VOV4.Sêdang - Sap ing hâi lơ 1/4/2021, theh baoh hiâm khăm pơlât túa ki nếo kô châ xúa tung lâp tơnêi têa. Túa theh baoh hiâm khăm pơlât nếo ai mâu tơdroăng ki hơ’lêh tiô troăng kxởo pơxúa hên tâ ăm mâu ngế ki veăng roê, malối cho tung pơkâ pơkâ thế hbru theh, rak ngăn ƀă xúa theh vâ lăm khăm pơlât ƀă theh baoh hiâm khăm pơlât. Tiah mê, theh baoh hiâm khăm pơlât túa ki nếo gá tơxĭn môi tiah theh căn cước kuăn pơlê ƀă môi tiah mâu theh ATM dêi mâu hngêi rak liăn, châ pro ƀă plastic klêi kơ’nâi in, tơ’lêi drêng rak ‘măn, xúa. Mah kơxô̆ theh bu ối 10 to kơxô̆, teăng 15 ô kơxô̆ môi tiah theh baoh hiâm khăm pơlât dế xúa nôkố. Túa theh Baoh hiâm khăm pơlât nếo hiăng châ hơ’lêh ‘na tơdroăng ki pin hiăng veăng ing hdrối drêng nâp liăn baoh hiâm pơlê pơla, baoh hiâm khăm pơlât dêi mâu ngế ki veăng roê. Ki rơhêng vâ tối, drêng mngế ki veăng roê baoh hiâm khăm pơlât xúa baoh hiâm pơlê pơla kơxô̆ VSSID, drêng lăm khăm pơlât ôh tá kal djâ tơvế theh baoh hiâm khăm pơlât xua um theh baoh hiâm khăm pơlât hiăng châ tơkŭm tung tíu ki ‘măn rak kơmăi vi tĭnh.

Katarina Nga tơplôu ƀă tơpleăng