Cho môi tung mâu khu pêi cheăng tơrŭm ki djâ troăng ahdrối tung kơvâ ôm hyô, pêi chiâk deăng – kong kế nhâ loăng têa, pơlê pơla, Khu pêi cheăng tơrŭm pêi chiâk deăng ƀă ôm hyô Phú Nông – Ƀuôn Đôn, tơring Ƀuôn Đôn, kong pơlê Dak Lak hiăng mơ-eăm tơrŭm mâu ngế cheăng mơjiâng pơlê pơla pro ôm hyô a tơnêi pơlê cheăm dêi tơná. Ƀă tơdroăng ki ai hlâu, pơxúa ‘na tơnêi tơníu kong kế ki chiâng xêh ngiât lĕm môi tiah: Kong loăng nhâ têa, tơnêi kong ki khăng khoăng, kơdrum kong ilâng tơnêi têa York Đôn, tơnêi tơníu ki lĕm a têa kroăng Srêpok ki krip kơdrŏm, troăng têa kroăng, têa klông, long, xí têa, ngo ngối kong, túa lĕm tro, kế kâ mâu hdroâng kuăn ngo ƀă hên ki ê, khu pêi cheăng tơrŭm hiăng xúa ki rơdêi kố vâ pro ôm hyô.

Troh nôkố, hên túa dêi mâu ngế tơrŭm cheăng hiăng châ tơmối ‘nâi troh. Laga, vâ pro chiâng mâu tơmeăm ôm hyô tiô tơdroăng OCOP, Khu pêi cheăng tơrŭm pêi chiâk deăng ƀă ôm hyô Phú Nông – Ƀuôn Đôn, ối trâm hên xơpá, tung mê ai tơdroăng pơkâ. Pôa Trần Văn Toàn, kăn hnê ngăn Hô̆i đong Kuan trĭ khu pêi cheăng tơrŭm ăm ‘nâi:

“Xơpá khât nôkố cho tơvât tung tơdroăng ki ‘no liăn cheăng ƀă mơnhông, xua hrá pơkâ mâu kơpong pro ôm hyô. Pơtih pơhlêh môi iâ tơnêi pêi chiâk deăng chiâng tơnêi tê mơdró lơ cho troăng hnê mơhno vâ xúa tơnêi pêi chiâk deăng ki hên tơdroăng xua mê pro ton hâi khế chiâng hrá tơdroăng pro tung pơla ‘no liăn pro ƀă mơjiâng túa ôm hyô thôn pơlê”.

Tiô pơkâ kơxô̆ 148/QĐ-TTg hơnăm 2023 dêi Ngế pro xiâm hnê ngăn Chin phuh, tơdroăng pơkâ mơnhên tối dêi khu tơmeăm OCOP ôm hyô châ pơkâ nhên, la ôh tá tơ’lêi hlâu vâ pro. Tiô Phŏ Yăo sư - Tiê̆n sih Trần Văn Ơn, ngế cheăng ăm tơdroăng OCOP tơnêi têa, tơdroăng ki pá má môi cho xua tơmeăm ai tơdjâk kơvâ, xua mê, maluâ Dak Lak ối ai hên tơnêi tơníu vâ pro la kô xơpá vâ chiâng tâng ôh tá ai tơdroăng tơrŭm tơdâng tơ’mô ƀă mơdât mâu kơvâ cheăng ki ai tơdjâk.

“Tơdroăng rêm to cheăm môi to kế tơmeăm xua kơvâ pêi chiâk deăng mơnhông thôn pơlê pôu râng hnoăng cheăng, la mâu kế tơmeăm dêi gá ôh ti xê cho dêi kơvâ pêi chiâk deăng mơnhông thôn pơlê mê gá ai tá kế tơmeăm ôm hyô. Mê chiâng pro xêh môi ngế gá pá. Rêm hơnăm kơvâ ôm hyô xuân pro hên. Tâng môi tiah khu pêi cheăng tơrŭm tơniăn ƀă dêi rơpó mê tơmeăm ôm hyô akố kô mơjiâng. Xua tung tơdroăng ki khât hiăng ai hên tơmeăm ôm hyô ki tí tăng kơnía a tơring cheăm Dak Lak kố, la xua pin ngăn hlo tá hâi tơtro khât mê tá hâi ai tơdroăng tơrŭm. Tâng ai tơdroăng tơrŭm kô mơjiâng tơdrêng hlối”.

Pôa Nguyễn Hoài Dương, Kăn pơkuâ ngăn Chiâk deăng ƀă Mơnhông thôn pơlê kong pơlê Dak Lak ăm ‘nâi, tung lâp kong pơlê ai dâng 17 to pơlê mơni kô châ tăng hlo mâu tơdroăng ki xiâm tro ƀă mơjiâng ôm hyô OCOP. Laga, kong pơlê tá hâi mơjiâng châ tơmeăm OCOP, xua túa ôm hyô kố xuân ối cho tơdroăng ki pro xêh, pro iâ êt, ukố utá, ki hên cho tí tăng pro mâu tơmeăm ki ai hlâu, tá hâi pro chiâng tơdroăng ki xiâm ‘na túa lĕm tro ƀă ki kơnía tâk dêi kế tơmeăm. Dak Lak dế mơ-eăm xúa mâu troăng hơlâ tŏng gum vâ mơjiâng tơmeăm OCOP ôm hyô tơxâng ƀă ki ai hlâu, ki pơxúa dêi kong pơlê.

“Mâu kơ koan ki ai tơdjâk troh athế ai hên tơdroăng hnê mơhno vâ mâu khu mơdró kâ, khu pêi cheăng tơrŭm ƀă vâi krâ nhŏng o a mâu cheăm tơring, malối cho a mâu kơpong ki ai hlâu ‘na tơdroăng ôm hyô hlo mâu tơdroăng pơxúa ƀă mơjiâng chiâng mâu tơmeăm ôm hyô OCOP vâ mơnhông tơƀrê tâ nếo mâu tơnêi tơníu ki ai hlâu kố”.

Tơdroăng ki Dak Lak mơnhông ôm hyô tro ƀă tơdroăng OCOP kô veăng gum mơdêk tơxâng mâu kế tơmeăm ôm hyô, pro pơxúa hên ‘na cheăng kâ, pêi châ liăn ăm kuăn pơlê. Ing mê, gum pơlê pơla hlê plĕng tâ tung tơdroăng rak vế mâu tơdroăng ki kơnía ‘na túa lĕm tro tiô khôi hmâ.