Tung toăng hngêi ki nếo pro klêi, nâ Nguyễn Thị Lệ Thu a Tôh kơphô̆ 4, bêng Tân Hòa, pơlê kong kơdrâm Ƀuôn Ma Thuột, kong pơlê Dak Lak ăm ‘nâi, nâ dêi 3 ngế kuăn, ôh tá ai kơnốu, hên hơnăm ối dêi ƀă dêi nôu. Toăng hngêi nếo rơdâ vâ chê 40 met karê hiăng gum 4 ngế nôu kuăn ai môi toăng hngêi hơtôu:

“Hdrối nah ối a hngêi dêi nôu, kong mê hngêi xi kơchoh, kong tôu mê gá tôu ó ƀă ai mâu ngoi kơtâk ngin ối tung mê pá khât. Khu xiâm ngăn Kŏng an diâp hngêi, 4 ngế nôu kuăn ngin ai hngêi ối rơngiâp a rôh kong tôu, hơtôu a rôh kong mê mê á phiu ro khât, ôh tá tôu tuăn xếo tơdroăng ki hngêi tro xi kơchoh a kong mê, ngôi kơtâk a kong tô. Tơná á ôh tá pêi lo liăn mê ôh tá khên tơmiât troh tơdroăng ki châ pro hngêi ối môi tiah kố”.

Rơpŏng nâ H’Ñuân Knul cho môi tung mâu rơpŏng kơtiê má môi a ƀuôn Tiêu, cheăm Ea Tiêu, tơring Čư̆ Kuiñ, kong pơlê Dak Lak. Nâ ăm ‘nâi, rơpŏng ai 6 ngế la ôh tá ai tơnêi pêi kâ, tơdroăng rêh ối bu tơkôm to tung tơdroăng ki lăm pêi cheăng vâi dêi péa on veăng nâ. Xua tơdroăng rêh ối rơpŏng hngêi pá puât mê nâ chiâng chiu ối tung hngêi ki hiăng xi kơchoh. Nâ H’Ñuân xuân tơmiât tiah mê, rơpŏng nâ kô ôh tá la lâi kâi châ pro môi toăng hngêi ki lĕm, la nôkố, nâ hiăng ai môi toăng hngêi ki meăm ƀă xi mong:

“Hdrối nah, on veăng má roê hngêi loăng mơdâng ƀă kơnâ 3 rơtuh liăn, la nôkố pên ƀă tôl hiăng tơ’nhiê tâi. Mê peăng kŏng an troh pro ăm môi toăng hngêi ki lĕm, 6 ngế ối tung hngêi nếo gá ro khât, ôh tá tôu tuăn xếo tơdroăng ki kong mê, kong tôu. Nôkố on veăng má bu tơmiât to pêi cheăng vâ păn rak kuăn hriâm tâp xo”.

Tiô pôa Hồ Viết Hùng – Kăn phŏ hnê ngăn Vi ƀan cheăm Ea Tiêu, tơring Čư̆ Kuiñ, Tơdroăng tơkêa dêi Khu xiâm ngăn Kŏng an a cheăm ai 22 rơpŏng pá puât ‘na hngêi ối châ diâp ăm hngêi tuăn hơ-ui. Tâi tâng kơxô̆ liăn ‘no cho 1 rơtal 760 rơtuh liăn. Nôkố mâu rơpŏng pơrá hiăng châ xo hngêi ƀă hiăng mot ối. Tơdroăng ki tŏng gum hngêi ối ôh ti xê to gum mâu rơpŏng tơniăn rêh ối pêi cheăng, mê ối gum cheăm tơring pêi klêi tơdroăng pơkâ ‘na gum hngêi ối tung mơjiâng thôn pơlê nếo. Pôa Hồ Viết Hùng ăm ‘nâi:

“Nôkố kơxô̆ rơpŏng châ gum pro ăm hngêi ối a cheăm hiăng châ gum tơniăn tâng vâ pơchông ƀă pơkâ, veăng gum tung hnoăng cheăng mơjiâng thôn pơlê nếo dêi cheăm. Drêng châ gum ăm hngêi ối, vâi krâ nhŏng o phiu ro khât, tơniăn hmiân tuăn tung tơdroăng rêh ối cheăng kâ mơnhông cheăng kâ rêh ối rơpŏng hngêi, veăng gum mơjiâng ƀă mơnhông pơlê pơla ăm pơlê cheăm krá rơdêi”.

Pơla hơnăm 2022 – 2025 kong pơlê Dak Lak mơ-eăm mơjiâng pro lối 5 rơpâu toăng hngêi gum ăm mâu rơpŏng kơtiê, vâ chê kơtiê, rơpŏng châ tơnêi têa gum, rơpŏng kuăn pơlê xơpá ‘na hngêi ối. Tơdroăng mơjiâng pro 1.200 toăng hngêi hiâm mơno hơ-ui dêi Khu xiâm ngăn Kŏng an cho ivá kân khât, gum kong pơlê kô pêi pro klêi pơkâ hiăng mơ’no. Pôa Lê Bá Cảnh - Kăn phŏ hnê ngăn Vi ƀan Măt trâ̆n Tơnêi têa Việt Nam kong pơlê Dak Lak ăm ‘nâi, drêng tơdah xo tơdroăng tơkêa, Vi ƀan Măt trâ̆n Tơnêi têa rêm râ a kong pơlê hiăng tơrŭm ƀă kơvâ ngăn kŏng an, khu kăn pơkuâ cheăm tơring, séa ngăn,  rah xo, chêh inâi mâu ngế ki châ gum pro ăm hngêi cho mâu rơpŏng kuăn pơlê. Tâi tâng 1.200 toăng hngêi hiăng châ pơcháu ƀă mâu rơpŏng hiăng mot ối dêi.

Tung la ngiâ ah, Vi ƀan Măt trâ̆n Tơnêi têa Việt Nam kong pơlê Dak Lak pơtối mơhnhôk veăng tơlo liăn vâ pêi pro túa pơkâ mơjiâng pro kơxô̆ hngêi ki u ối vâ diâp ăm mâu rơpŏng kuăn pơlê:

“Ngin pơtối tơbleăng mơjiâng pro tŏng gum mâu ngế mâu rơpŏng ki xơpá ‘na hngêi ối ƀă rơhêng vâ mâu kơvâ cheăng, rêm râ, mâu khu tơrŭm lơ mâu khu ki ai hiâm mơno hơ-ui tung ƀă kong pơlê ki ê pơtối tơrŭm ƀă kong pơlê Dak Lak tŏng gum ăm kuăn pơlê a kong pơlê ki ôh tá ai hngêi ối. Pro tiah lâi tung pơla hơnăm 2022 – 2025, rak bê tŭm mâu tơdroăng ki châ pro lối 5 rơpâu toăng, gum ăm mâu rơpŏng xơpá ‘na hngêi ối pơla hơnăm ki kố a kong pơlê”.

Tơdroăng pơkâ dêi Khu xiâm ngăn kŏng an, pro 1.200 toăng hngêi diâp ăm mâu rơpŏng xơpá, rơpŏng châ tơnêi têa tŏng gum, rơpŏng hdroâng kuăn ngo a kong pơlê Dak Lak, châ tơbleăng pro ing khế 3/2024 ƀă hiăng pro klêi a mơ’nui khế 7/2024. Tâi tâng kơxô̆ liăn ‘no ăm tơdroăng pơkâ kố cho 96 rơtal liăn, tung mê kơxô̆ liăn tŏng gum dêi Khu xiâm ngăn Kŏng an cho 60 rơtal liăn, u ối cho xua dêi kong pơlê gum.

Rêm toăng rơdâ 36 met karê, ƀă mơnât meăm, kuâ lêm tôl, a’nâi krâ gât reăng, kơnâ 80 rơtuh liăn. Nôkố 1.200 rơpŏng hiăng mot ối, ing mê veăng gum kong pơlê Dak Lak xut tah hrâ mơnguâ kơtiê xơpá, veăng gum ăm kuăn pơlê hdroâng kuăn ngo, gum kuăn pơlê hmiân tuăn pêi cheăng kâ, tơrŭm mơjiâng cheăng kâ, thôn pơlê nếo ƀă rak vế gâk kring Tơnêi têa. Môi tơdroăng pơkâ kân, la hiăng pro klêi tung lối 4 khế xuân ăm hlo tơdroăng ki pêi pro kơtăng, tơrŭm tơƀrê dêi mâu khu râ pơkuâ.