VOV4.Sêdang - Vâ chê 10 hơnăm pêi cheăng cho giảng viên hnê a Hngêi trung Chính trị kong pơlê Dak Lak xuân cho to mê hơnăm ngoh Phạm Văn Dương pêi cheăng ƀă hnoăng cheăng Đoân ƀă tơdroăng cheăng dêi droh rơtăm a kong pơlê. Ôh ti xê pêi klêi hên tơdroăng, ngoh Dương ối cho môi ngế kăn ƀô̆ đoân ki kơhnâ, rơkê, ai hên tơdroăng cheăng ki veăng kum pêi pro ăm hnoăng cheăng dêi Đoân Droh rơtăm.

Mâu hâi ki kố dế mot tung khế droh rơtăm, mơhé tơvâ tơvân tơdroăng hnê hriâm a Khoa mơjiâng Đảng, Hngêi trung kal kí Dak Lak, Thak sih Phạm Văn Dương xuân kơhnâ veăng mâu tơdroăng cheăng Đoân. Ngoh Phạm Văn Dương tối, tơdroăng hnê hriâm, hriăn plĕng khoa hok mơdoh hên chôu, xua mê ngoh mơdoh mâu hâi mơ’nui măng tĭng vâ veăng tung tơdroăng cheăng Đoân. Laga, xua hâk vâ xua mê sap ing ối sinh viên, ngoh Dương hiăng veăng hên tơdroăng pêi cheăng dêi Đoân, môi tiah: Tơdroăng cheăng rơnó Hơngui pleăng hnoăng cheăng,  tơdroăng pêi  rơnó pơtê hriâm ngiât, pleăng mơheăm, lăm pôu ƀă diâp kơxuô tơmeăm ăm kuăn pơlê kơpong pá puât.

Sap hơnăm 2013, drêng tơdah pêi cheăng a Hngêi trung Kal kí, rơtế ƀă mâu  tơdroăng pêi cheăng, ngoh pơtối veăng tung mâu tơdroăng cheăng Đoân ƀă châ rah xo to pro Khu pơkuâ, to pro kăn phŏ Đoân hngêi trung, tơdrêng amê, xuân cho phŏ pơkuâ Đoân khô̆i mâu Kơ koan ƀă khu tê mơdró kong pơlê Dak Lak. Mơhé pôu râng hnoăng cheăng ki klâi, ngoh Dương xuân đi đo tơmiât ƀă ai troăng pêi rơkê tơtro vâ thăm mơnhông tơdroăng pêi cheăng Đoân.

“Cho ing tơdroăng cheăng Đoân Droh rơtăm xuân hiăng kum á xông kân hên. Sap ing pêi cheăng a hngêi trung troh nốkố mê á xuân hiăng ai hên tơdroăng pêi, pơtih drêng ai pơreăng kân Covid 19 a kong pơlê mê á xuân hiăng mơjiâng  tơdroăng pêi cheăng ƀă mơhnhôk mâu khu tơrŭm cheăng Đoân pro muâk mơdât ki hơtĕng têa hế ƀă mơhnhôk veăng tơlo liăn ing mâu khu tê mơdró vâ kum mâu ƀok thái pơkeăng mơdât pơreăng, ki má lối cho mâu ƀok thái pơkeăng ki pêi ‘na  tơdroăng mơdât pơreăng”.

Ngoh Phạm Văn Dương hbrâ chôu hriăn plĕng a tíu chôu ‘măn kơxop mơ-éa

Ôh tá xê tơmiât pêi rơkê tung po rơdâ pêi pro tơdroăng cheăng Đoân, ngoh Phạm Văn Dương xuân ai hên troăng tơmiât pêi rơkê tung pêi hnoăng cheăng, veăng hriăn plĕng khoa hok. Cho thái hơnăm ối nếo (kot mâ hơnăm 1989) laga  sap ing tơdah pêi cheăng troh nốkố, ngoh Dương hiăng ai 4  tơdroăng hriăn plĕng khoa hok mâu râ, 2 ƀai hôp tơpui tơno lâp plâi tơnêi ƀă 30 ƀai chêh tơbleăng tung hlá tơbeăng.

Hên troăng tơmiât pêi rơkê dêi ngoh hiăng châ xúa tung tơdroăng rêh ối nốkố ƀă châ tơƀrê. Nếo achê kố, ngoh Phạm Văn Dương ối veăng roh mơhnhôk Tăng troăng mơjiâng ƀă mơnhông kong pơlê Dak Lak kro mơdrŏng, rơkê ƀă  tơdroăng pơkâ mơnhông mơdêk kơmăi kơmok uâ mơdiê hlối rak tơniăn cheăng lêng – kring vế. Nốkố hiăng châ kong pơlê mơnhên ƀă djâ tung tơdroăng pơkâ troăng hơlâ pêi tung hneăng la ngiâ.

“Tung tăng troăng pêi dêi á mê, tơdroăng akố cho pro ti lâi tung pơkâ pêi mơnhông xúa kơmăi kơmok uâ mơdiê thế châ pơkâ péa xôh, rế mơdêk ki kơnâ tơmeăm khoăng rế tơniăn cheăng lêng gâk kring. Tơdroăng pêi pro pơkâ pơcháu tơnêi, pơcháu kong mê thế chêh hnê mơhno tiô. Ƀă ƀăng tơnêi ối a mâu kong pơlê tíu tơkăng kong nốkố mê thế tơleăng ‘na tơdroăng long rơchôa têa ƀă séa ngăn ƀom min vâ ai pơkâ ƀă tăng ăm tơnêi rêh ối, xĕn kuăn pơlê rêh ối, khu mơngế pêi cheăng a kơpong tíu tơkăng kong kố vâ mơjiâng tíu rêh ối kơpong tơkăng kong ƀă mê xuân ai pơxúa tíu tơkăng kong vâ gâk kring tơnêi têa’’.

Ngoh Phạm Văn Dương châ tơdah Ƀâng kheăn kơdeăn dêi Tổng Liên đoân pêi cheăng Việt Nam

Kơhnâ tung tơdroăng cheăng Đoân, thăm mơ-eăm tung tơdroăng cheăng, mâu hơnăm hiăng hluâ, ngoh Phạm Văn Dương hiăng châ tơdah ƀâng kheăn kơdeăn ing kong pơlê ƀă tơnêi têa. Hơnăm 2017, ngoh Dương châ Kăn pơkuâ Hngêi trung kal kí Tơnêi têa Hồ Chí Minh diâp mơ-éa mơnhên thái hnê rơkê lâp tơnêi têa. Hơnăm 2019, ngoh tơdah ƀâng kheăn kơdeăn dêi Tổng Liên đoân pêi cheăng Việt Nam ‘na rơkê tung tơdroăng pêi cheăng rơkê, ai troăng tơmiât pêi rơkê.

Ngoh xuân cho 1 tung 2 ngế kăn ƀô̆ đoân phiu ro châ tơdah pri Lý Tự Trọng hơnăm 2021. Tối ‘na thái hơnăm ối nếo Phạm Văn Dương, Tiên sih Đỗ Văn Dương, Phŏ pơkuâ hngêi trung Kal kí kong pơlê Dak Lak mơnhên:

“Ngoh Phạm Văn Dương cho môi tung mâu kăn ƀô̆ Đoân droh rơtăm hơnăm ối nếo kơhnâ rơkê. Ngin xuân mơnhên, kheăn kơdeăn ngoh ai hên tơdroăng veăng kum tung hriăn plĕng, hnê hriâm pêi viâ hên tơdroăng cheăng dêi hngêi trung, Đoân hngêi trung xuân môi tiah cho Đoân khôi râ kơpêng. Mê hơnăm ki lâi Phạm Văn Dương xuân pơrá veăng hên drêng mâu tơdroăng Đoân dêi khu râ kơpêng xuân môi tiah dêi mâu khu tơrŭm cheăng, hngêi trung mơhnhôk tơ’noăng pơrá veăng’’.

Ngoh Phạm Văn Dương tối, ngoh tâ phiu ro drêng châ tơdroăng môi tuăn ƀă pro tơ’lêi hlâu dêi khu râ kăn pơkuâ hngêi trung, tơdroăng tŏng kum dêi pú hmâ. Mê kô cho mâu tơdroăng ki mơhnhôk vâ ngoh pơtối mơnhông mâu tơdroăng ki rơkê dêi tơná, veăng ƀă pleăng hên tâ mê nếo tung mâu tơdroăng pêi cheăng xuân môi tiah mâu tơdroăng mơ-eăm tâ mê nếo vâ pêi tơtro tâ tung tơdroăng pêi cheăng xiâm.

H’Xíu H’Mok chêh

A Sa Ly tơplôu ƀă tơbleăng