Tơxông prông, trŏng xăng, í pôh, pheăng, hơ’nêh prông tung klŏng cho tơmeăm kâ hiăng hmâ ƀă kuăn ngo Rơđế a cheăm Chư Huê, tơring Ea Kar xuân môi tiah hên pơlê ki ê a kong pơlê Dak Lak... Bú ing mâu kơchâi kâ mê ing kơpeăng kŏng đảng viên H’Bút Bi Mlô, ối a ƀuôn M’oa, cheăm Čư̆ Huê, mâu kơchâi kâ tiô khôi hmâ pơchên tiah ton nah mê ối mơhno tơmeăm khoăng, chiâng tơmeăm kâ, tê châ rơtal liăn rêm hơnăm.

Nâ H’But Bi ăm ‘nâi, a hdrối nah cho ngế cheăng tung ƀơrô pơla 10 hơnăm mê nâ hlê tơdroăng kal vâ kâ kơchâi klâi, đrêng trâm mâ tơpui tơno xah hêi dêi mâu ngế ki pêi cheăng, mâu kăn pơkuâ mâu tíu pêi cheăng, khu mơdró a tơring. Hiăng ai hlâu 2 toăng hngêi trá xŏn ton nah dêi rơpŏng hngêi tung kơdrum ngiât lĕm, nâ khên po hngêi pế pơchên mâu kơchâi kâ dêi kuăn ngo Rơđế ƀă tê tơmeăm vâ ăm tơbâ ‘măn rak dêi vêa vong Rơđế.

Tơkâ luâ tơdroăng pá tung 2 hơnăm pơla ai pơreăng COVID-19 tâ tú, hngêi pế pơchên hmê kơchâi dêi nâ H’But Bi hiăng chiâng tíu ki vâi ô eăng, tơ’mot hên 200 - 300 ngế tơmối troh rêm hâi. Nâ H’But Bi tối:

“Ƀă hnoăng cheăng cho 1 ngế đảng viên, á dế rêh ối pêi cheăng a chi ƀô̆ pơlê, á hâk vâ ƀă túa lĕm tro kuăn ngo Rơđế tơná, á tê kơphế, klêi mê tê tơmeăm kâ ôu ăm tơmối ƀă tơbleăng túa vêa vong lĕm tro kuăn ngo Rơđế Tơná. Drêng tơnêi têa mơhnhôk pleăng tơnêi vâ pro troăng, rơpŏng hngêi á xuân hiăng pleăng 1 met tơdế  tơnêi ki mơgăn xŏn lối 40 met vâ ăm kuăn pơlê pin ai troăng prôk tơ’’lêi hlâu”.

Tâng môi tiah đảng viên H’But Bi pơtối rak ivá ki rơdêi dêi  hơnăm ối nếo rơkê plĕng khên pêi cheăng vâ mơnhông cheăng kâ, mê pôa Y Quá Mlô cho ngế hiăng hên hơnăm tuăn rế chân krá.  Hơnăm kố hiăng 68 hơnăm, cho đảng viên hơnăm hiăng krâ a chi ƀô̆ buôn Tơng Kroa, plâ mâu hơnăm ối nếo xuân hiăng pro kăn cheăm Čư̆ Huê. Troh drêng pơtê cheăng hơnăm hiăng krâ, pôa Y Qúa nếo pơxiâm pêi cheăng ‘na kơvâ chiâk deăng. 8 hơnăm hmâ ƀă chiâk deăng, pôa hiăng mơjiâng pro kơdrum deăng tung mê pêt 2.000 xiâm kơphế, 400 xiâm tiu, lối 1 sào pêt nhân chĕm ro ƀă pú pái. Nôkố rêm hơnăm ing păn mơnăn, pêi chiâk, pôa pê lo liăn châ hrĭng rơtuh. Ai liăn vâ pêi cheăng kâ, pôa mơ-eăm kơjo kum kuăn pơlê ki xơpá tung pơlê mung luăn, hnê kih thuât pêt rak ngăn loăng plâi; veăng ‘no kơxô̆ liăn mơjiâng thôn pơlê nếo. Pakĭng mê, pôa ối pleăng hrĭng met karê tơnêi ăm pro troăng prôk. Pôa Y Qúa Mlô tối, pêi tŭm tơdroăng klâi, pôa xuân chôu pâ tơná cho mơngế đảng viên.

“Á cho đảng viên hiăng pơtê cheăng xua hiăng krâ, á xuân ối mơ-eăm pêi cheăng tâi ivá vâ pêi cheăng, rơpŏng hngêi á pêt kơphế, pêt tiu, păn 10 to ro ƀă 20 to pu pái. Tung tơdroăng mơhnhôk pro rơchôa, rơpŏng hngêi a pleăng 2,5 ha tơnêi vâ ăm kâng pro rơchôa Ea Bư. Pêi pro tiô tơdroăng mơjiâng thôn pơlê nếo, rơpŏng hngêi á xuân pleăng lối 500 m2 tơnêi vâ pro troăng. Pêi pro tiô tơdroăng  mơhnhôk mơjiâng thôn pơlê nếo, rơpŏng hngêi á pleăng 500 m2 tơnêi vâ pro troăng’’.

Lâp tung tơring Ea Kar nôkố ai 7.000 ngế đảng viên, tung mê ai 1.250 ngế đảng viên cho kuăn ngo, châ 18%. Tiô Khu pơkuâ hnê ngăn Đảng tơring Ea Kar, ki hên kơxô̆ đảng viên tung đảng ƀô̆ hiăng mơhno hnoăng cheăng ki djâ troăng tung pêi chiâk mơnhông cheăng kâ, veăng pêi tŭm tơdroăng mơhnhôk veăng tơlo liăn, kơjo kum, pleăng tơnêi mơjiâng thôn pơlê nếo a kong pơlê. Mâu đảng viên môi tiah Y Quá Mlô ƀă H’But Bi Mlô xuân cho đảng viên pêi cheăng tơƀrê, pro xiâm ki tơbleăng lâp lu tơdroăng mơhnhôk cheăng kâ, veăng ‘no hnoăng mơjiâng thôn pơlê nếo a pơlê.

Pôa Y Nhuân Byă, Kăn pơkuâ hnê ngăn Đảng tơring Ea Kar ăm ‘nâi, tơdroăng cheăng ’mot đảng viên tung hdroâng kuăn ngo đi đo châ tâi tâng Đảng tơmâng khât. Tung la ngiâ kố rế hên ngế djâ troăng a hdrối tung đảng viên pêi cheăng kơhnâ rơkê, mơhno troăng ăm kuăn pơlê a mâu pơlê hlo pêi ƀối khên tơnôu pêi chiâk, tê mơdró, mơnhông tơdroăng rêh ối. Pôa Y Nhuân Ƀyă tối:

“ ‘Na ’mot mơngế mot đảng viên tung hdroâng kuăn ngo mê châ ngin tơmâng khât, kố cho tơdroăng ki tăng xiâm mơngế vâ mot đảng viên tung mâu râ ki pơtối. Mâu đảng viên a cheăm Čư̆ Huê kơpong hdroâng kuăn ngo cho mâu ngế ki djâ troăng a hdrối vâ kuăn pơlê ƀă đảng viên ki ê hriâm ƀối. Tung mâu rôh po hneăng hôp dêi khu ngăn Đảng tơring, ngin xuân tơbleăng vâ pơ-eăng lâp lu tung mâu đảng ƀô̆’’.

Tơdroăng tơmâng tăng ‘mot mơngế mot Đảng tung kơpong kuăn ngo a mâu chi ƀô̆ Đảng a tơring Ea Kar tung pơla hdrối kố nah hiăng ƀă dế veăng mơnhông tơƀrê mâu tíu tơrŭm cheăng Đảng rơdêi. Tơdrêng amê, tơdroăng pơtối rak vế hnoăng pêi pro djâ troăng ahdrối dêi đảng viên tung tơdroăng mơhnhôk tơ’noăng  pêi cheăng kâ tê mơdró rơkê, veăng ‘no hnoăng, kơjo kum, pleăng tơnêi pro troăng prôk xuân hiăng veăng ‘no hnoăng mơjiâng pơlê rế ton rế tơƀrê lĕm, rơkê, pơtối rak lĕm tro vêa vong hdroâng kuăn ngo, mơjiâng krá kak tâ tơrŭm môi tuăn tâi tâng hdroâng mơngế.