VOV4.Sêdang - Khu xiâm pơkuâ ngăn pơkeăng ƀă khăm pơlât nếo ai mơ-éa pơtroh Vi ƀan mâu kong pơlê, pơlê kong kơdrâm ối tung Tơnêi têa ‘na  tơdroăng thăm hbrâ mơdât pơreăng thĕn kŏng chêng rơkong. Sap  apoăng hơnăm troh  nôkố, lâp tơnêi têa châ hlo vâ chê 17.500 ngế tro tâ pơreăng thĕn kŏng chêng rơkong, tung mê, ai 4 ngế hlâ.

Tâng pơchông ƀă roh kố hơnăm nah, kơxô̆ mơngế tro tâ tâk châ 4 xôh ƀă tâk ki hên a kơpong peăng Hdroh tơnêi têa. Vâ thăm hbrâ mơdât pơreăng thĕn kŏng chêng rơkong, kơdroh iâ má môi kơxô̆ mơngế tro tâ, hlâ, ôh tá ăm pơreăng xông tâ tú rơdâ ƀă ton xŏn, Khu xiâm pơkuâ ngăn pơkeăng ƀă khăm pơlât hiăng ai mơ-éa kơxô̆ 2527/BYT-DP pơtroh Vi ƀan kong pơlê, pơlê kong kơdrâm ối tung Tơnêi têa pơkâ thế hnê mơhno pêi pro mâu tơdroăng xiâm ‘na thăm hbrâ mơdât pơreăng thĕn, kŏng chêng rơkong.

A Sa Ly tơplôu ƀă tơbleăng