VOV4.Sêdang - Drêng ai pơreăng COVID-19 tâ tú, mê khu kăn pơkuâ ƀă mâu kơ koan pơkuâ cheăng dêi mâu kong pơlê tung kơpong Tây Nguyên hiăng thăm mơdêk tơdroăng tơplâ mơdât pơreăng. Tơdrêng ƀă tơdroăng ki mơdât tâ tú dêi pơreăng ing tíu tơkăng kong, athế ăm ối klâ krê ƀă mâu ngế ki ai tơdjâk troh mơngế tâ pơreăng COVID-19, kơvâ ngăn ‘na pơkeăng, hnê hriâm ƀă hnê mơjiâng tuăn ngôa rơkê xuân hiăng pơkâ pêi pro mâu troăng hơlâ ki hbhrâ mơdât lĕm tro má môi dêi kơvâ ngăn ‘na pơkeăng, hnê hriâm ƀă hnê mơjiâng tuăn ngôa rơkê, klêi mê, pơkâ mâu troăng hơlâ vâ mơdât tơdroăng tâ tú dêi pơreăng.

A kong pơlê Kon Tum, mô đô̆i gak tíu tơkăng kong hiăng thăm mơdêk tơdroăng mơ’no dêi lêng vâ hbrâ mơdât mâu ngế ki tơkâ luâ tíu tơkăng kong drô troăng tíu tơkăng kong achê ƀă kong têa Lếo ƀă kong têa Kul. Ki nhên ga, vâ chê 100 ngế kăn lêng, mâu lêng hiăng lăm troh a 8 to đông lêng gak tơkăng kong dêi kong pơlê Kon Tum.

Đăi tă Lê Minh Chính, Kăn pơkuâ hnê ngăn Đảng Mô đô̆i gak tíu tơkăng kong dêi kong pơlê Kon Tum tối ăm ‘nâi, rơtế ƀă tơdroăng thăm mơdêk tơdroăng tơ’nôm dêi mâu lêng, kăn ƀô̆, mô đô̆i a tíu tơkăng kong ki xŏn lối 292 km tơkôh ƀă kong têa Lếo prế Kul xuân đi đo châ ai tơdroăng tŏng kum, hnê mơhnhôk hnối kum ‘na tơmeăm khoăng tung pơla pêi pro dêi hnoăng cheăng ki pơkuâ rak ngăn tíu tơkăng kong ƀă hnoăng cheăng hbrâ mơdât COVID-19:

“Pakĭng ‘na tơmeăm khoăng ki tŏng kum dêi Đảng, Tơnêi têa, Khu lêng đi đo tŏng kum, mê Khu kăn pơkuâ hnê ngăn Đảng kong pơlê, Vi ƀan hnê ngăn kong pơlê ƀă mâu kơ koan hiăng lăm pôu, mơhnhôk, veăng kum ăm mâu nhŏng o mâu tơmeăm khăm pơlât, pơkeăng têa vâ xúa, ‘na on tơhrik ki kơtâu ƀă hyôh tô mâ hâi vâ veăng kum ăm nhŏng o hmiân tuăn kring vế, gak ngăn a tíu tơkăng kong.

Ngin xuân hiăng rak vế, pêi pro tro tiô kơ tơdroăng 4 hnoăng cheăng ki pêi pro tơdrêng amê. A mâu tíu ki ai têa kroăng, têa long mê nhŏng o akố xuân hiăng ‘nâi pêi pêt xêh kế tơmeăm ƀă păn mơnăn mơnôa vâ ai kế kâ ăm mô đô̆i ƀă châ ai tơdroăng phâi phok, hmiân tơniăn tung đông vâ ai ivá pêi pro peá hnoăng cheăng ki kân hngăm môi tiah dế kố”.

Khu mô đô̆i gak tíu tơkăng kong hnê tối kuăn pơlê ‘na hbrâ mơdât pơreăng COVID-19

Drêng hlo ai pơreăng xông tâ tú, Vi ƀan hnê ngăn kong pơlê Dak Lak hiăng pơkâ thế Kăn hnê ngăn Vi ƀan mâu tơring, cheăm hbrâ tơrŭm cheăng ƀă mâu khu ngăn ‘na pơkeăng ƀă khăm pơlât vâ pêi pro mâu tơdroăng cheăng hbrâ mơdât pơreăng tâ tú tung kong pơlê sap ing 12 chôu kơmăng dế hâi lơ 10/5/2-2021 ta troh a tơdroăng tối pơtâng roh ki nếo.

Ki nhên ga, pơtê tâi tâng mâu tơdroăng hôp, mâu tơdroăng ki ai tơkŭm kơdrâm mơngế lối 30 ngế tung môi to kơbong (Krê roh mâu kăn trâm mâ kuăn pơlê mê athế pêi pro tiô pơkâ dêi Vi ƀan ngăn ‘na tâ phĭu dêi kong pơlê); ôh tá ăm tơkŭm mơngế ối kơdrâm a tíu pêi cheăng, hngêi trung hnê hriâm, hngêi pơkeăng; pơtê tâi tâng tơdroăng ki tơkŭm lối 30 ngế a mâu hngêi khôp, tíu xối pleăng; pơtê tâi tâng mâu tơdroăng hơdruê xuâng, tơ’noăng ivá, xah ôm hêi a mâu tíu ki kân rơdâ; pơtê tâi tâng mâu tơdroăng ki diâp, pơkoăng ŏng mế, ôu kâ kân, to hngêi nếo ƀă hên hĭn mâu tơdroăng ki ê. Ƀă tơdroăng mơdâm kiâ, ‘mế kiâ mê athế iâ mơngế troh pôu ngăn, rĕng ‘mế, mơngế ki lăm ngăn kiâ athế truâ kên pâng môh-rơkong, xếo kŏng ƀă têa pơkeăng kơdê pơreăng.

Kơpong ki ăm klâ ối krê a kong pơlê Dak Lak

Troh a chôu phut kố, kong pơlê Dak Lak hiăng hlo ai 2 ngế dương tính SARS-CoV-2, rơtế ối tung môi toăng hngêi a pơlê kong kơdrâm Ƀuôn Ma Thuột. Kơpong kơphô̆ ki ai 2 ngế dương tính pơreăng kố hiăng châ khu ƀok thái pơkeăng xôh pơkeăng, mâu kŏng an, lêng mơdât tơdroăng mot lo. Môi toăng hngêi trung mầm non, tíu ki ai môi ngế muăn tâ pơreăng, cho ngế ki F1 ối achê ing ngế ki tâ pơreăng má 3237, Vi ƀan hnê ngăn kong pơlê Dak Lak hiăng pơkâ ăm mâu hngêi trung mâm non a pơlê kong kơdrâm Ƀuôn Ma Thuột pơtê 1 măng tĭng, vâ pơkâ pêi pro mâu tơdroăng hbrâ mơdât pơreăng.

Ai tơdjâk troh mâu hok tro ki ối tung kơpong tro mơdât mê, pôa Đoàn Ngọc Thượng, Kăn phŏ hnê ngăn Vi ƀan hnê ngăn pơlê kong kơdrâm Ƀuôn Ma Thuột tối ăm ‘nâi:

“Ƀă mâu vâi muăn, vâi cháu hok tro kố dế hbrâ vâ mot tơ’noăng hneăng má péa dêi hơnăm hriâm 2020-2021 mê ngin hiăng pơkâ thế khu râ, kơvâ cheăng lăm seá ngăn mâu kơpong ki klâ kơtăn mê vâ chêh inâi tơrêm ngế. Klêi kơ’nâi ai inâi ki nhên mê ngin ăm tơ’noăng tơ’nôm tung pơla mâu vâi muăn ôh tá veăng tơ’noăng tơchoâm dêi hneăng tơ’noăng má péa hơnăm hriâm 2020-2021”.

Kuăn pơlê dêi Dak Nông chêh tối mơnhên dêi ivá

Kơxo hâi lơ 10/5, Tíu xiâm séa ngăn pơreăng châi tamo dêi kong pơlê Dak Lak tối, hiăng pâk ngăn mơheăm roh má 1 ƀă mâu kuăn pơlê ki ối achê ƀă mơngế ki tâ pơreăng má 3237 ƀă 3334. Tiah mê, tâi tâng mâu ngế ki tro mơdât mot lo a hơlâ troăng 189/1/25 Mai Hắc Đế, bêng Tân Thành, pơlê kong kơdrâm Ƀuôn Ma Thuột, kong pơlê Dak Lak ai 144 ngế pơrá âm tính, ôh tá hâi hlo krêa pơreăng SARS -CoV-2.

Măng tĭng hdrối, Vi ƀan mâu kong pơlê Dak Nông, Lâm Đồng, Kon Tum hiăng ai hlá mơ-eá pơkâ thế pơtê tâi tâng mâu tơdroăng ki vâ hbrâ tơplâ mơdât ƀă pơreăng COVID-19. Tiah mê, mâu tíu ki ôh tá kal, môi tiah koăn ôu nhâ̆u, tíu hơdruê xuâng, tíu xah game ki tơ’lêi tro tâ tú pơreăng COVID-19 tung kong pơlê athế klĭng péa pơtê tâi tâng. Khu hnê mơhno, hbrâ mơdât pơreăng a mơngế dêi kong pơlê Dak Nông hiăng pơkâ thế mâu khu râ, kơvâ cheăng ƀă kơ koan ki ngăn ‘na pơkeăng ƀă khăm pơlât tơrŭm cheăng ƀă mâu khu râ kŏng an, mô đô̆i seá mơnhên ngăn, gak ngăn a kơpong bo cheăng tơkăng kong, troăng tơkăng kong.

Mâu kơ koan ai tơdjâk pêi hnoăng cheăng athế lăm pơtrrui ngăn, seá mơnhên rêm ngế kuăn pơlê kal athế truâ kêng pâng rơkong-môh, ối kơtăn hơngế a mâu tíu ai kơdrâm mơngế, malối a mâu tíu xah ôm hêi; rak vế, pêi pro tơdrăng khât mâu tơdroăng ki luât hiăng pơkâ.

Xuân tung măng tĭng hdrối, a kơpong Tây Nguyên hiăng ai mâu ngế ki ăm klâ ối krê xua ai tâ tú pơreăng COVID-19. Ki nhên, Tíu xiâm ngăn ‘na pơkeăng dêi tơring hiăng ăm 1 ngế klâ ối krê, vâ tối ngế ki kố cho F1, cho ngế ki hiăng trâm, ối achê ƀă ngế ki tâ pơreăng COVID-19 a kong pơlê Vĩnh Phúc ƀă dế pơtối tăng mơngế ki ối achê ƀă ngế ki mê. Ai 6 ngế ki ối achê ƀă mâu ngế ki F1 a tơring Sa Thầy xuân hiăng ăm klâ ối krê vâ mơnhên ngăn tơdroăng tamo châi. A kong pơlê Dak Lak, măng tĭng hdrối, Hngêi pơkeăng pơlê kân Ea Pôč, tơring Čư̆ Mgar hiăng tơdah 1 ngế ki chêh tối dêi ivá châ chăn, xua ga lo ing Pơlê kong kân Đà Nẵng. Ngế ki mê xuân hiăng ăm xo têa kơhêa, têa hế, mơheăm hlo ai tơdroăng ki vâ môi tiah tro tâ pơreăng COVID-19, môi tiah kơ-o, tơngê, lo têa môh ƀă hên tơdroăng ki ê. Klêi kơ’nâi hiăng châ ‘nâi nhên tơdroăng kố, hngêi pơkeăng hiăng xo mơheăm, têa kơhêa, têa hế ga pơtroh a Viện Vệ sinh Dịch tễ Tây Nguyên vâ mơnhên ƀă dế tơkôm ngăn hôm tro tâ pơreăng lơ ôh. Dế nôkố, ngế ki mê hiăng ăm klâ ối krê tung kơbong ki mơdât pơreăng tâ tú dêi Tíu xiâm ngăn ‘na pơkeăng ƀă khăm pơlât dêi tơring Čư̆ Mgar.

VOV Tây Nguyên chêh

Nhat Lisa tơplôu ƀă tơbleăng