VOV4.Sêdang - Tâ phĭu rah xo kăn Kuô̆k hô̆i hneăng 15 ƀă kăn hnê ngăn Hô̆i đong kuăn pơlê rêm râ hneăng hơnăm 2021-2026 cho tơdroăng ki kal khât dêi tơnêi têa, cho rôh vâ kuăn pơlê pêi pro hnoăng ki xiâm tơná ing tơdroăng rah xo,  rah mâu ngế ki ai tuăn mơno lĕ, rơkê kơhnâ khât, tơxâng cho ngế ki vâ teăng mâ kuăn pơlê a Kuô̆k hô̆i ƀă Hô̆i đong hnê ngăn kuăn pơlê rêm râ. Xua mê, tơdroăng cheăng tối ‘na tâ phĭu rah xo kăn Kuô̆k hô̆i hneăng 15 ƀă kăn hnê ngăn Hô̆i đong rêm râ hneăng hơnăm 2021-2026 athế châ mâu kơ koan, khu tơrŭm sap ing tơnêi têa troh kong pơlê tơmâng ngăn, pêi pro tiô hên túa ki phá tơ-ê dêi pó vâ veăng kum pro châ ƀlêi tơniăn tung rôh tâ phĭu.

Rơtế ƀă lâp tơnêi têa, mâu pơlê kơpong hdroâng kuăn ngo dế thăm pơtâng tối ƀă hên troăng ki phá krê dêi pó, vâ kum kuăn pơlê plĕng nhên ‘na ki kal dêi roh tâ phĭu ƀă ai hnoăng ƀă mơ-eá phĭu dêi tơná. Sap apoăng khế 3/2021, Hô̆i đong hdroâng kuăn ngo – Vi ƀan hdroâng kuăn ngo hiăng tơbleăng pơkâ pêi 1449 ‘na pêi pro tơdroăng kal, pơtâng tối roh tâ phĭu tâ phĭu kăn teăng mâ Kuô̆k hô̆i hneăng má XV ƀă kăn teăng mâ Hô̆i đong kuăn pơlê mâu râ hneăng hơnăm 2021 – 2026 ƀă kơpong hdroâng kuăn ngo.

Pơtối mê, tơdroăng pơtâng tối tơkŭm ‘na pơkâ pêi, ki pơxúa ƀă ki kal dêi roh tâ phĭu; mâu tơdroăng luât ai tơdjâk, môi tiah: Luât hơnăm 2013, Luât tâ phĭu rah xo kăn teăng mâ Kuô̆k hô̆i, Luât tâ phĭu rah xo kăn teăng mâ Hô̆i đong kuăn pơlê mâu râ nôkố; mâu mơ-eá hnê mơhno ‘na roh tâ phĭu dêi Tơnêi têa, mơ-éa dêi Vi ƀan pơkuâ Kuô̆k hô̆i ƀă Hô̆i đong tâ phĭu tơnêi têa.

Pơtâng tối mâu pơkâ, tơdroăng tâ phĭu, pơkâ rah xo kăn teăng mâ Kuô̆k hô̆i ƀă kăn teăng mâ Hô̆i đong kuăn pơlê, ‘na hnoăng tâ phĭu, hnoăng tơbriât to pro kăn dêi kuăn pơlê ƀă hnoăng kuăn pơlê tung tơdroăng veăng tâ phĭu.

Pơtâng tối tơdroăng môi tuăn dêi kuăn pơlê, vâi krâ hdroâng kuăn ngo ƀă troăng hơlâ pơ’lêh nếo dêi Đảng; tơdroăng tơ’noăng châ tơƀrê koh phiu ro roh tâ phĭu; kheăn kơdeăn teăm tơdrêng mâu tíu cheăng ƀă ngế krê kơhnâ rơkê tung tơdroăng tâ phĭu, ki má lối cho tơdroăng tâ phĭu a mâu kơpong ai kơdrâm vâi krâ hdroâng kuăn ngo rêh ối, kơpong kong ngo, tíu tơkăng kong, tíu ki pá puât.

Pơtâng tối ‘na tơdroăng xiâm mâu roh trâm mâ kuăn pơlê, ‘na tơdroăng rêh ối pêi cheăng ƀă tơdroăng pêi pro dêi mâu ngế tơbriât to pro kăn, ki rơhêng vâ tối cho mâu ngế tơbriât to pro kăn cho mơngế hdroâng kuăn ngo, ngế tơbriât to pro kăn a kơpong vâi krâ hdroâng kuăn ngo, ngế tơbriât to pro kăn cho mơngế hdroâng kuăn ngo iâ pơ’leăng mâ mơngế, mơngế tơbriât to pro kăn ối tung kơpong pá puât.

Pơtâng tối ‘na tơdroăng kum, tơniăn ăm roh tâ phĭu châ tơƀrê, hlối hbrâ mơdât pơreăng COVID 19.

Nôkố, mâu pơlê kơpong hơngế hơngo dế thăm pơtâng tối tâ phĭu troh rêm thôn pơlê, kum vâi krâ mâu hdroâng kuăn ngo ‘na hnoăng dêi tơná tung roh tâ phĭu la ngiâ. Khu râ kăn pơkuâ cheăng Đảng kong pơlê hiăng rah xo mâu kăn ƀô̆ pêi tơdroăng pơtâng tối mơhnhôk kuăn pơlê plĕng nâl hdroâng kuăn ngo, rơkê tung tơdroăng pơtâng tối mơhnhôk kuăn pơlê, hlối tơrŭm pơla pơtâng tối tơdrêng tung um tơvi ƀă pơtâng tối ƀă rơkong. Khu kŏng an cheăm chính quy, mô đô̆i gâk kring tíu tơkăng kong, đoân droh rơtăm, khu pơkuâ vâi kơdrâi ƀă hía hé xuân mơhnhôk vâ veăng tung “tơdroăng pơtâng tối”. Jâ Nguyễn Thị Hồng Vân, Kăn phŏ hnê ngăn Măt trâ̆n Tơnêi têa Việt Nam kong pơlê Lạng Sơn tối ăm ‘nâi:

“Ngin hiăng mơjiâng pơkâ pêi vâ thăm pơtâng tối ‘na tâ phĭu ƀă troăng tơkŭm po pơtâng tối thế tơtro, ƀeăn ƀĕng laga thế châ tơƀrê. Tung mê, ki rơhêng vâ tối thế pơtâng tối mâu kuăn pơlê kơpong pá puât, vâi krâ hdroâng kuăn ngo a tíu tơkăng kong… Ing mê vâ pro troh lâp lu, vâ hâi tâ phĭu Kuô̆k hô̆i ƀă Hô̆i đong kuăn pơlê mâu râ hneăng hơnăm 2021 – 2026 cho khât hâi phiu ro dêi tâi tâng kuăn pơlê”.

Vâ tơtro ƀă khôi túa lĕm tro rêm hdroâng mơngế, tơdroăng pơtâng tối ăm vâi krâ hên troăng, tơpui ƀă rơkong, tơpui mơ’no tung rơ’jiú, um tơvi, tơtrŏng troăng pơtâng tối ƀă rơkong. Hên troăng pơtâng tối rơkê môi tiah mơnhông hnoăng dêi ngế ki kuăn pơlê loi tơngah, tơkŭm po hơdruê xuâng troh lâp lu a mâu roh tơkŭm kơdrâm mơngế lơ chêh tơdroăng pơtâng tối tâ phĭu ƀă nâl hdroâng kuăn ngo tung kơpong ăm tơ’lêi plĕng, tơ’lêi pâ… Jâ Phạm Thị Lan, Phŏ hnê ngăn Vi ƀan Măt trâ̆n Tơnêi têa Việt Nam kong pơlê Gia Lai mơnhên ki châ tơƀrê dêi khu “pơtâng tối ƀă rơkong” a kơpong hơngế hơngo:

“Ki rơhêng vâ tối cho mâu ngế ki kuăn pơlê loi tơngah, mâu krâ pơlê, kăn pơkuâ thôn tơpui dêi nâl vâi, nâl tơpui dêi pơlê môi tiah Jarai ƀă Bơhnéa vâ tơbleăng tơdroăng tiô hiâm mơno tơdjuôm troh ƀă rêm ngế kuăn pơlê. Ing troăng pơtâng kố mê ki hên kuăn pơlê ki rơhêng vâ tối cho mơngế hdroâng kuăn ngo vâi xuân ai mâu troăng plĕng, xúa mơ-éa phĭu dêi tơná vâ rah xo mâu ngế ki ai tŭm hiâm mơno lĕm, ivá pêi cheăng vâ veăng kăn teăng mâ Hô̆i đong kuăn pơlê mâu râ”.

Kô chiâng vâ tối, ƀă troăng thăm pơtâng tối ‘na tâ phĭu ing hên troăng, tŭm têk, tơdroăng pơtâng tối tâ phĭu a kơpong hơngế hơngo hiăng kum tơplâ mơdât mâu tơdroăng tơmiât ôh tá tro, pro tơ-ê dêi mâu ngế ki hêng hôu tơnêi têa; kum vâi krâ hdroâng kuăn ngo plĕng nhên: Lăm tâ phĭu cho kum rah xo mơngế ki rơkê, teăng mâ ăm kuăn pơlê pơkâ mâu troăng hơlâ mơnhông mơdêk… kum tơdroăng rêh ối dêi vâi mơ-eăm hluăn ing kơtiê, rak tơniăn tơdroăng rêh ối. Ing mê, vâi krâ hdroâng kuăn ngo plĕng nhên ‘na hnoăng, pôu râng hnoăng cheăng dêi tơná ƀă hbrâ veăng Hâi tâ phĭu.

Thu Hòa chêh

A Sa Ly tơplôu ƀă tơbleăng