VOV4.Xơ Đăng - Troăng prôk cho tơmeăm ki kal vâ mơnhông cheăng kâ, rêh ối a kơpong thôn. Mê a tơring Čư Mgar, kong pơlê Dak Lak, kuăn pơlê dế tô tuăn, hêng hôu drêng troăng kân kơxô̆ 8 dêi kong pơlê mơjiâng pro pơla troăng tơkâ luâ cheăm Ea Kpam nếo klêi ‘no liăn mơjiâng pro, ‘mâi rơnêu la hiăng tơ’nhiê, hlo ai tíu “kơ hlong kơ hlăng’’, pro chiâng rơ-iô, ôh tá tơniăn ăm tơdroăng prôk troăng. Tơdrêng amê, tơdroăng vê hdró mơjiâng pro ai hên mâu tơdroăng ôh tá tro, tơvâ tơvân, pro troăng prôk thăm rế rơ-iô ăm mơngế ƀă rơxế ki prôk.

Troăng ki lăm ngi kong pơlê kơxô̆ 8, troăng ki tơkâ luâ cheăm Ea Kpam, tơring Čư̆ Mgar tung plâ hên hơnăm hiăng tơ’nhiê ó khât, prôk lăm xơpá. Hơnăm 2021, troăng kố châ Khu ngăn troăng prôk ƀă rơxế kơtâu kong pơlê Dak Lak kĭ pơkâ tơdroăng tơkêa ‘mâi rơnêu. Ƀă troh mơ’nui hơnăm mê troăng kố rơnêu hiăng klêi. Tơdroăng ki phiu ro tá hâi châ ton, kuăn pơlê akố hiăng hêng hôu xua troăng prôk ki kố hiăng tơ’nhiê ó, hlo ai hên mâu tíu ki kơhlŏng, kơhlăng.

Môi ngế kuăn pơlê a thôn 1, cheăm Ea Kpam ăm ‘nâi, troăng ki kố tơ’nhiê klêi kơ’nâi drêng bu hiăng klêi pro ƀă mơni kô trâm hên tơdroăng xía vâ tơklâm  rơxế, malối cho a kong măng:

“Hlo ôh tá tơniăn khât, pro troh a pêng iâ la pro ‘na ngiâ mê ‘na rŏng hiăng tơ’nhiê, nôkố hên hĭn tíu ki kơhlong kơhlăng, ‘mâi ah ‘mêng nếo, lăm hiăng to lâi rôh ôh xuân ối tiah mê. Kong măng vâi ngăn ôh tá châ xáu hlo troăng mê tơ’lêi tro kơtong. Pơtih nôkố ôh tá mơhúa kơtong klêh akố gá bu hlâ xo, ôh tá châ ối rêh”.

Drô ngiâ troăng chhá kơxu hlo ai mâu tíu ki kơhlong kơhlăng, mơni kô tơ’lêi kơtong, tơklâm rơxế malối cho a kong măng

Pôa Nguyễn Hữu Chung, kăn phŏ hnê ngăn Vi ƀan cheăm Ea Kpam ăm ‘nâi, Troăng ki lăm ngi kong pơlê kơxô̆ 8 nếo ‘no liăn pro la hiăng tơ’nhiê pro kuăn pơlê a cheăm kố hêng hôu. Hên rôh tơklâm, kơtong rơxế xuân hiăng trâm a kong măng drêng kuăn pơlê kơto rơxế hon đa klâm, klêh tung tíu ki kơhlong kơhlăng a troăng. Kuăn pơlê xuân hiăng hên rôh tối troh rêm râ ki ai hnoăng pơkuâ, malối cho tung mâu rôh trâm mâ kuăn pơlê dêi mâu kăn Kuô̆k hô̆i ƀă Hô̆i đong hnê ngăn rêm râ.

Laga, troh nôkố troăng ki kố xuân tá châ ‘mâi rơnêu pro tơdroăng ki prôk lăm dêi kuăn pơlê mơni kô trâm tơdroăng ki tơklâm rơxế, kơtong klêh tung mâu tíu ki kơhlong kơhlăng.

“Troăng tơ’nhiê mê pro hên ngế tro  kơtong, tơklâm rơxế. Tâng môi tiah nah gá tơ’nhiê gá tơ’nhiê môi tiah dêi rơpó, kuăn pơlê ‘nâi gá tơ’nhiê hên mê vâi prôk lăm vâi ối ‘nâi hbrâ rơnáu ví ing mâu tíu ki tơ’nhiê. Akố kơbố hmâ mê vâi ‘nâi, tâng tíu ki kơhlong kơhlăng kân hlối mê gá ôh tá rơ-iô to lâi, la hdró ki ku kŭn kố ga trâu khât, hlối tơdjâk troh tơdroăng ôh ti hmâ troăng gu trâu mê pro pin vê rơxế gá pá tâ”.

Kuăn pơlê cheăm Ea Kpam hêng hôu khât drêng troăng prôk kố nếo châ pro la hiăng tơ’nhiê

Tơdroăng tơkêa ‘mâi rơnêu troăng lăm ngi kong pơlê kơxô̆ 8, troăng Km 12+300 troh Km14+950 ƀă ki xŏn lối 2,4km châ Khu ngăn troăng prôk ƀă rơxế kơtâu kong pơlê Dak Lak kĭ pơkâ a khế 4/2021 ƀă tâi tâng kơxô̆ liăn ‘no ai 9 rơtal liăn. Tíu pêi cheăng tiâ mơnhên kơchuâ chêh cho Kŏng ti pêi cheăng tiô rơnó ‘no liăn APP Việt Nam, ƀă ngế ki xo pro mê cho Kŏng ti pêi cheăng tiô rơnó Nam Sơn.

Tơdjâk troh tơdroăng ki troăng lăm ngi kong pơlê kơxô̆ 8 hiăng tơ’nhiê, tơdế khế 7, Vi ƀan hnê ngăn tơring Čư̆ Mgar xuân hiăng ai hlá mơ-éa pơtroh ăm Khu ngăn troăng prôk ƀă rơxế kơtâu kong pơlê Dak Lak pơkâ thế tơleăng mơnhên mâu tơdroăng pơkâ ki u ối. Tiô Vi ƀan hnê ngăn tơring Čư̆ Mgar, nôkố troăng chhá kơxu hiăng hlo ai mâu tíu ki tơ’nhiê kơhlong kơhlăng, ngiâ troăng tro tơlŏng tơ’nhiê.

Tơdrêng a mê, tơdroăng ki pro tíu mơ’no têa tá hâi tơdâng tơ’mô pro ăm têa ôh tá châ hiu, pêng plế a ngâ troăng, pêng mot tung hngêi kuăn pơlê chiâng pro ‘mêi kong prâi tơnêi tíu, tơ’lêi trâm tơklâm, kơtong a troăng.

VOV Tây Nguyên

Katarina Nga tơplôu ƀă tơbleăng