Rơpŏng jâ H’Sắk a pơlê Mơ Nú, cheăm Čư̆ Á, pơlê kong kơdrâm Pleiku ai 7 ngế, rêh ối tung môi toăng hngêi râ má 4 hiăng châ pro sap ing ton nah. Kơnốu jâ H’Sắk hiăng hlâ xua châi tamo, jâ răk tơ’nôm o kơnốu ki tro chó chêng tơvê kŏng sap ing tơxĭn mê tơdroăng rêh ối cheăng kâ xơpá khât, pêi lo liăn ki xiâm cho ing tơdroăng ki lăm pêi cheăng vâi. Vâ gum rơpŏng jâ H’Sắk mơ-eăm, “Tơdroăng tơkêa pro pơhlêh túa rêh ối cheăng kâ, mơnhông túa kơdroh kơtiê” hiăng gum ăm môi to ro kăn. Jâ H’Sắk phiu ro khât xua kơ’nâi 2 hơnăm păn, ro hiăng ai kuăn.

“Hơnăm kố ro kăn hiăng ai kuăn mê rơpŏng á ro khât, khŏm mơ-eăm ôh tá tê lôi, pơtối păn vâ ăm ai kuăn”.

Tiô jâ Nguyễn Thu Hương, Kăn phŏ hnê ngăn Vi ƀan cheăm Čư̆ Á, pakĭng mê păn ro ing kuăn ro ki khu kăn tŏng gum, hnoăng cheăng kơdroh kơtiê a cheăm ối mơdêk tơƀrê tơdroăng ki ăm mung liăn kơjo, pơhlêh tơdroăng cheăng pêi. 3 hơnăm hdrối, cheăm hiăng hbru 42 to ro ăm rơpŏng kơtiê, tŏng gum kơxô̆ liăn pêi cheăng ăm 10 rơpŏng ƀă ăm 8 rơpŏng mung liăn kơjo ƀă hên ki ê. Jâ Nguyễn Thị Hương ăm ‘nâi:

“Rêm hơnăm cheăm đi đo kơjo mâu tơdroăng tơkêa tŏng gum, túa cheăng kâ rêh ối xua pơlê kong kơdrâm Pleiku ƀă cheăm tŏng gum ăm mâu rơpŏng kơtiê, rơpŏng vâ chê kơtiê ‘na khăm pơlât, hnê hriâm, hngêi ối, liăn mung kơjo, hnê cheăng pêi tơƀrê ăm mâu ngế pêi cheăng, ing mê veăng gum pro pơhlêh tơdroăng rêh ối, thăm mơdêk tơdroăng ki xúa mâu tơdroăng ki ing pơlê pơla tŏng gum ăm rơpŏng kơtiê ƀă rơpŏng vâ chê kơtiê”.

Ki khât gá ăm hlo, rêm rơpŏng kơtiê a pơlê kong kơdrâm Pleiku, kong pơlê Gia Lai ai hên rơpŏng rêh ối pơrá phá ƀă tơdroăng ki rơhêng vâ châ tŏng gum xuân phá ra phá dêi rơpó há. Môi tiah jâ Trần Thị Phượng, 50 hơnăm, a thôn 4, cheăm Trà Đa, pơlê kong kơdrâm Pleiku, klêi kơ’nâi pá puât ‘na kơxô̆ liăn mung ăm dêi rơpŏng hngêi pơlât xua châi tamo ŭm tung châ, rế hía rế kal tơdroăng ki tŏng gum. Ƀă ki khât, ing khu kăn pơkuâ cheăm, khu ngăn vâi kơdrâi, mâu khu ki ai hiâm mơno hơ-ui ƀă hên ki ê hiăng rơtế ƀă dêi rơpó veăng tŏng gum jâ tơkâ luâ rôh ki pá puât khât. Jâ Phượng chôu vế mâu kơxô̆ liăn tŏng gum ki kơnía git mê, ing rêm rôh kâ hmê troh pro ăm jâ môi toăng hngêi ối.

“Rôh ki pá má môi khu kăn pơkuâ hiăng gum rơpŏng á pro ăm rơpŏng á môi toăng hngêi ối, mâu kơvâ cheăng tŏng gum mâu vâi kuăn á ai hmê kâ rêm hâi. Nôkố mâu vâi kuăn á mơeăm hriâm tâp vâ hluăn ing kơtiê. Rôh ki kơnốu á tơamo râ mê cheăm Trà Đa ƀă Khu ngăn vâi kơdrâi gum 5 rơtuh liăn ăm á vâ mung vâi krí kơphế xua rôh ki mê á ối a hngêi pơkeăng mê athế mung vâi krí, môi iâ drêng kơklêa tơ’mô ƀă môi tơdrong rôh ki kơhâi, tuăn mơno á ƀriê khât”.

Pêi pro Tơdroăng kơxô̆ 31-CTr/TU hâi 3/11/2021 dêi Khu pơkuâ ngăn Đảng ƀô̆ pơlê kong kơdrâm Pleiku hneăng 12 “ ‘Na pơtối mơdêk rơdêi hnoăng cheăng kơdroh kơtiê krá tơniăn, mơdêk ki rơkê plĕng tung tơdroăng rêh ối kuăn pơlê, malối cho a mâu pơlê hdroâng kuăn ngo a pơlê kong kơdrâm”, ing hơnăm 2021 troh nôkố, pơlê kong kơdrâm tơrŭm ƀă mâu kơ koan, tíu pêi cheăng, Vi ƀan hnê ngăn mâu cheăm, bêng mơhnhôk mâu khu mơdró kâ, mâu ngế krê ki ai hiâm mơno hơ-ui, khu râng liăn “Xua vâ gum mâu kơtiê pơlê kong kơdrâm” ƀă dêi cheăm tŏng gum ăm 95 rơpŏng pro hngêi ƀă ‘mêng hngêi ki ton ƀă tâi tâng kơxô̆ liăn lối 4,7 rơtal liăn; tŏng kuăn mơnăn păn – hdrê pêt, phon rơvât, kưxô̆ liăn pêi cheăng kâ 1,2 rơtal; gum 252 rơpŏng kơtiê, rơpŏng vâ chê kơtiê, nếo hluăn ing kơtiê mung liăn kơjo gum lối 13,8 rơtal liăn.

Pôa Trần Tấn Quang, Ngế xiâm ngăn Ƀơrô cheăng kâ pơlê kong kơdrâm Pleiku, ăm ‘nâi, kơxô̆ rơpŏng kơtiê a pơlê kong kơdrâm châ 01,24%, ƀă 149 rơpŏng kơtiê. Pơlê kong kơdrâm dế pơtối hriăn ngăn, tơbleăng tơ’nôm hên túa cheăng kâ tơtro vâ pêi tơƀrê tơdroăng cheăng kố:

"Ƀă hnoăng cheăng cho tíu pêi cheăng tơdrêng tơbleăng mâu tơdroăng hnê mơhno dêi pơlê kong kơdrâm Pleiku ‘na tŏng gum rêh ối cheăng kâ ăm mâu kơtiê, tíu pêi cheăng hiăng pêi pro pơhlêh mâu túa tŏng gum túa cheăng kâ, hbrâ rơnáu mâu tơdroăng pêi cheăng kâ tơtro ƀă tơdroăng rêh ối, rêm hvêa chêng prôk hluăn ing kơtiê ƀă hluăn ing kơtiê krá tơniăn . Ƀơrô ngăn cheăng kâ pơlê kong kơdrâm kô pơtối rơtế ƀă Vi ƀan hnê ngăn mâu cheăm, bêng ƀă Tíu xiâm ngăn pêi chiâk deăng hriăn ngăn, tơbleăng hên túa tŏng gum, tơtro ƀă ki ai khât tung tơdroăng rêh ối ƀă pêi cheăng kâ dêi kuăn pơlê, veăng pro mơdêk tơƀrê cho kơdroh kơtiê krá tơniăn a pơlê kong kơdrâm tung la ngiâ”.

Hnoăng cheăng kơdroh kơtiê châ pơlê kong kơdrâm Pleiku kong pơlê Gia Lai pêi pro đi đo pơtối tung hên hơnăm hdrối. Tung pơla mơnhông nếo hnoăng cheăng kố rế châ pơkâ troăng prôk nhên ing tơdroăng ki kơjo gum mâu tơdroăng ‘na tíu kuăn pơlê rêh ối, hngêi ối ƀă tơdroăng ki rơkê plĕng tung rêh ối. Ing mê, thăm mơdêk ki ai hlâu, ivá mơnhông dêi pơlê kong kơdrâm, mơdêk rơdêi mơnhông kơphô̆, cheăng kâ rêh ối pơlê pơla pơlê kong kơdrâm krá tơniăn, tro ƀă rak vế kong prâi tơnêi tơníu.