VOV4.Xơ Đăng - Kong pơlê Kon Tum ai troăng tơkăng kong xŏn 299 km tơkoh ƀă péa to kong têa pú mê cho Lếo prếi Kul. Tung mâu hơnăm hdrối nah, khu lêng mố đô̆i gâk tơkăng kong Kon Tum hiăng tơrŭm ƀă khu kăn pơkuâ 13 to cheăm, ối tung 4 tơring tơkăng kong dêi kong pơlê tơbleăng tơƀrê hên túa pơkâ kum kuăn pơlê mơnhông mơdêk cheăng kâ rêh ối pơlê pơla. Rơtế amê hlối pêi pro tro hnoăng cheăng hnê tối, mơhnhôk kuăn pơlê veăng lăm pơtrui ngăn rak vế troăng tơkăng kong, tơneăn tâp hdró mơjiâng tíu tơkăng kong tung tâi tâng kuăn pơlê krá tơniăn.

Hơnăm 2021 kố rơpŏng ngoH A Thá ƀă nâ Y Éo a pơlê Pêng Lang, cheăm tơkăng kong Đăk Blô, tơring Đăk Glei, kong pơlê Kon Tum tơkăng ƀă kong têa Lếo hiăng mơ-eăm hluăn ing rơpŏng kơtiê. Nâ Y Éo phiu ro, mê cho kơnôm hnoăng kân kĭn dêi Đăi ŭy Hoàng Văn Hiệp, Kăn pơkuâ Khu mơhnhôk kuăn pơlê rơtế kăn ƀô̆, mô đô̆i Đông mô đô̆i tơkăng kong Đăk Blô hiăng pro nhŏng o ƀă rơpŏng, tá hiâm mơno hnê mơhno troăng mơnhông cheăng kâ, rak ngăn ăm kuăn ‘nĕng hriâm tâp:

‘’Đông mô đô̆i gâk tơkăng kong Đăk Blô, kăn ƀô̆ Đông cho tăm Hiệp hnê mơhno ăm rơpŏng troăng mơnhông cheăng kâ. Pơtih môi tiah pêt sâm kơxái lơ pêt pôm. Đông mô đô̆i gâk tơkăng kong, tăm Hiệp xuân tŏng kum on veăng má păn chu vâ pêi kâ. Rơpŏng xuân phiu ro păn roăng kuăn ‘nĕng hriâm, hngêi trăng kân lĕm rơdâ. On veăng má xuân mơ-eăm vâ mơnhông cheăng kâ vâ krá tơniăn ó rơdêi tâ’’.

Rak, pêi pro tơtro troăng ‘’3 ối, 4 rơtế’’, mê cho: ‘’Ối râng đông, ối râng pơlê, ối râng troăng pơkâ pêi, troăng hơlâ’’ ƀă ‘’rơtế kâ, rơtế ối, rơtế pêi, rơtế tơpui nâl hdroâng kuăn ngo’’ ƀă kuăn pơlê, khu mô đô̆i gâk tơkăng kong Kon Tum hiăng kum hên tung tơdroăng thăm mơnhông cheăng kâ  - rêh ối pơlê pơla kơpong tơkăng kong Kon Tum mơnhông mơdêk.

Mâu đông mô đô̆i gak tơkăng kong drô troăng tơkăng kong xŏn lối 292 km tơkăng péa tơnêi têa Lếo ƀă Kul hiăng xing xoăng 67 ngế đảng viên chu veăng pêi cheăng a 58 chi ƀô̆ thôn, pơlê ƀă vâ chê 300 ngế đảng viên pơkuâ vâ chê 970 rơpŏng; 46 ngế kăn ƀô̆, sih kuan pro nhŏng o kum 38 rơpŏng mơngế hdroâng kuăn ngo pá puât mơ-eăm  hluăn ing kơtiê.

Rơtế amê khu mô đô̆i gâk tơkăng kong hiăng pêi pro hên troăng pêi châ tơƀrê kum kuăn pơlê mơnhông mơdêk cheăng kâ – rêh ối pơlê pơla, môi tiah: tơdah râng ko 75 ngế vâi o hok tro tiô Tơdroăng kum o troh hngêi trung; tơdah 14 ngế muăn pro kuăn păn Đông mô đô̆i gâk tơkăng kong; tŏng kum 124 to ro hdrê ăm 67 rơpŏng kơtiê; troăng pêt sâm kơxái, loăng ‘mốu ƀă hía hé, kum pơ’lêh tơdroăng rêh ối, mơdêk pêi lo liăn ăm kuăn pơlê.

A cheăm tơkăng kong pá puât ki má lối kong pơlê Kon Tum, pôa A Mon, Kăn phŏ hnê ngăn Vi ƀan cheăm Đăk Blô, tơring Đăk Glêi tối ăm ‘nâi, kăn ƀô̆, mô đô̆i gâk tơkăng kong đi đo cho tíu loi tơngah dêi khu râ kăn pơkuâ ƀă kuăn pơlê a cheăm:

‘’Đông mô đô̆i gak tơkăng kong Đăk Blô tơrŭm tơbleăng tối ăm khu râ kăn pơkuâ kong pơlê pêi pro tơdroăng kum kuăn pơlê mơnhông cheăng kâ, rêh ối pơlê pơla, gak kring cheăng lêng. Ki rơhêng vâ tối kum kuăn pơlê troăng pêi rôe ro kăn, má péa nếo cho chu hdrê, má pái cho peâp. Pakĭng mê tơrŭm ƀă vâi kơdrâi pơlê kong xiâm Hà Nội, vâi kơdrâi kong pơlê, tơring ƀă cheăm pêt sâm kơxái ăm vâi krâ rak gak kring tơniăn kal kí tung pơlê pơla’’.

Rơtế ƀă tơdroăng tŏng kum kuăn pơlê a kơpong tơkăng kong mơnhông mơdêk cheăng kâ mơdêk tơdroăng rêh ối, mâu Đông mô đô̆i gak tơkăng kong a Kon Tum xuân tơrŭm ƀă khu râ kăn pơkuâ Đảng, khu râ kăn pơkuâ 13 cheăm tơkăng kong thăm pơtâng tối, tơbleăng, hnê hriâm luât ăm mâu râ kuăn pơlê. Ki nhên ‘na troăng hơlâ, troăng pơkâ pêi, troăng hơlâ dêi Đảng, luât dêi Tơnêi têa ‘na tơkăng kong tơnêi têa; ‘na tơdroăng hbrâ, mơdât pơreăng COVID-19; tơrŭm pêi pro châ tơƀrê Pơkâ 01, hâi lơ 9/1/2015 dêi Ngế pro xiâm hnê ngăn Chin phuh ‘’ ‘na tơkŭm po tơdroăng tâi tâng kuăn pơlê veăng gak kring hnoăng pơkuâ tơnêi tíu, gak kring tơkăng kong tơnêi têa tung rơxông nếo’’.

Đăi ŭi Diệp Xuân Hòa, Cheăng kal kí Đông Mô đô̆i gak tơkăng kong Đăk Blô, tối ăm ‘nâi:

‘’Tung mâu hơnăm hiăng hluâ hên rơpŏng ƀă ngế krê tung cheăm Đăk Blô hiăng rơtế kăn ƀô̆, mô đô̆i Đông gâk tơkăng kong kĭ tơkêa rơtế veăng gak kring troăng tơkăng kong, tơneăn. Ing mê kum gak kring tâi tâng troăng tơkăng kong, tơneăn tung Đông pơkuâ, kum rak krá tơniăn kal kí, tơniăn lâp pơlê pơla tung kơpong Đông pơkuâ’’.

Tung 5 hơnăm hiăng hluâ, hiăng ai 245 roh khu pú hên thôn, pơlê; vâ chê 720 roh rơpŏng, lối 570 roh ngế krê a mâu cheăm tơkăng kong dêi kong pơlê Kon Tum vâ xêh kĭ veăng pơkuâ troăng tơkăng kong, tơneăn ƀă hía hé. Đăi tă Lê Minh Chính, Chính ủy Mô đô̆i gak tơkăng kong dêi kong pơlê Kon Tum tối ăm ‘nâi, khu mô đô̆i gak tơkăng kong Kon Tum hiăng mơjiâng troăng gak kring tơkăng kong tâi tâng kuăn pơlê ó rơdêi tung plâ drô troăng tơkăng kong:

‘’Đảng, Khu xiâm pơkuâ Mô đô̆i gak tơkăng kong dêi kong pơlê hiăng hnê mơhno mâu Đông pêi tơtro mâu tơdroăng tơbleăng tơdroăng cheăng, mơjiâng, thăm pro krá tơniăn tơdroăng kal kí a mâu cheăm tơkăng kong. Khu râ kăn pơkuâ Đảng, khu râ kăn pơkuâ cheăm ƀă Kuăn pơlê mâu cheăm tơkăng kong phiu ro drêng hên tơdroăng, hên tơdroăng tơkêa bro troh vâi krâ kuăn pơlê. Tơdroăng rêh ối tŭm têk dêi kuăn pơlê tung kơpong tơkăng kong hiăng xông tơtêk.

Ƀă mâu tơdroăng pêi môi tiah kơpêng mê hiăng kum thăm pro krá tơniăn mơjiâng tơdroăng tâi tâng kuăn pơlê gak kring tơkăng kong’’.

Ƀă mâu tơdroăng veăng kum dêi khu Mô đô̆i gak tơkăng kong Kon Tum, troh nôkố ai 4 cheăm tơkăng kong dêi kong pơlê Kon Tum châ tŭm 19 túa tung mơjiâng thôn pơlê nếo. 9 cheăm ki ê hiăng châ sap ing 9 túa pơkâ tơngi klêng. Rơtế ƀă khu râ kăn pơkuâ cheăm, mâu kăn ƀô̆ mô đô̆i mâu Đông tơkăng kong xuân hiăng thăm tŏng kum kuăn pơlê mơjiâng mâu tơmeăm OCOP ƀă tơrŭm tung uâ mơdiê, tê tơmeăm pêi lo ing chiâk deăng.

Khu mô đô̆i gak tơkăng kong Kon Tum đi đo mơnhên, kum mơnhông mơdêk cheăng kâ - mơhno túa lĕm tro, mơjiâng tơdroăng rêh ối phâi hơtô, hơniâp lĕm ăm kuăn pơlê tơkăng kong cho tơdroăng pêi ki kal vâ pơtối thăm pro krá tơniăn, mơjiâng tơdroăng tâi tâng kuăn pơlê veăng gak kring tơkăng kong ó rơdêi.

VOV Tây Nguyên rah chêh

A Sa Ly tơplôu ƀă tơbleăng