kŏng san Hồ Chí Minh, rơtế hvái ngăn hiâm mơno hâk vâ, mơhnŏng pleăng hnoăng dêi mâu hơnăm ối nếo Kŏng an kong pơlê a mâu tíu pêi cheăng, veăng kum rak tơniăn tung pơlê pơla tung kong pơlê.

Krê a hơnăm 2020, mâu khu tơrŭm cheăng Đoân Droh rơtăm tung lâp Kŏng an kong pơlê hiăng pêi pro 126 rôh tơrŭm pơlê pơla a mâu thôn, pơlê, cheăm ƀă tâi tâng kơnâ 3 rơtal liăn; diâp liăn hriâm rơkê “Tŏng kum vâi o troh hngêi trung” ăm hok tro ki ai tơdroăng rêh ối xơpá, ƀă kơxô̆ liăn lối 82 rơtuh liăn; hbru 20 to kên pâng môh rơkong ƀă têa kơdê pơreăng ƀă mâu kế tơmeăm kal xúa ki ê lối 150 rơtuh liăn kum kuăn pơlê hbrâ mơdât pơreăng Covid-19. Tơdrêng amê hnối tơrŭm pơtroh 8 tâ̆n tơmeăm, 420 rơtuh liăn mâ kum kuăn pơlê peăng tơdế tơnêi tro tơdjâk xua kong mê khía mơhot têa kân lân lu; veăng pleăng va chê 600 tơdrong mơheăm.

Khu pơkuâ ngăn Đoân Droh rơtăm Kon Tum diâp hnoăng liăn mơhá ăm mâu vâi o hok tro ki hriâm rơkê

-Khu pơkuâ ngăn Đoân Droh rơtăm kong pơlê Kon Tum nếo tơrŭm ƀă Khu  ngăn hnê hriâm ƀă hnê tuăn ngôa rơkê tơkŭm po Hai leh “Vâi o sôk ro mo lĕm châ- Hvêa prôk dêi Đoân”.

A hâi leh, mâu vâi o hok tro châ veăng prôk pơtăng drô troăng pro tiô pơkâ dêi Đô̆i rơtế ƀă mâu tơdroăng hmâ pêi pro koh leh tơbâ 90 hơnăm Hâi mơjiâng Đoân Droh rơtăm Kŏng sản Hồ Chí Minh lơ 26/3;  mơđah mâu ƀai hơdruê ai pơxá  ‘na pơlê tơnêi têa, ‘na tơdroăng ki lĕm hmâ pêi ton nah dêi Đoân Droh rơtăm Kŏng sản Hồ Chí Minh ƀă vâi o Việt Nam.

Rôh kố, Khu pơkuâ ngăn Đoân Droh rơtăm Kon Tum diâp 13 hnoăng liăn hriâm ăm mâu vâi o hok tro ki hriâm rơkê tung hneăng hdrối kố nah.

Katarina Nga -Gương tơplôu ƀă tơbleăng