VOV4.Xơ Đăng - Kơxo lơ 30/9, Vi ƀan kong pơlê Dak Nông tơkŭm po leh tơbleăng Pơkâ dêi Ngế pro xiâm hnê ngăn Chin phuh, mơnhên pơlê kong kơdrâm Gia Nghĩa pêi kêi đeăng hnoăng cheăng mơjiâng thôn pơlê nếo ƀă tơdah Mê dái pêi cheăng ối má pái dêi Kăn xiâm hnê ngăn tơnêi têa diâp ăm. Hluâ 10 hơnăm mơjiâng thôn pơlê nếo, troh hơnăm 2020, ai 2 to cheăm dêi pơlê kong kơdrâm hiăng châ Kăn hnê ngăn Vi ƀan kong pơlê Dak Nông mơnhên châ plah thôn pơlê nếo.

Leh tơbleăng Pơkâ dêi Ngế pro xiâm hnê ngăn Chin phuh, mơnhên pơlê kong kơdrâm Gia Nghĩa pêi kêi đeăng hnoăng cheăng mơjiâng thôn pơlê nếo ƀă tơdah Mê dái pêi cheăng ối má pái dêi Kăn xiâm hnê ngăn tơnêi têa

A pơkâ kơxô̆ 472 hâi lơ 18/4/2022, Ngế pro xiâm hnê ngăn Chin phuh hiăng mơnhên pơlê kong kơdrâm Gia Nghĩa pêi kêi đeăng hnoăng cheăng mơjiâng thôn pơlê nếo. Xông tơpui a roh leh, pôa Đỗ Tấn Sương, Kăn hnê ngăn Vi ƀan pơlê kong kơdrâm Gia Nghĩa tối ăm ‘nâi, klêi kơ’nâi pêi kêi đeăng 19/19 túa pơkâ châ plah thôn pơlê nếo, ngiâ méa mâu cheăm ối tung pơlê kong kơdrâm ai hên pơ’lêh hên, cheăng kâ châ tơtêk hên, tơdroăng cheăng kâ châ pơ’lêh păng ‘nâng.

Pêi lo liăn rêm pơ’leăng mâ mơngế a mâu cheăm nôkố châ lối 53 rơtuh liăn/môi ngế/hơnăm, tâk 2,6 xôh tâng pơchông ƀă hơnăm 2011. Pơlê kong kơdrâm nôkố bu u ối 146 rơpŏng kơtiê, châ 0,77%. Kố cho tơdroăng ki apoăng Gia Nghĩa pơtối mơnhông mơdêk tung la ngiâ.

VOV Tây Nguyên/Tơplôu: A Sa Ly