VOV4.Sêdang - Klăng roh leh tơbâ 45 hơnăm mơjiâng tơrŭm cheăng tơpui kâ Việt Nam – Ethiopia (1976 - 2021), pôa Bùi Thanh Sơn, Ngế xiâm tơpui kâ hiăng tơpui phôn ƀă pôa Demeke Mekonnen, Ngế pro xiâm phŏ, Ngế xiâm tơpui kâ vâ tơpui tơno ‘na tơrŭm cheăng pơla péa pâ ƀă tơrŭm tung mâu hneăng hôp rêm pâ.

A roh tơpui phôn, péa pâ hiăng tơpui mâu troăng thăm tơrŭm cheăng pơla péa tơnêi têa tung la ngiâ, tung mê, kơjo thăm tơpui tơno pơla mâu khu râ kăn drêng tơdroăng pơreăng COVID 19 châ mơdât, tơtrŏng po rơdâ tơrŭm cheăng kâ, hriăn plĕng troăng tơrŭm cheăng xuân môi tiah pêi tiô luât vâ pro tơ’lêi hlâu ăm péa pâ.

Péa pâ xuân tơpui tơno mâu tơdroăng kơpong ƀă lâp plâi tơnêi rơtế tơmâng, pôa Bùi Thanh Sơn tối mơnhên, Việt Nam môi tuăn  tơdroăng tơleăng tŭm tơdroăng tơxup tơbriât lâp plâi tơnêi ing mâu troăng hơniâp lĕm tiô luât lâp plâi tơnêi, tơtro ƀă Luât Khu lâp kong têa.

A Sa Ly tơplôu ƀă tơbleăng