Rôh kơneăng apoăng khế 3 hdrâp a tơraih tơƀai Ƀuôn Ma Thuột chơ tiô tơmối lo ing Pơlê kong kân Hồ Chí Minh. Tung kơxô̆ ki kố, ai tá mâu mơngế Việt ki rêh ối cheăng kâ a kong têa ê pơrá hmâ vêh pôu Ƀuôn Ma Thuột, tíu ki tơná sap ing tơxĭn nah môi tiah jâ Thu Mai. Jâ Thu Mai tối, nếo lo ing tơraih tơƀai, troh a troăng kân Đam San – Nguyễn Lương Bằng – Võ Nguyên Giáp, tơnêi tơníu dêi cheăm Hòa Thắng, jâ môi tiah dêi tơná ôh tá chôu pâ hyông troăng xua mâu tơdroăng pơhlêh rĕng dêi tíu kố:

“Bu to lâi hơnăm, to lâi hơnăm hdrối nah á lăm, hlo ôh ti xê môi tiah nôkố. Mê nôkố vêh akố á hlo vung vế ko, xua gá pơhlêh rĕng khât”.

Tung tơdroăng ki pơhlêh hên dêi Ƀuôn Ma Thuột, pơhlêh nhên rĕng khât cho a kơpong Tơraih tơƀai – tíu tơƀai kơneăng hdrâp Ƀuôn Ma Thuột. 50 hơnăm hdrối, maluâ tíu kố ai inâi cho tơraih tơƀai Hòa Bình, la bu hên hbo to hlá xá, kẽm ilá, mâu tíu ki ai min, rơtế ƀă hên tíu hmuâ ối ‘măn chôu dêi ‘mrâm pháu, cho môi tung 2 tíu tơplâ ki rơ-iêo khât má môi cho a hâi má 10 khế 3 hơnăm 1975. La nôkố kơpong kố hiăng chiâng tíu ki kal dêi mâu troăng prôk chêng-troăng tơƀai; dêi mâu troăng kân tơdjêp Khánh Hòa - Ƀuôn Ma Thuột, Troăng kân kơxô̆ 27 tơdjêp Dak Lak – Lâm Đồng ƀă troăng kân Võ Nguyên Giáp tơdrăng mot tung tíu xiâm pơlê kong kơdrâm. Kot mâ a Ƀuôn Ma Thuột la hngế dêi pơlê kong kơdrâm hiăng hên hơnăm, jâ Hoàng Thị Kim Anh xuân kơdrâ ƀă ro khât xua mâu tơdroăng pơhlêh kố:

“Ro ƀă hơniâp vêh akố hlo Ƀuôn Ma Thuột mơnhông rơdêi. Á ôh tá ‘nâi kơnó mâu tơmeăm, kế ki nah xếo”.

50 hơnăm tơkâ luâ, ôh ti xê to mâu tíu ki tro rong xua tơplâ hiăng châ pro pơlĕm mê Ƀuôn Ma Thuột, ing môi pơlê kong krâm ki tơ’nhiê tơ’nhĕng ƀă inâi “Ƀuôn Ma Thuột”, ƀă bu lối hrĭng rơpâu ngế, nôkố hiăng chiâng pơlê kong kơdrâm râ má 1 – tíu pêt hên kơphế dêi Việt Nam. Cheăm Hòa Thắng ƀă mâu tơnêi tíu tâ tá tơraih tơƀai Hòa Bình nah, drêng mê nah bu lối chât rơpŏng cho mâu Mường a kong pơlê Hòa Bình mot pro pơlê ối, mê nôkố hiăng chiâng môi tung mâu tíu xiâm dêi khoa hok kih thuât pêi chiâk deăng pêt kong kân má môi lâp tơnêi têa, tê hdrê loăng pêt ƀă mâu troăng hnê kih thuât - kong ngê̆ pêi chiâk deăng pêt kong ăm tá Tây Nguyên. Pôa Nguyễn Quang Ngọc, kuăn pơlê xiâm rêi pơlê Mường kong pơlê Hòa Bình kot mâ hơnăm 1960 a cheăm Hòa Thắng ăm ‘nâi, tơdroăng ki pơhlêh a kơpong tơnêi ki kố cho sap ing pro hngêi ƀă kơlá phêa chiâng pro hngêi ki lĕm krá chal nôkố:

“Nah mâu jâ pôa krâ ôh ti xê châ môi tiah kố ôh. Kơ’nâi kố Tơnêi têa nếo pơhlêh ăm kuăn pơlê pêt kơphế, xoăng tơnêi ăm kuăn pơlê. Kố, tung Hòa Thắng kố cho hên hngêi nôkố châ pro lĕm cho xua kơnôm ing mơdâ hdrê. Pro kơdrum mơdâ hdrê. Kố kố, vâi pêi môi hơnăm châ rơtal liăn ‘nâi”.

Cheăm Hòa Thắng hiăng ai lối 1.200 rơpŏng. Drêng Tây Nguyên ai mâu rơnó ki châ xo hên liăn xua tơmeăm pêi lo lĕm, kơtóu, Hòa Thắng châ xo hên ki tơdjuôm xua kơphế, sầu riêng, tiu tê châ yă kơnâ, kuăn pơlê Hòa Thắng rế kro rĕng. Mâu toăng hngêi ki lĕm châ pro môi tiah kơpong ki tâ tá pơlê kơphô̆ Ƀuôn Ma Thuột. Tơdroăng ki tơdjêp Võ Nguyên Giáp rế pro pơlê cheăm kố rế lĕm rơkê.

Ing môi to pơlê kong krâm tơplâ, klêi kơ’nâi tơdế chal Ƀuôn Ma Thuột mơ-eăm tơná chiâng tíu pêt kơphế xiâm dêi Việt Nam, môi tung tíu xiâm cheăng kâ khoa hok kih thuât pêi chiâk deăng pêt kong dêi Tây Nguyên. 50 hơnăm hdrối, rôh tơplâ tơleăng lĕm Ƀuôn Ma Thuột cho pơxiâm ăm rơnó hơngui ƀlêi trâng, tơniăn ƀă môi tuăn. Ing kố, pơlê kong kơdrâm pơxiâm môi tơdroăng prôk ki nếo, troăng prôk dêi mơnhông ƀă tơrŭm cheăng, chiâng tíu troh dêi kơphế lâp plâi tơnêi.