Tung pơla kong dế ối tôu téa a kơhâi, jâ Y H’Xuân, Kăn pơkuâ hnê ngăn Chi ƀô̆ xuân cho Kăn thôn Kuăn Hrêng, cheăm Đăk Tô, kong pơlê Quảng Ngãi lăm troh a hngêi nâ Y Nai hnê tối, mơhnhôk thế rơpŏng nâ Y Nai hnê djâ dêi kuăn ‘nĕng troh a hngêi trung mơhriâm. Nâ Y Nai tối ăm ngin ‘nâi tiah kố, ôh tá xê krê to rơpŏng nâ, mê jâ Y H’Xuân ối kơhnâ troh lăm pôu, hnê tối, mơhnhôk gum hên troh tơdroăng rêh ối, cheăng kâ dêi hên rơpŏng hngêi mơngế Rơteăng a Kon Hrêng:

“Jâ Y H’Xuân cho môi ngế kăn ƀô̆ ki djâ troăng ahdrối, jâ đi đo đo lăm pôu, mơhnhôk ƀă hnê tối vâi krâ-nhŏng o tung pơlê mơnhông pêi cheăng kâ, hnê tối dêi kuăn ‘nĕng i hriâm, rêh kâ ối tro, rơkê. Jâ cho mơngế ki djâ troăng lĕm rơkê vâ vâi krâ-nhŏng o a thôn ngin kố pêi pro ƀối, mơhriâm tuâ vâ la ngiâ ngin pơtối hnê thế dêi kuăn ‘nĕng tơná.”

Ƀă tơdroăng ki mơhnhôk hnối djâ troăng ahdrối dêi jâ Y H’Xuân, tâi tâng vâi o, vâi muăn, kuăn cháu hdrông kuăn ngo a Kuăn Hrêng pơrá lăm troh hriâm a hngêi trung tŭm têk. Nâ ai tối ăm ngin tiah kố: “Vâ châ hluăn ing kơtiê mê athế kơhnâ mơ-eăm mơhriâm chư”. Ai tuăn rơkê plĕng ‘nôi mê nếo chiâng tơmiât tro, hlê rơkê, klê plĕng hên tơdroăng cheăng, kâi chiâng vâ mơhriâm tơdroăng ki nếo”. Xuân kơnôm ai tơdroăng mơhriâm mê ‘na rêh ối dêi kuăn pơlê tung thôn hiăng châ pơhlêh, rế hía rế phâi tơtô, chía niân tâ.

Thôn Kuăn Hrêng dế kố ai lối 400 rơpŏng, ki hên má môi cho hdrông kuăn ngo Rơteăng, nôkố bu ối 6 rơpŏng kơtiê, 7 rơpŏng vâ chê kơtiê. Kơnôm châ tơnêi tea tŏng gum, tâi tâng mâu rơpŏng tung thôn pơlê hiăng ai hngêi trăng, hngêi ối kân rơdâ, krá lĕm, hmiân tuăn, tơkŭm tơmiât to tơdroăng vâ mơnhông tung pêi cheăng kâ.

Hơ’muăn tối ‘na tơdroăng ki khoh kâi châ hluăn kơtiê dêi kuăn pơlê, jâ Y H’Xuân, mơngế ki hiăng vâ chê 20 hơnăm châ kuăn pơlê rah pro kăn thôn, kăn pơkuâ hnê ngăn chi ƀô̆ Kuăn Hrêng, tối ăm ngin ‘nâi tiah kố:

“Á kơdo mơ-eăm đi đo hnê tối, djâ troăng mơhnhôk vâi krâ-nhŏng o tung thôn pơlê mơnhông thôn pơlê nếo, pơhlêh túa cheăng, pơhlêh tơdroăng rêh kâ ối, tâ tá hngêi trăng athế kâng bro kơnâng kâng i krá, pro i krúa lĕm, a drô kĭng troăng hơlâ tung pơlê athế pêt reăng vâ ga lĕm tơ-eăng, mơnâ mâ ngăn tung pơlê pơla. Á xuân hmâ mơhnhôk vâi krâ kuăn pơlê “pơhlêh tuăn tơmiât, túa pêi cheăng kâ” tah lôi mâu túa cheăng kâ ki ôh pá tơtro hdrối mê hía nah. Ton nah, vâi krâ-nhŏng o hmâ pêi to báu chiâk, bu môi rơnó, nốkố vâi krâ-nhŏng o hiăng ‘nâi, hiăng chiâng pêi 2 rơnó báu klâng tung môi hơnăm. Tơnêi chiâk, tơnêi deăng mê pơhlêh pêt to mâu hdrê loăng plâi. Tung kơdrum tâ tá hngêi ƀă a chiâk vâi krâ-nhŏng o athế pêt mâu hdrê loăng ton hơnăm, tê châ kơnâ liăn vâ mơdêk tơdroăng rêh kâ ối, pêi lo liăn ngân. Tung thôn ngin nôkố hiăng pơhlêh hên, mâu vâi rơxông nếo nôkố hiăng kơdo mơ-eăm pêi cheăng kâ, tơ’noăng dêi pó pêi cheăng kâ vâ xông tơtêk, hên rơpŏng hngêi hiăng ai liăn ngân rôe rơxế hon đa, rơxế tu tuh, rơxế pơchoh klâng chiâk, kơmăi uâ kơphế, tâng vâ tối, hngêi rơpŏng ki lâi xuân hiăng ai xêh liăn ngân rôe kơmăi kơmok, rơxế pơchoh klâng chiâk, vâ mơnhông pêi chiâk deăng.”

Tối ‘na ngế kơdrâi Kăn pơkuâ hnê ngăn Chi ƀô̆ cho jâ Y H’Xuân, jâ Lê Thị Kim Hiền-Kăn ƀơrô túa lĕm tro pơlê pơla dêi cheăm Đăk Tô, kong pơlê Quảng Ngãi ai tối ăm ngin ‘nâi, jâ Y Xuân cho môi ngế ki đi đo mơ-eăm, kơhnâ khât tung tơdroăng mơhriâm ki nếo ƀă kơhnâ mơ-eăm hên ‘nâng tung pêi cheăng. Jâ Y H’Xuân cho môi tung preăng hlo ai kăn ƀô̆ mơngế hdrông kuăn ngo a cheăm kố, maluâ hơnăm hiăng chía hên la jâ hiăng’nâi xúa măng pơlê pơla, trối zalo vâ tơpui tơno, hnê tối, tơdjâ troăng tung pêi hnoăng cheăng. Mâu tơdroăng cheăng pơkâ pêi pro dêi cheăm ki pơtroh ăm thôn Kuăn Hrêng pơrá châ pêi pro thâ rĕng, tơ’lêi hlâu. Jâ Lê Thị Kim Hiền tối ăm ngin ‘nâi tiah kố:

“Jâ Y H’Xuân cho môi tung mâu ngế ki djâ troăng ahdrối, kơdo mơ-eăm ing dêi ivá krê tơná ƀă djâ troăng ahdrối tung khu pơkuâ ngăn. Pơla hdrối kố nah, thôn Kuăn Hrêng châ rah xo veăng a Hneăng hôp kân tơ’noăng pâ nhoăm tơnêi têa, cheăm hiăng châ mơnhên jâ ai hên hnoăng ki kân tung tŏng veăng a hneăng mơnhông pêi cheăng kâ tung pơlê hdrông kuăn ngo ki iâ mơngế pơla hơnăm 2020-2025. Nâ xuân hiăng châ râ pá pêng mơhá pri a Hneăng hôp kân mê, cho đảng viên ki djâ troăng pêi pro lĕm tro hnoăng cheăng hnê tối, mơhnhôk tơdjâ kuăn pơlê kơdo mơ-eăm pêi cheăng kâ, pêi lo kế tơmeăm.”

Ƀă hiâm mơno pôu râng hnoăng cheăng, tơdroăng ki djâ troăng ahdrối dêi mơngế đảng viên, jâ Y H’Xuân hiăng chiâng ngế ki loi tơngah kân khât ƀă mơngế Rơteăng a Kuăn Hring, veăng gum thăm mơdêk tơdroăng pêi cheăng kâ-rêh ối pơlê pơla, pơhlêh ngiâ méa thôn pơlê nếo, gum kuăn pơlê rế hía rế ai hên tơdroăng rêh ối phâi tơtô luâ tâ kơ mê nếo.