VOV4.Xơ Đăng - Khu xiâm ngăn ‘na chiâk deăng ƀă mơnhông thôn pơlê nếo ai hlá mơ-éa pơtroh ăm Ngế pro xiâm hnê ngăn Chin phuh ‘na tơdroăng kĭ Mơdêk ôm hyô tung thôn pơlê mơjiâng thôn pơlê nếo pơla sap hơnăm 2021-2025.

Tiah mê, tâi tâng kơxô̆ liăn pêi pro Tơdroăng kố tiô tối hdrối dâng 2 rơpâu 500 rơtal liăn, pêi pro Tơdroăng pơkâ tơnêi têa mơjiâng thôn pơlê néo hneăng hơnăm 2021 – 2025. Tung mê, kơxô̆ liăn Tơnêi têa kum tơdrêng sap ing Tơdroăng pơkâ tơnêi têa mơjiâng thôn pơlê nếo dâng 500 rơtal liăn; kơxô̆ liăn dêi kong pơlê 550 rơtal liăn; kơxô̆ liăn tŏng kum tơlo sap ing mâu tơdroăng tơkêa, tơdroăng pơkâ ki ê 560 rơtal liăn; kơxô̆ liăn mung ƀă mơhnhôk tơlo sap ing pơlê pơla dâng 890 rơtal liăn.

Tơdroăng kố cho vâ mơdêk rơdêi mơnhông ôm hyô thôn pơlê tơtro ƀă mơdêk ki ai hlâu, ki pơxúa ‘na pêi chiâk deăng, pơlê pêi cheăng, mơhno túa lĕm tro ƀă tơdroăng kong prâi tơnêi tơníu dêi mâu kong pơlê. Tơdrêng amê hlối mơdêk ki rơkê plĕng tung tơdroăng rêh ối liăn ngân, hiâm mơno dêi kuăn pơlê a thôn pơlê, veăng kum hơ’lêh tơdroăng cheăng kâ thôn pơlê tiô troăng tơkŭm ki hên tơdroăng kơnía ƀă mơnhông krá ton.

Tơdroăng ki rơhêng vâ troh hơnăm 2025 cho mơnhông, hơ’lêh tơtro mâu tíu troh ƀă kế tơmeăm ôm hyô thôn pơlê. Ki nhên rêm kong pơlê, pơlê kong kơdrâm mơ-eăm ai iâ hlái 1 tíu ôm hyô thôn pơlê châ mơnhên tơtro ƀă ki pơxúa ‘na pêi chiâk deăng, mơhno túa lĕm tro, pơlê pêi cheăng lơ kong prâi tơnêi tơníu dêi kong pơlê; iâ hlái ai 500 tíu tê mơdró ôm hyô thôn pơlê châ mơnhên ối pơtăng lơ mơnhên châ ki pơkâ tro tung tơdroăng kum tơmối ôm hyô.

Tơdroăng mơdêk rơdêi ôm hyô thôn pơlê tơtro ƀă tung pơla hơ’lêh kơxô̆ ƀă Tơdroăng rêm to cheăm môi to kế tơmeăm OCOP ƀă ki iâ hlái ai 80 to kế tơmeăm ôm hyô pơlê pơla ƀă tíu ôm hyô thôn pơlê châ mơnhên châ tiô pơkâ OCOP sap ing 3 hơlŏng tơngi klêng ƀă châ châ tro pơkâ; tung mê iâ hlái ai 50% tíu ôm hyô pơlê pơla ƀă tíu ôm hyô thôn pơlê châ hơ’lêh ƀă tơdjêp tung trang mơđah tơbleăng, pơkâ mơdêk ôm hyô ƀă kơmăi kơmok kơxô̆.

Tơdroăng kố, kô mơ-eăm tâi tâng mâu tíu ôm hyô thôn pơlê châ tơbleăng mơđah; 50% tíu ôm hyô thôn pơlê xúa mâu tơdroăng xúa điê̆n tưh tung tơdroăng cheăng ôm hyô. Rêm tơring thôn pơlê nếo ai kế tơmeăm ki hiăng ai hlâu ôm hyô mơjiâng iâ hlái 1 túa pơkâ tíu tơrŭm ôm hyô pêi chiâk deăng thôn pơlê ki xiâm.

Iâ hlái70% ngế ki pơkuâ tíu ôm hyô thôn pơlê châ hnê, hriâm ‘na hnoăng cheăng rak ngăn ôm hyô ƀă hên ki ê, malối cho mâu tíu ki ‘măn rak hlá mơ-éa ƀă lơgât kơxô̆ mâu tíu ôm hyô thôn pơlê tung lâp tơnêi têa.

Vâ pêi pro Tơdroăng kố, mâu kơvâ cheăng ki ai tơdjâk kô séa ngăn, pêi pro klêi mâu troăng hơlâ tŏng kum ‘na mơnhông mơdêk ôm hyô thôn pơlê. Mơjiâng troăng tơmiât mơnhông ôm hyô thôn pơlê ƀă tơkŭm, ‘mot tơ’nôm mơnhông cheăng kâ rêh ối pơlê pơla, túa pơkâ troăng ôm hyô tơnêi têa ƀă túa pơkâ thôn pơlê nếo. Mâu kong pơlê ai hlâu tơdroăng ôm hyô mơjiâng tơdroăng tơkêa, tơdroăng lơ túa pơkâ mơnhông ôm hyô thôn pơlê hneăng hơnăm 2022 – 2025, tơtro ƀă tơdroăng séa ngăn mâu tíu ôm hyô thôn pơlê tơtro ƀă túa pơkâ ki ai tơdjâk.

Tơdrêng amê, Tơdroăng kố ối mơjiâng ƀă pêi pro klêi tơdroăng pơkâ tro, kơlo pơkâ ‘na kih thuât ‘na ôm hyô thôn pơlê; séa ngăn; ‘mot tơ’nôm mâu troăng hơlâ mơhnhôk, tơ’mot ‘no liăn, mơnhông ôm hyô thôn pơlê’’ mơdêk tơrŭm cheăng tơdjuôm – tơrŭm cheăng krê, tơrŭm cheăng tơdjuôm – tơrŭm cheăng krê – tơrŭm cheăng pơlê pơla, mâu túa pơkâ rak ngăn tơkŭm mâu kơpong tơdjuôm ƀă krê, khu mơdró kâ ƀă pơlê pơla tung mơnhông ôm hyô thôn pơlê.

Tơdroăng kố ối mơhnhôk, veăng kum ƀă xúa tơƀrê mâu kơxô̆ liăn ăm mơnhông ôm hyô pơlê pơla ‘no liăn cheăng, malối cho dêi khu mơdró kâ, pơlê pơla ƀă hên ki ê ăm mơnhông ôm hyô thôn pơlê. Tơdroăng kố kô hnê tơ’nôm ƀă mơdêk ivá ăm mâu ngế pêi cheăng ôm hyô thôn pơlê. ‘Mot mâu tơdroăng ki kal hnê tơ’nôm ‘na ôm hyô tung mâu tơdroăng hnê dêi mâu ki hnê cheăng a kong pơlê kơpong.

Malối, vâ xúa kơmăi kơmok, mơdêk hơ’lêh kơxô̆ tung mơnhông ôm hyô thôn pơlê, Tơdroăng kố kô chêh pro mâu lơgât kơxô̆ mâu kế tơmeăm ôm hyô thôn pơlê, tŏng kum tơdjêp kế tơmeăm ôm hyô thôn pơlê ƀă mâu kế tơmeăm ôm hyô ki ê kum ăm tơdroăng ki pơkâ mơdêk ôm hyô thôn pơlê. Ki ê mơjiâng tíu ki ‘măn rak hlá mơ-éa môi tuăn sap ing Tơnêi têa troh kong pơlê kum ăm tơdroăng rak ngăn, mơđah tơbleăng ƀă pơkâ mơdêk ôm hyô thôn pơlê; lơ mâu trang điê̆n tưh ‘na ôm hyô thôn pơlê.

VOV1

Katarina Nga tơplôu ƀă tơbleăng