Ƀă ƀăng tơnêi kong ki chiâng xêh lối 35.700 ha, tung mê lối 90% ƀăng tơnêi pêi chiâk deăng, tơring Krông Ƀuk, kong pơlê Dak Lak ngăn ki pơxúa ki xiâm dêi tơná cho pêt mâu hdrê loăng ki ton hơnăm. Pôa Nguyễn Hải Đông, Kăn pơkuâ hnê ngăn Đảng tơring Krông Ƀuk ăm ‘nâi, tơring dế tơkŭm mơjiâng túa pơkâ xúa tơnêi troh hơnăm 2030, vâ rak tơniăn xing xoăng tơtro pơla mâu tơnêi ki vâ pêt mơjiâng tơmeăm ƀă mơnhông cheăng kâ rêh ối pơlê pơla.

“Tơring dế mung mâu khu ki rơkê plĕng tiâ mơnhên tơbleăng mâu hvêa prôk vâ rak tơniăn ƀă tơdroăng pơkâ thế tơdjuôm dêi kong pơlê, dêi tơnêi têa. Drêng pêi châ tơdroăng kố mê tơdroăng ki krếo thế ‘no liăn cheăng xuân môi tiah ‘na mơjiâng pro hngêi trăng troăng klông, tê tơnêi, hbru tơnêi ăm kuăn pơlê kô châ rak tơniăn. Tâng pêi châ tơƀrê tơdroăng kố mê tơdroăng pơkâ ‘na mơnhông cheăng kâ rêh ối pơlê pơla ƀă tơdroăng pơkâ pêi lối 8% tơngah kô pêi châ tơƀrê”.

Ai tâi tâng ƀăng tơnêi kong ki chiâng xêh tâk troh 176 rơpâu ha, Ea Súp cho tơring ki ai tơnêi kân má môi tung kong pơlê Dak Lak. Laga, kố cho môi tung mâu tơring kơtiê má môi dêi kong pơlê; môi iâ cho mơhrê kong kế tơnêi tơníu drêng ai lối chât ha chúa lôi tung mâu tơdroăng tơkêa ƀă tro kuăn pơlê hdi xo. Vâ ‘mâi mơnhông tơdroăng kố, tơring dế pêi pro mâu troăng hơlâ xo tơvêh tơnêi ki tro vâi hdi pro chiâng tơnêi ki lĕm, tơ’mot khu mơdró kâ ai liăn ngân vâ ‘no pêi cheăng. Ƀă mâu ivá mơ-eăm kố, tơring Ea Súp tơngah ôh ti xê to po rôh mơnhông cheăng kâ pêi chiâk deăng tiô pơkân mê ối tơmiât troh xo tơvêh tơnêi a mâu tơdroăng tơkêa pêi chiâk deăng xúa kơmăi kơmok chal nếo, veăng gum mơdêk ki kơnía tung pêi, thăm mơnhông pêi lo liăn ăm kuăn pơlê. Pôa Đỗ Xuân Dũng, phŏ kăn pơkuâ ngăn Đảng tơring Ea Súp tối rơdêi:

“Chiâng vâ tối rơdêi rơlối ‘na tơnêi tơníu vâ pêi chiâk deăng, pêt kong a tơring Ea Súp gá kân khât. Xua mê tơring Ea Súp krếo thế mâu khu ki ‘no liăn cheăng troh a Ea Súp pơkuâ ngăn mâu ƀăng tơnêi ki ngin tiô tối hdrối vâ xo tơvêh kố vâ pơkuâ ngăn, ‘no liăn pêi cheăng kâ, mơnhông pêi chiâk deăng pêt kong tiô pơkâ ƀă tiô pơlâ dêi luât”.

Tối nhên hnoăng cheăng ki kal dêi tơnêi tơníu tung tơdroăng la ngiâ mơnhông cheăng kâ rêh ối pơlê pơla dêi kong pơlê, tung hâi pêi cheăng apoăng ƀă Khu ngăn chiâk deăng ƀă Hyôh kong prâi kong pơlê Dak Lak klêi kơ’nâi tơkŭm tíu pêi cheăng (Khu ngăn chiâk deăng ƀă Mơnhông thôn pơlê ƀă Khu ngăn tơmeăm khoăng tung têa a tơnêi ƀă hyôh kong prâi), pôa Nguyễn Thiên Văn, Phŏ kăn hnê ngăn Vi ƀan kong pơlê ăm ‘nâi: Kong pơlê dế pêi pro hên hĭn troăng hơlâ vâ tí tăng troăng hơlâ pêi pro tơƀrê ‘na mâu tơdroăng ki kố. Tung mê, hnoăng cheăng xo tơvêh tơnêi ki tro vâi hdi kal pêi pro kơtăng, rơtế amê cho tơdroăng ki séa ngăn, ‘mâi rơnêu túa pơkâ xúa tơnêi châ tơbleăng tơdâng tơ’mô, rak vế tơniăn tơtro ƀă rêm kơpong ƀă troăng pơkâ tơmiât pêt tơdjuôm dêi kong pơlê.

Pôa Nguyễn Thiên Văn pơkâ thế Khu ngăn chiâk deăng ƀă Hyôh kong prâi tơkŭm tơdrêng hlối tơdroăng ki kố:

“Mơdêk rĕng tơdroăng ki pơkâ pêi xo tơvêh tơnêi ƀă mâu tơnêi ki tro hdi xo athế pêi tơdrêng hlối, xua pin hiăng pro túa pơkâ xo tơvêh tâi tâng ki tro hdi xo a mâu tơring cheăm tung lâp kong pơlê ƀă klêi kơ’nâi xo tơvêh tơnêi ki tro vâi hdi xo mê athế tí tăng ‘nâi plĕng ăm vi ƀan hnê ngăn kong pơlê vâ tơbleăng ăm khu pơkuâ ngăn Đảng ‘na túa xúa tơnêi klêi xo tơvêh, pơkâ thế rĕng pêi pro tơdroăng kố mê nếo tơdâng tơ’mô ƀă pêi pro tro pơkâ dêi kong pơlê Đảng ƀô̆ xuân môi tiah hnê mơhno dêi tơnêi têa”.

Pơkuâ ngăn ƀă xúa tơƀrê tơnêi tơníu tơngah ôh ti xê gum Dak Lak pêi châ tơƀrê tơdroăng pơkâ pêi mơnhông cheăng kâ 8%, mê ối pro ivá mơnhông krá rơdêi ăm tơdroăng mơnhông tơniăn ton. Ƀă mâu troăng hơlâ pơkâ tơtro, sap ing túa pơkâ tơtro, ‘no liăn pro hngêi trăng, troăng klông, tơ’mot khu mơdró kâ troh rak vế kong prâi tơnêi tơníu, Dak Lak kô chiâng vâ pêi xúa ki ai hlâu ‘na tơnêi, pro pơhlêh chiâng ivá ki kal vâ mơdêk khât ki rơkê plĕng tung tơdroăng rêh ối kuăn pơlê ƀă mơnhông cheăng kâ kong pơlê rế hía rế mơnhông.