VOV4.Xơ Đăng - Tơdroăng môi cheăm môi tơmeăm (pơxá tơdroăng OCOP) a kong pơlê Dak Lak dế hlo mơnhông mơdêk rơdêi. Rế hên tơmeăm pêi lo OCOP châ mơnhên 3-4 hơlŏng. Tơdroăng kố po rôh mơnhông mơdêk tơmeăm pêi lo ing chiâk deăng kong pơlê, mơdêk cheăng kâ kơpong tung thôn tiô troăng rơhlâ mơ-dêk ki pơxúa dêi tơmeăm pêi lo ing chiâk deăng.

Cho tíu pêi cheăng ai kế tơmeăm pro ing loăng mắc-ca châ mơnhên kế tơmeăm OCOP 4 to hơlŏng râ kong pơlê, Kŏng ti tơlo liăn Damaca Nguyên Phương a cheăm Phú Lộc, tơring Krông Năng dế hơ’lêh nếo troăng pơkâ, kơmăi kơmok mơdêk ki dêi lĕm, túa rơnuâ kế tơmeăm veăng mơnhên tối kế tơmeăm OCOP râ tơnêi têa. Pôa Phạm Đình Nhân, ngế ki pơkuâ ƀơrô cheăng Maketing Kŏng ti tơlo liăn cheăng Damaca Nguyên Phương ăm ‘nâi: sap ing kế tơmeăm châ mơnhên ƀă xúa inâi OCOP hiăng pro chiâng tơdroăng ki loi tơngah ƀă kuăn pơlê ki roê, kế tơmeăm châ tê tung mâu siêu thĭ, tíu ki tê mơdró tơ’lêi hlâu tâ.

Tíu ki uâ pơliê, mơdiê plâi mắc-ca dêi Kŏng ti Tơlo liăn cheăng Damaca Nguyên Phương

Kơxô̆ kế tơmeăm châ tê rế hía rế tâk hên. Krê hơnăm 2021 nah, maluâ tro tơdjâk dêi pơreăng COVID-19 la kŏng ti hiăng tê dâng 70 tâ̆n kloăng mắc-ca.

“Klêi kơ’nâi châ pơkâ mơnhên OCOP 4 to hơlŏng, kŏng ti ôh tá la lâi mơdêk ki dâi lĕm, mâu túa ki rơnuâ pro a tơdrong athế hơ’lêh tâi tâng vâ tơtro ƀă tơdroăng pơkâ dêi OCOP. Pakĭng mê, ngin ối mơjiâng pro hngêi ki mơdêk ki dâi lĕm tung mơjiâng pro vâ veăng OCOP 5 to hơlŏng râ tơnêi têa tơmiât troh mâu đơn pơkâ roê tung tơnêi têa ƀă tê ngi kong têa ê”.

Hlo nhên ki tơƀrê dêi tơdroăng pơkâ rêm to cheăm môi to kế tơmeăm ôh tá xê kơbố ki ê cho kuăn pơlê pêi chiâk deăng – la mâu khu ki veăng tung tơdroăng. Mơhno nhên má môi cho phái krúa lĕm HTB dêi khu pêi cheăng tơrŭm tơkŭm pêi chiâk deăng Thăng Bình, cheăm Čư̆ Kty, tơring Krông Bông.

Sap ing châ mơnhên cho tơmeăm OCOP 3 to hơlŏng, phái hiăng tâk péa hdroh tâng vâ pơchông ƀă hdrối, kơxô̆ phái châ tê xuân tâk sap ing 200 tâ̆n troh 400 tâ̆n tung môi hơnăm, pro pơxúa ‘na hên kơvâ cheăng ăm khu pêi cheăng tơrŭm xuân môi tiah ăm mâu khu ki veăng pêi cheăng tơrŭm.

Pôa Võ Văn Sơn, kăn pơkuâ Khu pêi cheăng tơrŭm tê mơdró tơkŭm pêi chiâk deăng Thăng Bình tối:

“Hdrối nah, kế tơmeăm dêi ngin tá hâi châ kơchơ mơnhên khât mê nôkố châ mơnhên OCOP mê ki kơnía dêi kế tơmeăm tâk hên sap ing yă tê, sap ing tíu cheăng dêi kế tơmeăm kuăn pơlê ki pêi chiâk deăng ai rôh vâ tê dêi hên kế tơmeăm tâ, tơniăn tâ hên. Kơchơ tung kong pơlê, a kong pơlê ki ê tá mâu kong têa ki ê xuân tơniăn tâ há”.

Tíu pêi cheăng dêi Khu pêi cheăng tơrŭm tê mơdró tơkŭm pêi chiâk deăng Thăng Bình séa ngăn tíu ki pêt hdrối rơnó vâ poê báu ki nếo

Tiô khu ngăn chiâk deăng ƀă Mơnhông thôn pơlê dêi kong pơlê Dak Lak, troh nôkố, kong pơlê hiăng ai 72 to kế tơmeăm châ mơnhên cho kế tơmeăm OCOP râ kong pơlê. Tung mê ai 8 to kế tơmeăm châ 4 to hơlŏng, ki hên cho kơphế, ca cao, mắc-ca. Mâu kế tơmeăm ki kố dế pơtối châ ‘no liăn ‘mâi rơnêu mơdêk ki dâi lĕm tơmiât troh tơdroăng ki châ 5 to hơlŏng râ tơnêi têa, mơdêk rôh ki tơ’lêi vâ veăng châ tê tung kơchơ dêi kong têa ê.

Pôa Dương Tín Đức, ngế ki pơkuâ ƀơrô cheăng xing xoăng tơdroăng cheăng thôn pơlê nếo kong pơlê Dak Lak ăm ‘nâi:

“Ngin kô mơ-eăm ƀă tơdroăng tŏng kum dêi tơnêi têa kô ‘mâi rơnêu mơdêk mâu kế tơmeăm sap ing 3 to hơlŏng tâk troh 4 to hơlŏng, sap ing 4 tâk troh 5 to hơlŏng vâ pêi châ mâu tơdroăng pơkâ má môi mê drêng mê ah kô tơdjêp châ mâu kế tơmeăm dêi mâu kơpong malối cho pơkâ mơdêk tê mơdró.

Tâng kế tơmeăm 3 to hơlŏng mê mâu siêu thĭ, mâu tíu xiâm tê kế tơmeăm kô mơnhên, 4 to hơlŏng châ tê tung lâp tơnêi têa ƀă 5 to hơlŏng châ tê iâ hlái a 45 to kong têa veăng tung tơdroăng OCOP kố”.

Ƀă mâu tơdroăng ki hiăng ai hlâu, ki pơxúa ‘na mâu kế tơmeăm pêi chiâk deăng, mơjiâng pro ƀă kŏng, kong pơlê Dak Lak dế tối tơbleăng tơƀrê tơdroăng OCOP vâ mơnhông cheăng kâ kơpong thôn pơlê, ‘mâi mơjiâng tơdroăng ki pêi chiâk deăng, pêi pro châ tơƀrê tơdroăng pơkâ mơjiâng thôn pơlê nếo, mơdêk tơdroăng rêh ối kuăn pơlê.

Hương Lý chêh

Katarina Nga tơplôu ƀă tơbleăng