Pơlê Krông Hra, cheăm Yang Bắc hdrối nah cho môi tung mâu pơlê kơtiê dêi tơring Đăk Pơ. Kuăn pơlê hdroâng kuăn ngo Bơhnéa tíu kố ki hên pêt to loăng plâi iâ hâi, pê lo liăn iâ. Sap hơnăm 2018, châ mâu kăn hnê mơhno ăm mâu đảng viên tung pơlê, hên rơpŏng  kuăn pơlê hiăng pơhlêh tơnêi pêt kơtếo kân rơdâ. Bú kơ’nâi 6 hơnăm, tơdroăng rêh ối dêi kuăn pơlê hiăng pơ’lêh hên. Ngoh Đinh Phới, môi ngế kuăn pơlê ối a pơlê Krông Hra tối:

"Tơnêi kố rế ôh tá hơpok mê kuăn pơlê châ mâu kăn hnê pêt kơtếo vâ tơ’nôm kơxô̆ liăn. Kuăn pơlê Bơhnéa akố ngế ki lâi xuân pêt kơtếo, klêi ko tê dêi péa pái hơnăm klêi mê thế pêt nếo, châ xo kơxô̆ liăn tơniăn. Vâ tơnêi lĕm tâ kuăn pơlê xuân hriâm túa rak ngăn, rơvât phon, péa pái hectar kơtếo xuân ăm châ xo kơxô̆ liăn péa pái hrĭng rơtuh liăn. Rơpŏng hngêi á xuân hiăng pêt ƀă nôkố cha xo dêi péa pái hrĭng rơtuh liăn’’.

Mâu hâi apoăng veăng pêt kơtếo ngoh Phới rơtế ƀă kuăn pơlê  Krông Hra kơdrâ, ôh tá hlê ki klâi ‘na tơdroăng pêi chiâk tiô túa nếo. Laga, châ veăng gum, ing mâu đảng viên tung pơlê hnê túa pêi pêt, kuăn pơlê choâng hmâ hlê iâ, rak ngăn dêi kơtếo rế chiâng kơtếo rĕng kân lĕm. Nâ Đinh Thị Mại, Kăn chi bô̆ vâi kơdrâi pơlê Krông Hra ăm ‘nâi:

“Á châ xoăng pêi hnoăng cheăng pơkuâ ngăn mâu rơpŏng kơtiê vâ kum hnê kuăn pơlê pêi cheăng hluăn kơtiê, xoăng pêi mâu tơdroăng tiô pơkâ vâ veăng mơjiâng thôn pơlê nếo. A mơhnhôk kuăn pơlê rak ngăn loăng plâi mơnăn păn tro tiô tơdroăng, mơhnhôk vâi nâ o kơhnâ mơgrúa lĕm hyôh kong prâi”.

Pakĭng mê, ƀă troăng hơlâ “Kăn ƀô̆ đảng viên prôk hdrối, kuăn pơlê prôk kơ’nâi’’, chi ƀô̆ pơlê Krông Hra xuân cho túa pêi cheăng tơƀrê a pơlê. Pôa Đinh Văn Việt. Kăn phŏ hnê ngăn chi ƀô̆ pơlê Krông Hra tối:

"Chi ƀô̆ pêi klêi hnoăng cheăng kal kí, tơrêm tung tơdroăng hôp tơpui tơno; pêi tơdroăng cheăng môi tuăn, rak tro luât, ƀă ai mâu kăn ƀô̆, đảng viên rak lĕm tro. Pơtối rak vế pêi pro tơdroăng mơhnhôk pêi tro mâu Pơkâ, hnê mơhno, Pơkâ dêi Đảng xúa tung rêh ối vâ mơhnhôk cheăng kâ xuân môi tiah mơjiâng thôn pơlê nếo’’.

Nôkố, Đảng ƀô̆ cheăm Yang Bắc ai 13 chi ƀô̆, 205 ngế đảng viên, tung mê ai 8 chi ƀô̆, thôn, pơlê. Kơnôm pêi tro tơdroăng mơhnhôk, hnê ƀă “râng kŏng mơhno cheăng” dêi khu kăn ƀô̆, đảng viên, mơngế kuăn pơlê pâ nhoăm, mâu hơnăm achê kố, kuăn pơlê a mâu thôn pơlê hiăng ‘nâi xúa khoa hok tung pêi cheăng kâ, pơhlêh hdrê pêt ăm tơƀrê tâ tung cheăng kâ. Mơ’nui hơnăm 2023, kơxô̆ rơpŏng kơtiê dêi cheăm Yang Bắc kơdroh 14%, pêi lo liăn riên rêm ngế châ lối 35,5 rơtuh liăn/hơnăm. Jâ Phạm Thị Thúy, Kăn hnê ngăn Đảng ủy cheăm Yang Bắc tối nhên:

“Tơdroăng pêi pro chi bô̆ 4 tơdroăng lĕm tro hiăng pro sap apoăng hơnăm. Drêng tơbleăng mâu tơdroăng cheăng mơjiâng cheăng kâ rêh ối, cheăng lêng kring tơniăn, mơjiâng tơdroăng cheăng kal kí, mơnhông Đảng mê đảng ƀô̆ tơbleăng hnê ăm mâu chi ƀô̆, krếo rêm râ ủy troh vâ hriâm hnê môi tiah hmâ hôp tơpui hnê tối ‘na chuyên đề; pơkâ séa ngăn, hnê nhên. Troh nôkố mâu chi ƀô̆ hiăng chêh inâi a Đảng ủy cheăm, mơ-eăm mơnhông chi ƀô̆ pêi pro 4 tơdroăng ki lĕm tro tung hơnăm kố’’.