Dak Lak khŏm mơeăm têa tah klêi hngêi tơ’nhiê, xi kơchoh hdrối vâ mot tung rơnó mê hngê

Jâ Ngô Thị Kim Xuyến, a tôh kơphô̆ 1, pơlê kân Quảng Phú, tơring Čư̆ Mgar ăm ‘nâi:

“Á phiu ro khât, ro to lâi hâi kố ôh tá chiâng koi. Á mơnê Đảng, Tơnêi têa ƀă khu kŏng an pro ăm rơpŏng á môi toăng hngêi vâ ối, ro khât yoh”.

Ƀă nâ H En Niê a ƀuôn Kmiên, cheăm Ea Drông, pơlê kong krâm Ƀuôn Hồ mê ƀriê lo têa mâ tối tung hâi ki pơxiâm pro hngêi nếo môi tiah kố:

“Ƀriê khât yoh, ôh ti ‘nâi tối ki klâi xếo, pơxúa khât yôh, ai môi toăng hngêi hơtôu vâ rơpŏng ối drêng kong mê, drêng kong tôu. Xo ah hmôi on veăng má kô mơeăm pêi cheăng, mơeăm vâ mơnhông cheăng kâ rơpŏng hngêi”.

Mâu toăng hngêi ki kố ối tung tơdroăng Tơkêa pro nếo 4.285 toăng hngêi hbru ăm rơpŏng kơtiê, rơpŏng vâ chê kơtiê a kong pơlê Dak Lak (khê̆n cho tơdroăng tơkêa 124 xua Kŏng an kong pơlê pơkuâ, pro sap ing khế 3 hơnăm kố. Tiah mê, ƀă tâi tâng kơxô̆ liăn ‘no pro vâ chê 343 rơtal, rêm toăng hngêi pro nếo châ gum 80 rơtuh liăn, tung mê 60 rơtuh liăn cho sap ing liăn tŏng gum dêi tơnêi têa ƀă 20 rơtuh liăn cho sap ing kơxô̆ liăn dêi kong pơlê. Rơtế amê, tơdroăng tơkêa kố xuân gum ‘mêng 1.120 toăng hngêi ƀă kơlo liăn gum cho 30 rơtuh rêm toăng.

Klêi môi poê khế tơbleăng, hiăng ai 1.026 toăng hngêi ối tung tơdroăng tơkêa 214 châ pơxiâm pro, tiô tối hdrối kô pro klêi tung khế 4 la ngiâ. Thiê̆u tươ̆ng Lê Vinh Quy, Kăn pơkuâ Koưng an kong pơlê Dak Lak ăm ‘nâi, klêi mơgêi tơdroăng cheăng kŏng an râ tơring, kong pơlê pơcháu ăm kŏng an râ cheăm, bêng, pơlê kân tơbleăng tơdrêng ƀă ki pơkâ pêi kô pro klêi 4.285 toăng hngêi tung pơla 5 khế môi poê.

“Mơeăm troh a hâi 15/8/2025 kô pro klêi. Ngin xuân hiăng tơbleăng troh mâu kăn pơkuâ kŏng an 180 to cheăm, bêng, pơlê kân vâ vâi pơtối tí tăng ‘nâi plĕng ăm râ đảng, khu kăn pơkuâ cheăm tơring ƀă pơtối tơkŭm khu lêng rơtế ƀă mâu khu lêng dêi râ đảng, khu kăn pơkuâ, kơhnâ veăng tŏng gum kuăn pơlê pro mâu kế tơmeăm ki kố rak vế tơniăn hâi khế, tơdroăng ki pro ƀă ki dâi lĕm dêi mâu tơmeăm ki châ pơkâ pro”.

Rơtế ƀă tơdroăng tơkêa 214 xua Kŏng an kong pơlê pơkuâ po, a kong pơlê Dak Lak ai 3 tơdroăng tơkêa dế pêi pro ƀă ki xiâm pơkâ pro 3.027 toăng hngêi gum mâu rơpŏng ki châ tơnêi têa gum, ngế ki ai hnoăng, rơpŏng kơtiê, rơpŏng vâ chê kơtiê. Mâu tơdroăng tơkêa kố châ xoăng liăn ăm cheăm tơring vâ pro. Pôa Nguyễn Hải Đông, Kăn pơkuâ ngăn Đảng tơring Krông Ƀuk ăm ‘nâi, tơring khŏm mơeăm kô pro klêi tơdroăng ki pro ƀă ‘mêng 141 toăng hngêi apoăng vâ mot tung rơnó mê hngê:

“Ngin hiăng pơkâ mơ’no mâu tơdroăng ki vâ pơkâ pro klêi tâi tâng ƀă tá hngêi ki ‘mêng rơnêu tâi tâng mâu toăng hngêi hdrối hâi lơ 15/7 la ngiâ. Ngin hnê mơhno kơtăng mâu khu ki pro, mâu khu râ, mâu khu mơdró kâ xuân môi tiah mâu kong pơlê tơkŭm vâ ngin pro klêi hdrối tơdroăng pơkâ tâng vâ pơchông ƀă kong pơlê ƀă mâu kong pơlê ki ê tơmiât pro troh roh koh hâk tơbâ Hâi Kăch măng khế 8 ƀlêi trâng”.

Ƀă tơdroăng ki khŏm mơeăm, tơdjuôm ivá dêi mâu khu pơkuâ tơdroăng kal kí a Dak Lak, mâu toăng hngêi ki krá kâk dế rĕng châ pơhêh teăng ăm mâu hngêi ki tơ’nhiê xi kơchoh. Toăng hngêi nếo kô pro tơ’nôm ivá vâ mâu rơpŏng tơkâ luâ xơpá, ai tơ’nôm tơdroăng loi tơngah tung mâu troăng hơlâ tŏng gum, troăng hơlâ pơkâ dêi Đảng ƀă tơnêi têa, mơeăm mơnhông tung tơdroăng rêh ối.