VOV4.Xơ Đăng - Pơla hdrối kố nah, malối tung rôh leh lơ 30/4 ƀă lơ 1/5 nếo achê kố, tơdroăng ôm hyô mơhno túa le\m tro mâu hdroâng kuăn ngo rêh ối akố mâu tơdroăng pêi ki tơviah, nếo hiăng tơ’mot hên tơmối troh ôm hyô. A kong pơlê Dak Lak, túa ki kố dế mơhno troăng prôk châ tơ-brê ăm kuăn pơlê mâu hdroâng kuăn ngo lăm ôm hyô a pơlê tơná.

Mâu tơdroăng cheăng ki mơnúa ngăn ‘na mơhno túa lĕm tro dêi mâu hdroâng kuăn ngo a pơlê kong kơdrâm Ƀuôn Ma Thuột tung rôh leh hơnăm kố ai: mơđah tŏn, rêi mâu proâ khôi chal krâ nah, tơdroăng cheăng khôi hmâ; hơdruê xuâng mâu hdroâng kuăn ngo Tây Nguyên, ôu drôu xiâm, kâ kế kâ mâu hdroâng kuăn ngo ƀă mâu tơdroăng leh khôi hmâ dêi mơngế Rơđế.

Ngoh Lê Ngọc Tân, tơmối lo ing pơlê kong kân Hà Nội, veăng tung mâu mơdĭng ivá khôi hmâ dêi mơngế Rơđế a ƀuôn Tơng Jŭ, cheăm Ea Kao, tối:

‘’Rôh apoăng á veăng tung mâu rôh mơdĭng ivá hlo gá ro khât ƀă xuân châ hlo tơdroăng ki Têt hdroâng kuăn ngo akố gá kal châ rak vế. Ai hên tơdroăng ki tơviah sap ing ếo pơtâk dêi hdroâng kuăn ngo akố, sap ing kơnốu lơ kơdrâi lơ ai mâu chêng koăng, idrâp tơdrá proâ ki hơniâp ai túa ki mơđah tơbleăng, lơ ai mâu tíu, tơdroăng ki phá tơ-ê ƀă pơlê kong xiâm Hà Nội lơ mâu hdroâng kuăn ngo Xuăn.

Ai hên tơdroăng ki apoăng, la xuân rơhêng vâ cho ai hên rôh châ vêh akố vâ veăng tung mâu rôh mơdĭng dêi hdroâng kuăn ngo rĕng tâ ƀă châ veăng tung mơdĭng kố châ tŭm, tâi tâng tâ”.

Mơđah tơbleăng hơdruê xuâng khôi hmâ ƀă rêi mâu proâ khôi hmâ ton nah

Jâ H’Yam Ƀuôn Krông, ngế ki pơkuâ xiâm ôm hyô pơlê pơla ƀuôn Tơng Jŭ, cheăm Ea Kao ăm ‘nâi, rơtế ƀă tơdroăng ki vêh pêi pro mâu tơdroăng mơdĭng ivá tiô khôi hmâ, tung rôh leh pơtê hơnăm kố, a kơpong ôm hyô pơlê pơla ƀuôn Tơng Jŭ ối tơkŭm po pế pơchên kế kâ ăm mâu vâi kơdrâi tung khu a cheăm Ea Kao veăng. Mâu nâ, o a rêm thôn, pơlê mơjiâng môi khu tơ’noăng, vâi kơdrâi, mâu tơmối troh veăng a kơpong ôm hyô kô châ kâ ƀă châm điêm kế kâ dêi mâu đô̆i. Kố cho tơdroăng ki vâ mơnhông ôm hyô pơlê pơla a cheăm.

‘’Xuân ai hên khu tơmối sap ing mâu kong pơlê ki ê vêh troh akố vâi châ kâ mâu kế kâ dêi hdroâng kuăn ngo mê nếo châ hmâng tŏn chêng koăng, vâi châ mơnúa ngăn, châ tăng ‘nâi ‘na mơhno túa lĕm tro dêi hdroâng kuăn ngo akố. Ngin xuân xing xoăng rêm ngế môi tơdroăng cheăng, pơtih hngêi ki pêt kơchâi, hngêi ki păn chu, hngêi ki păn í, mê nếo hngêi ki pế drôu xiâm”.

Ôu drôu xiâm

A mâu tíu ki ê, môi tiah a Tíu ‘măn rak kế tơmeăm khoăng Dak Lak, ƀuôn Akŏ Dhông, tơmối châ tăng ‘nâi cheăng teăn kế tơmeăm, tơdroăng ki pro mâu proâ sap ing kơlá phêa ƀă châ ôu drôu xiâm dêi mơngế Rơđế. Ngoh Hảng A Chu, hdroâng kuăn ngo HMông, a tơring Dak Glong, kong pơlê Dak Nông, mơnúa ôu ngăn drôu xiâm ki vâi hiăng pế ‘măn ton hơnăm ăm ‘nâi:

‘’Khôi túa dêi hdroâng kuăn ngo akố gá phá tơ-ê ƀă hdroâng kuăn ngo á ƀă á xuân rế rơhêng vâ ‘nâi tơ’nôm hên tơdroăng, hên kế tơmeăm. Ki nhên ‘na drôu xiâm, gá phá tơ-ê ƀă hdroâng kuăn ngo á, lơ môi tiah kế kâ mê xuân phá tơ-ê, gá phá tơ-ê tâi tâng yoh. Ai mâu kế, tơdroăng ki á troh akố á châ êng hên, hên tơdroăng”.

Mơđah teăn ƀă mâu ki rêi, hlŭm ƀă mâu kơlá, phêa

Klêi kơ’nâi khế hơnăm tro tơdjâk xua pơreăng COVID-19, mâu tíu ôm hyô pơlê pơla a pơlê kong kơdrâm Ƀuôn Ma Thuột hiăng vêh lôu péa nếo ƀă hên tơdroăng pêi pro ai pơxua hơniâp. Tung mê, ôm hyô mơhno túa lĕm tro mâu hdroâng kuăn ngo akố gá phá tơ-ê, hơniâp ro phá krê xêh dêi pơlê kong kơdrâm, châ pro nếo, pro trâu tơ’nôm klêi kơ’nâi rêm hơnăm, vâ rêm rôh troh akố, tơmối ai tơ’nôm tơdroăng ki châ mơnúa ngăn.

Ƀă vâi krâ nhŏng o ối hâk tơngăm tơtro ƀă mâu khôi túa lĕm tro hdroâng kuăn ngo tơná tơbleăng ăm mâu tơmối ki lĕm tơviah dêi pơlê, cheăm.

H’Xíu H’Mok chêh

Katarina Nga tơplôu ƀă tơbleăng